MINKANA 25 - Bible en langue Bulu

Mimfefé minkana mi Solômon

¹ Minkana mi Solômon mivok mmie mi: e bôte bʼEzékias njô bôte ya Yuda mbe be nga tili mie.

² Jame te e ne duma Zambe na a solé mam; ve di bejô bôt e ne na be tuʼa fase mejô;

³ bi ne te yem vôme yôp da suʼu nge vôm édoʼo ya si ja kui; avale te fe bi nji yem asimesane bejô bôt.

⁴ Ô vaʼa ésôm ya argent, wôna mmé biôm a ye kôme mbamba jôm.

⁵ Boʼo na mbia môt a kôlô asu njô bôt, vôm éto njôane jé ja ye yem a zôsôô .

⁶ Te zembe ôsu vôme njô bôt a too, nge tabe éto ja yiane bôbenen.

⁷ Amu da dañe mvaé be jô wo na: zaʼa nyoñe beta éto, sa na be sili wo si asu njô bôt, nye mise môé me yeneya.

⁸ Te bo avôle ya kee jam wo te yen aba mejô. Amu na nge môt wo soman a liti na wo ô ne mekua jé éfe wo ye bo?

⁹ Nge ô bili ajô a môte mbok, kôme de mia nye, ve te kulane jame môte mfe a te kate wo.

¹⁰ A za taa wo nge a wôʼô de a ékobôkobô jôé é za kulan.

¹¹ Mbamba nkobô a nʼédima ane or a ne ñyetan a njo, argent a too fe mbômaʼan été.

¹² Melep mfefek wo ve me nʼélondo a émvongo nya or e melo me môt a tuʼa vôʼôlô.

¹³ Nkatefoé a ne mewôk a funan aveb ôyôn melu ya nkôane bidi asu ba ba lôme nye; a ve nleme wé ngu.

¹⁴ Avale minkut a évuñulu te mveñ bi né, avale te nyô a duʼu émiene na a nʼésôs a né.

¹⁵ A ayabe njiban be ne bo ntyiʼi mejô na a kañese jam éziñ avale fe évôvoé ôyem é ne dutu minlem mi ne ntip.

¹⁶ Ye ô yeneya wôé? Jaʼak abime da yiane wo; amu na nge ô dañe yemete abum, wo ye yô wô.

¹⁷ Te dañe ke bimo be nyo mvôé, a za katé a suʼulane vini wo.

¹⁸ Nyô a bôte môte mboʼo ajô a ne kek, nkpwaté mekôn a akoñ élaé e ne nsoñ ne kebkep.

¹⁹ Mbunan ya buni nkoñe bôt e môse njuk, wo funan mbuʼan asôñ a abo e ne mfôʼôsan.

²⁰ Nyiane nlem wo wôʼôlune bia ô ne fe vʼane môt a vaa ngômesane jé e môs ô nʼavep, nge futi woon a ne sañ aveñe yôp.

²¹ Nge nsiñe wôé a wôʼô zaé vaʼa nye bidi. Nge a wôʼô évé, nyuʼu nye mendim.

²² Eyoñ wo bo nalé, wo kôane maʼa me nduan e nlô wé yôp, a e Zambe wôé a ye bulane wo mboone te.

²³ Evuñulu yʼakôé ja soo mveñ, a ôyem wo kobô asoé wo ve asu mbot.

²⁴ E ne mvaé na môt a tabe abuʼu yʼandile nda a dañe ntabane nda jia a minga mintañete.

²⁵ Mbamba foé a so si é nʼôyap, a funane bivôvoé mendim asu môt a ntoo nteʼan.

²⁶ E zôsôa môt mbo abé a dutu a funan ôsôé a anjeñ bi nʼajuk.

²⁷ A nji bo mvaé ya bulu di wôé, a e nji bo mvaé be bôte na be jeñe duma dap.

²⁸ Môt a kate jôô émien a funane tison é ntoo ntyaman a mimfin mi maneya ku.