MINKANA 20 - Bible en langue Bulu

¹ Woon a ne nkpeʼele, a ényunyui ése é ne ngu ja bo môte na a bo biduñ abui, nyô ase a jañeya été, a se nguleya bulan bi feʼe abum.

² Njô bôt a yaaya a funane ngbwengbwem ja bam. Nge wo soñe nye a yaa wo bo womien abé .

³ E ne duma mfaʼa môte na a bo te tebe bebé vôme mintañete mi né vʼakute môt ese da jiʼa yaa.

⁴ A ôyôn, nleles wo kate bé bidi amu avep. Eyoñ ba kôane bidi a jeñ, ve teke bi jôm!

⁵ Melep, e nleme môt, me ne ane mendim me nʼédok. Mfefek wo yeme lab été.

⁶ Abui bôt da yôtan, môt ase, mbamba nyoñane bôte wé, ve za a ne yene môt a wulu ane da yian?

⁷ Zôsôa môt a wulu e mvoʼé jé été. Ebotan a bone bé éyoñ émien a wuya.

⁸ Njô bôt a too éto njôô jé a tyiʼi mejô, a vaa abé ese ve a mfomban a fombô bôt.

⁹ Za a ye jô na: me boya nleme wom te bijô, me maneya tune mamien mfaʼa yʼabé?

¹⁰ Mevale metyi me kop mebaé, mevale mʼavek mebaé, bi ne mbia jôm be Zambe jia a ji évok.

¹¹ Monafam, éyoñ a ngenane mongô, a liti, e mimboone mié été, nge ntabane wé wo ye bo te bijô nge zôsôô .

¹² Alo da wôk a e dise da yen, Zambe nye a nga bo bie ji a jina.

¹³ Te nyeʼe ôyo ô za bo nzôzoé , tame kune kôlô si, éyoñe te wo ye di a jaé.

¹⁴ Nkuse jôm a jô na, jôme ji é nʼabé jôme ji é nʼabé, vʼéyoñ a keya ôyap a nga seʼe émien.

¹⁵ Or a abui mekoʼo me nʼédima bi ne ve jôme ja dañ édima é ne biyaé bia yeme mam.

¹⁶ Nyoñe ngômesane jé amu a nga liʼi anyu éban asu môte mfe; siliʼi nye biban asu nneñ.

¹⁷ Atataʼa bidi ya wup bi ne zam , vʼasuʼulan bi ne nselek anyu été.

¹⁸ Mam môt a bôndé ma yem a melep; boʼo bita a mbamba mefek.

¹⁹ Nyô a miase mfuk a kulane minsolane mi mam; te wulu nsamba môt a kobô abui;

²⁰ nge môt a biasé ésaa baa nyia, lambe wé a ye dim e dibi été.

²¹ Eliʼi môt a nyoñ atemetem metataʼa, ve asuʼulan, ja ye bo te ébotan.

²² Te jô na: Ma ye bulan abé , ve tabeʼe ndi be Zambe, wôna a ye nyii wo.

²³ Zambe a vini mbelane metyi me kob mevale mebaé, a ékotekote kob é nji bo mbamba jôm.

²⁴ Zambe nye a wulu môt, ve môta binam a ne nguleya wôʼô zene jé émien aya?

²⁵ E ne beta ôlam mfaʼa môt éyoñ a jô éngbwemese njôane na: jôme ji é nʼétyi, vʼa viane suʼulane zu fase mvus a koé na a maneya tiñeti metiñ.

²⁶ Mfefeʼe njô bôt wo tyamelane mbia be bôt a ve be melep .

²⁷ Mfasan ô ne lambe Zambe a ve môt asu ya faé bidoʼo yʼényiñe jé éfufup.

²⁸ Mvam a bebela bia kamane njô bôt; a yemete éto njôane jé a mboone mvam .

²⁹ Abeñe ya bendômane be bôt e ne ngule jap, éjijine ya minnôm e ne nyup;

³⁰ meveñ ma kui metyi ma saé abé avale te fe minkasa mia nyiin a kui nyôle môt été.