MINKANA 2 - Bible en langue Bulu

Fek ja kaman mfaʼa yʼabé

¹ A mone wom nge wo nyoñ mejô mam a nge wo baʼale mebendé mam e be womien,

² nge wo tuʼa kee alo mfaʼa ya fek, a nge wo vit nleme wôé mfaʼa ya nya mfasane mam,

³ yaa, nge wo loon atyeñ a bete tyiñe jôé mfaʼa ya nya mfasane mam,

⁴ nge wo jeñe wô ane argent a tuʼa jeñe wô ane bidima bi biôm:

⁵ éyoñe te wo ye wôk ajô ya ko Nti woñ a wo ye yeme Zambe.

⁶ Amu Nti nye a ve fek, ñyemane mam, a nya mfasane mam bia so anyu dé;

⁷ e bôt be ne zôsôô a naane be mefok, a ne fe ében e be ba ba wulu zôsôô ,

⁸ a kamane mezene me ne zôsôô , a kamane fe mezene ya bebuni bé.

⁹ Eyoñe te wo ye yeme zôsôô a nya ntyiʼane mejôô, mbamba mboon a mezene mese ma soo ébotan.

Fek ja nyii bôt

¹⁰ Amu fek ja ye zu wo nlem a ñyemane mam wo ye bo mvaé ya nsisime wôé;

¹¹ mfasan wo ye baʼale wo, nya feʼe a ye lôñe wo nkaʼalé,

¹² asu ya kôté wo e zene yʼabé a kôté wo e be môt a kobô bikotekote bi mam,

¹³ e be ba ba liʼi mezene me ne zôsôô a wulu e ma me ne dibi,

¹⁴ mbe ba vaʼa mboon abé a liti avaʼa dab e mboon ékotekot,

¹⁵ mbe bete mezene mab me ne bikotekot a mimfaka miab minkot-minkot binyiʼa-binyiʼa;

¹⁶ asu ya kôté wo e bʼéza minga a be minga bikuu a kobô élen,

¹⁷ nye ate a liʼi mvôé jé ya aso mongô; a vuan élate Zambe wé;

¹⁸ amu nda jé ja lumbu awu, a mimfaka mié mia ke bewu be né,

¹⁹ teke wua ya ba ba ke be nye a beta so a suan e mezene yʼényiñ.

²⁰ Nalé ate wo ye wulu e zene mbamba be bôt, a baʼale mezene ya bezôsôô be bôt.

²¹ Amu bezôsôô be bôt mbe ba ye tabe e si jap, e bôt be ne zôsôô mbe ba ye liʼi été;

²² ve bôt be nʼabé a melo ba ye kôlô été a ba ye titane be.