MINKANA 23 - Bible en langue Bulu

¹ Nge mia beta môt mia di tebele wua, tabeʼe nyô a ne wo ôsu ntye;

² nge nkômbane ya di ô ne wo abui, tame bo ne señele abui ndoʼo dôé.

³ Te nyamete mbamba biseñ bidi bié, amu bi ne bidi meduʼan.

⁴ Te ve womiene nyôle ne botok asu ya bi akum tame jôʼé ve atyeñe dôé mfaʼa ôte.

⁵ Amu awolo mise môé ma fombô mfaʼakum e né, a koé na teke fe jôm. Amu akum da ve ebiene mefap, da yele mfaʼa ya yôp avalʼane ndôé.

⁶ Te di bidi nyô a fombô bôt mbia be mis, nge kômbô di bitôtoʼo bidi bié.

⁷ Amu a ne avalʼane mintyiʼane mié mi né; a ye jô wo na: Jaʼak a nyu ve nleme wé ô nji bo be wo.

⁸ Wo ye yô éfus adi wo te di, a nyeʼan ôse wo bili wo ye bo momo jam.

⁹ Te kobô e melo mʼakute môt, amu da ye biasé ñyemane ya mejô môé.

¹⁰ Te té nnôm akône ya nné, a te nyiin afube bobenyui été;

¹¹ amu nyô a kune be a ne ngu, a ye tebe wo ngame yat a kaman ajô dap.

¹² Vaʼa nleme wôé mfaʼa ya nyeʼelan a melo môé mfaʼa minkobô mi ñyemane mam.

¹³ Te siʼibi ve mone wôé melep , nge wo bôme nye a nkasa, a ye bo te wu.

¹⁴ Eyoñ wo bôme nye a nkasa, wo ye kaman ényiñe jé na é bo te ke vôme miñwuan mi né.

¹⁵ A mone wom, nge nleme wôé ô ne fek, nleme wome fe wo ye vak.

¹⁶ Miñya yʼabume dam mia ye fôn a mevak éyoñe biyaé biôé bia ye kobô zôsôô .

¹⁷ Nleme wôé ô boʼo te nyamete bebo abé ve ko Zambe woñ môs ôse:

¹⁸ amu abui a zu, a ndi nleme jôé ja ye bo te kôlô.

¹⁹ Wo, a mone wom, vôʼôlôʼô a bo fek, a liti nleme wôé zen é ne zôsôô .

²⁰ Te bo ézezañe ya ba ba nyu bilam, ézezañe ya ba ba di tit a dañe nné,

²¹ amu besoʼo bilam a ba ba di abui ba ye kui azoé, a éles ja bo na môt a fete nkan.

²² Boʼo ésoo mewôk amu nyʼa nga biaé wo, a te biasé nyua éyoñ a ntoo nnôm.

²³ Jeñe bebela a te kuane nye, nalé fe jeñe fek, ayéʼé a ñyemane mam.

²⁴ Esaa zôsôa môt a ne foʼo mevaʼa été, nyô a biaé mfefek a bili wô mevak;

²⁵ ésoo a nyua, be tame vak, minga a nga biaé wo a tame tabe mefôn été,

²⁶ A mone wom, vaʼa ma nleme wôé, a mise môé me tame yene mezene mame mvaé.

²⁷ Amu minga ébamba a ne édoʼo ébé, a éza minga ki ôfanefane mfaʼan anjeñ.

²⁸ A kolé melam ane ze mimfaka, avale te fe a kôʼôlan bekoñe bôt e bôt été.

²⁹ Za a ne éngôngo? Za a bili ôlun? Za a ne môta mintañete? Môta bisoman? Nyô a ne meveñe nyô te étom? Nyô mis me ne bivele?

³⁰ Ye sa bôt ba langane fefele bilam? Ye sa ba ba jeñe bilam bi ne mbundan?

³¹ Te fombô woon amu a ne mbamba évele, amu a kui mesanaʼa élaé été ngʼamu a lôte tyiʼibi éngoñ.

³² A suʼulan a lôp ane nyo, a suʼulane diʼan ane viet.

³³ Mise môé ma ye fombô éza binga, a nleme wôé wo ye kobô joʼo joʼo.

³⁴ Wo ye bo avalʼane môt a bôô mañ été, ane môt a bôô abôbône Sitima;

³⁵ wo ye jô na: Ba te bibi ma, me teke wôʼô mintaé! Ba te bôme ma, me teke yem! Ma ye vee ôyo éyoñ évé? Ma ye beta sili menyu!