MINKANA 26 - Bible en langue Bulu

¹ Avalʼane metaʼa me nji yiane a mfum ésep nge mveñ éyoñe nkôane bidi, avale te fe duma e nji yian akut.

² Avalʼanʼônon wo fam ôlam a avalʼane nguleyebe a yele, nalé biyoʼé bi nji bi amu bi ne te kap.

³ Nkasa ô ne asu ékabela kandé asu éjakas mbeñ asu mekut.

⁴ Te yalan akut ô veʼeleʼe mboon akute wé womien ô za funane de.

⁵ Ve yalaʼan akut avale da yian mboon akute wé, a za veʼe feʼe na a ne mfefeʼe môt.

⁶ Nyô a bo na akut e bo nkalane mefoé wé, a tyiʼi émiene mebo a a nyu évô akute te.

⁷ Nkana akut da kan wo jembane ngu vʼane mebo me mbôbôk.

⁸ Akut nde da tiñeti ôkôk e toloo, akut nde fe da seʼe akut avok.

⁹ Nkana wo so anyu mekut ô ne ane éyo é beme e wo nsoʼo meyok.

¹⁰ Nyô a nyoñ akute bisaé nge nyoñe bôte bese a tôbane be bisaé, a ne ñwua élaé a balé bôte bese meveñ;

¹¹ akute da bulan e mboon akute wé été, da funane mvu ja bulane di bendôlô bé.

¹² Nge wo yene môt a too fek e mise mé émien ô ne tabe akute ndi a dañe nye.

¹³ Nleles wo jô na: étoñe ngbwengbwem é ne e zene yôp, a ngbwengbwem é tele minjoñe yôp!

¹⁴ Mbé wo tyiñelane memvaʼan, a nleles wo kôñelan énoñe jé yôp.

¹⁵ Nleles wo dub akule wo dé e beʼe été, a wôʼô njuʼu ya bulane de mvuse na a futi dʼanyu.

¹⁶ Nleles ô ne fek e mise mé émien a dañe bôte zamgbwa ba yalane mame mvoʼé .

¹⁷ Nyô a fubu ajô e nji fombô nye été, a funane nyô a bi mvu ja lôt e melo.

¹⁸ Avale nyô a yaa a wua minkabaʼa mi nduan, mekoñ bilaé a awu a né,

¹⁹ avale te môt a duʼu nyô mbok a jôʼô na: ma bo fianga a né.

²⁰ Eyoñe njaʼa é ne momo, nduan ja dim; a éyoñe mbo mfuk a nji bo, mewôman ma man.

²¹ Avale daʼa é né e metyeʼe me nduane yôp, njaʼa e nduane yôp, nalé môta mintañete a nʼôsôlé a né.

²² Mejô me môt a nʼékobekobô ma funane bone bidi bia dañe zam anyu ma siliki a kui miñya été.

²³ Nkone bifia bia solé mbia nsisim ô laté mbia nlem bia funane ésôm argent e vieʼe ékone yôp.

²⁴ Nkobô yʼanyu wo solé nyô a bili ziñ a a futi meduʼan e nleme wé été.

²⁵ Eyoñ a kobô mbamba tyiñ te buni nye amu mbia be mame zamgbwa be ne nye nlem .

²⁶ Ziñe jé é ne nguleya sobô e solé jé été, ve nkpwala wé wo ye kulan ékôane bôt été.

²⁷ Nyô a faʼa ébé a ku été a akok da bulane be nyô a biʼiti de.

²⁸ Ekotekot ôyem ja siñe ba wo vit, a anyu meduʼan da dutu awu.