MINKANA 24 - Bible en langue Bulu

¹ Te nyamete mbia be bôt nge kômbô tabe nsamba wop;

² amu nleme wob wo bôndé nsaane biôm, a biyaé biab bia soo njuk.

³ Nda ja lôñeban a fek a atyeñ nde da yemete je.

⁴ Nyemane mam ñwô wo bo na bitune bi nda yʼété bi jaé a e mevale me biôm mese me nʼédima a mvaé.

⁵ Mfefeʼe môt ô ne njalan a ngu a nyô a bili ñyeman a kôʼôlane ngule jé.

⁶ Amu mbamba meleb me ne volô wo na ô bo bita, a nyian wo so abui beve meleb été.

⁷ Fek ja dañ ôyabe yôb e bʼakute môt a ye bo te kui anyu vôm ba kobô mejô;

⁸ nyô a bili ôsimesane ya bo abé a lobane jôé na: Nté nkpwala .

⁹ Akut ôsimesan e ne mboon abé , a nkpweʼele a ne mbia jôm e bôt été.

¹⁰ Nge wo bili atek e môs ô bili ôlun ngule jôé é ne foʼo vʼatek.

¹¹ Nyiʼi ba ba ke wôéban, ba ba zu wôéban, boʼo na be kamane be.

¹² Nge wo jô na aa! Bi nji bo bi yemek! Ye nyô a veʼe minlem mise kob a nji wôk? Nyô a nonô ényiñe jôé ye a nji yeme de, A ye bo te bulane môt ase ane mimboone mié mi né?

¹³ A mone wom jaʼa wôé amu ô ne mvaé; ésia wôé é ne mvaé anyu dôé été.

¹⁴ Avale te fe nde wo yiane yeme fek asu nsisime wôé nge wo yene je, abui a ne wo ôsu, a ndi nleme jôé ja ye bo te kôlô.

¹⁵ Te yaa bikoé a nkpwala ôse e vôme zôsôa môt a too, nge mane sa vôm a woʼon.

¹⁶ Amu na zôsôa môt a ne ku biyoñe zamgbwa a beta fe kôlô si, ve bebo abé ba wuabane bidim été.

¹⁷ Te vak nge nsiñe wôé a ku, a éyoñ a kolé, nleme wôé ô boʼo te fôn.

¹⁸ Zambe a za yene jame te a wôʼô de abé , a vaa ayaa dé be nye.

¹⁹ Te bo mbot asu amu ba ba bo abé , a te nyamete bôt be ne nkpwala .

²⁰ Amu akiti e ne momo asu mbia môt, lambe bebo abé a dim.

²¹ A mone wom, ko Zambe a njô bôte woñ te bundan a bôt ba nyeʼe ba tyendé mam:

²² amu njañane wop wo ye so atemetem a za a yem melep ma yange bana a ba bevok?

Mejô mefe ma so be mimfefek

²³ Mejô mefe ma so be mimfefek mme ma. Eyoñe ntyiʼane mejô, nseman mingum mi bôt ô nji bo mvaé.

²⁴ Nyô a jô mbia môte na: Ô ne zôsôô , bôt ba yoʼé nye, meyoñ ma wôʼô nyʼôlun.

²⁵ Ve e ne mvaé mfaʼa ba ba komekane mbia môt, a bibotan bia zu be be asu mvome jap.

²⁶ Nyô a yalan a bifia bi ne zôsôô nye ate a latane môt anyu.

²⁷ Kôm ésaé jôé atan, tukaʼa taʼa mam yʼété afube dôé été. Mvuse yʼété wo ye lôñe nda jôé.

²⁸ Te bo ngaa a wosane môte mbok te étom, ye wo kômbô wone bôt a biyaé biôé?

²⁹ Te jô na: Avale a te bo ma nde ma fe ma ye bo nye. Ma ye bulane môt ase ane mimboone mié mi né.

³⁰ Me nga lôte bebé afube nleles éziñ, a bebé afube mindiʼi môt a ne te fek.

³¹ Me nga yene biyo bi maneya kui vôm ase, mbia bilok bi nga yian afub ese a mfine mekoʼo wé ô kuya si.

³² Me nga tuʼa fombô a nleme wom, me nga yen a nyoñe ñyeʼelan été.

³³ Mone nkean ôyo, mone ndeñan ôyo, mone nyokan, mo me too mbaʼan!

³⁴ Eyoñe te azoé da ye kui be wo atemetem, e kele da tyiñelane wo nkuk, nalé fe mfumbale zaé a ye kui be wo ane môta bita.