MINKANA 27 - Bible en langue Bulu

¹ Te wo nguane mame yʼakiti amu ô nji yeme mam ma ye kui den.

² Môte mfe nye a seʼe wo sa ñhe anyu dôé womien.

³ Akok da bi kob abui, Nseleʼe ki adit vʼôlune môt a nʼakut wo bi kop a dañ akok a nselek.

⁴ Ayaa e ne njet, ôlune ki wo fuluku ve za a ne jibi aban ?

⁵ Minkomekan mia boban éngengeñ mi ne mvaé a dañe nyeʼan ô solô.

⁶ Meveñ me mvôé me ne jôme ya tabe je ndi, ve nlatan anyu ya nyô a siñe wo ô ne meduʼan.

⁷ Nyô abum é jaéya a tibi bisia bi wôé a mebo, ve nyô a wôʼô zaé a wôʼô jôm ése e nʼayôle mvaé anyu.

⁸ Aval ônon wo ke dumbaʼa dé ôyap ô né, avale te môt a ke nda jé ôyap a né.

⁹ Mbon a ôlobinda bia ve nlem avak, a njeʼebane nleme mvôé môt ô ne mvaé a dañe melebe môt a vʼémien.

¹⁰ Te kandane nyo mvôé nge mvôé ésoo, a te nyiin e nda monyoñ e môs ôlun; môt a too wo bebé a ne mvaé a dañe monyoñ a nʼôyap.

¹¹ A mone wom, boʼo fek a ve ma nlem avak, éyoñe te ma ye bo nguleya yalane nyô a té ma si.

¹² Môt a ne ntye a sobô éyoñ a yen ébubua ja zu, bôt be ne te yeme fas be ba lôte nalé a suʼulane tôbane njuk.

¹³ Nyoñe ngômesane jé amu a nga liʼi anyu éban ajô môte mfe; siliʼi nye biban asu minga bikuu.

¹⁴ Nge môt éziñ a botane nyô mboʼo tyiñe yôp e ndibe tyé, jame te da lañebane nye ane biyoʼé.

¹⁵ Asaʼa nda da toé mendim te tebe e môse mveñ ja noñ a e minga a nyeʼe ntañete ba funan.

¹⁶ Nyô a bi minga ate a bi évuñulu, a wo wé wo bi mbon.

¹⁷ Etyé ja jeb étyé avale te ntabane vôme wua a môte mbok wo vele nsisime môt ôyo.

¹⁸ Nyô a nyoñe njuʼu ya yale figié a ye di bibuma yʼété, a nyô a baʼale masa wé ba ye seʼe nye.

¹⁹ Aval asu da yen ebien e mendim été, avale te nleme môt ô ne émiene ngobé.

²⁰ Vôme miñwuan mi né a édoʼo ébé ya njañ bi se nguleya jaé; avale te fe mise me môt me se nguleya kate ñyenan.

²¹ Nduan ja tune argent a or ve duma môt a bili nde da tyiʼi ajô dé.

²² Jaʼane wo tyaʼakut e ntyob été, e zañe mefes a ntum , mboon akute wé wo ye bo te kôlô be nye.

²³ Tukaʼa yeme ntômba ôse ya mintômba miôé, a wu mimbame miôé njuk;

²⁴ Amu akum e nji tabʼéyoñ ése, avale fe ékate njô bôt e nji kalan ataté miaé wu a kui wu ôvok.

²⁵ Tyiʼi biloʼo ya mefup a té mimfefé biloʼo mia kui tokéʼé minkôte bilok e minkô.

²⁶ Bitoñ mintômba bi ne asu ya jalé wo ngômesan a beyôm bikela asu ya yaʼan afup.

²⁷ Menyañ beyale bikela ma yian asu bidi biôé, asu bidi ya nda jôé, a asu ya bo bebo bisaé bôé be ne binga na be nyiñ.