MINKANA 22 - Bible en langue Bulu

¹ Mbamba jôé a ne mvaé a dañ abui akum, nalé fe na mvam é ne mvaé a dañe argent a or.

² Nkukum a nzôzoé ba fulan amu Zambe nye a nga té be bebaane.

³ Môt a ne ntyee a sobô éyoñ a lôô mbia jam a zu, ve minsusuk mia lôt te kee dise wé a suʼulane beʼe minjuʼu yʼété.

⁴ Jam da tôñe nsuubane si e ne nkoone Zambe woñ, akum, duma a ényiñ.

⁵ Biyo, melam bi ne njalan e zen ékotekote môt; nyô a kômbô kaman ényiñe jé a ke zen éte ôyap.

⁶ Yeʼeleʼe mongô mbamba mefulu atataʼa yʼényiñe jé, jaʼane na a ntoo nnôm a ye baʼale me.

⁷ Minzôzoé mi nʼéjôé nkukume si, a nyô a bili mvôla a nʼôlo ya nyô a nga kôlé nye.

⁸ Nyô a bé mvô a ye kôane bidim, a ôlé yʼayaa dé wo ye jañ.

⁹ Môt a nʼésôs a ye bi ébotan, amu a ve éngôngole môt bidi bié.

¹⁰ Titaʼane nkpweʼele a ntañete wo ye man; mewosan a ébiasé fe bia ye man.

¹¹ Nyô a nyeʼe mfubane nlem , mvam é ne nye biyaé a njô bôt a ne nye mvôé.

¹² Mise me Zambe ma bômbô ñyemane mam évevé, vʼa ben mejô me môta njoñ.

¹³ Nleles wo jô na: Ngbwengbwem é nʼatan! Ma ye wôéban e zene yôp!

¹⁴ Anyu éza binga e ne ébé é nʼédok, e môte Zambe a wôʼô abé a ye ku été.

¹⁵ Mongô a beʼe nlem akut, ve nkasa a éjôé bia ye volô nye na a saʼale mboone te.

¹⁶ Nyô a kpweʼele nzôzoé a bo wô na ô bik; nyô a ve nkukum a ye suʼulane bo nzôzoé .

Mejô mimfefek

¹⁷ Keʼe alo a wôʼô mejô mimfefek; vaʼa nleme wôé mfaʼa ñyemane wom,

¹⁸ amu e ne mvaé na ô baʼale me e be womien. A na me tabe nkôman e biyaé biôé,

¹⁹ nalé ndi jôé ja ye bo be Zambe; ma zu ve womiene ñyemane den.

²⁰ Ye me nji tili wo melep a mimfasan biyoñ bilaa,

²¹ asu ya bo na ô yem jam e né, bebela bifia, nalé wo ye yalane môt a lôme wo a bebela bifia?

²² Te wôlé nzôzoé biôm amu na ô ne nzôzoé . A te tibili éngôngole môt e mbé;

²³ amu Zambe a ye kaman ajô dap a vaa ényiñ e be ba ba vaa be je.

²⁴ Te yeñ a nyô a ne mbia nlem . Te wulu a nyô a yaa,

²⁵ ô za mane yembane mezene mé, a koon ôlam asu ényiñe jôé.

²⁶ Te bo wua ya ba ba futi bebien ékoé tyiñ ba ba tiñeti bebiene memvôla e tyiñ;

²⁷ nge ô nji bi jôme ya yaʼan amu jé ba yiane nyoñe wo énoñ ô bôô yôp?

²⁸ Te té akône nné nde bʼésoo be nga telé.

²⁹ Nge wo yene môt a too atyeñ ésaé jé été, a ye tebʼasu bejô bôt, a ye bo te tebʼasu ayôme bôt.