MINKANA 19 - Bible en langue Bulu

¹ Nzôzoé wo wulu e zôsôô wé été ô ne mvaé a dañe nyô a ne nlaa minsos a too fe ôkukut.

² Te ke môt a yene njembane ñyemane mam mvaé a nyô a nʼavôle mebo a fuban abé été.

³ Akute ya be môt da joʼotane zene jé, asuʼulan a nga viane kee Zambe ôlune nyô.

⁴ Akum da kôʼôlane bemvôé abui, ve nzôzoé wo kandane mvôé jé;

⁵ ékotekote ngaa ja ye bo te bi mekabe, a nyô a laane minsos a ye bo te fam melep .

⁶ Abui bôt da jeñe mvolan e be biwôlô bi bôt, a môt ase a ne mvôé nkekabe môt.

⁷ Bobenyañ be nzôzoé bese ba vini nye, a bemvôé bé mbe ba dañe dañe tube nye! A jeñe vôme ya laane minlañ, ve teke jôm;

⁸ môt a bo fek a nyeʼe nsisime wé, nyô a baʼale ñyemane mam a tôbane mvom;

⁹ ékotekote ngaa ja ye bo te nyoñe mekabe, a nyô a laane minsos a ye wu.

¹⁰ E nji yiane na akut e nyiñe mefok été, a da dañ abé na ôlo ô jôô bone bejô bôt!

¹¹ Môt a yeme fas a nʼôteʼeteʼe ya yaa, a a belan éjijine jé na a biasé jam ba te bo nye.

¹² Ayaa njô bôt e ne ane mvame ngbwengbwem, a mvam jé ane mfô mendim e biloʼo yôp.

¹³ Akute mon e ne ébubua jam asu ésaa wé, a môman me minga me nʼasaʼa nda da toé mendim éyoñ ése.

¹⁴ Nda a akum bi ne éliʼi bʼésaa, ve minga a yeme fas a ne mveane Zambe.

¹⁵ Eles ja wua môt ôyo melom, a nyô a ne mbim a ye wôʼô zaé;

¹⁶ nyô a baʼale atiñ a baʼale nsisime wé, nyô a biasé mezene mé a ye wu.

¹⁷ Nyô a ko éngôngole môte ngo, a ve Zambe ékôla, a Zambe a ye bulane nye jôme ja yiane nye.

¹⁸ Bôme nyô mon amu ndi nlem ya na a ne tyendé é ngenan, ve te bi nkômbane ya bo na a wu.

¹⁹ Nyô ayaa da bi a ye yaʼan étom yʼété, amu na nge wo jamé nye wo tindi nye na a beta taté.

²⁰ Wôʼô meleb a nyoñe nyeʼelan, asuʼulan, wo ye bo fek.

²¹ Nleme môt ô bili abui asimesan, ve nkômbane Zambe ñwô wo ye boban.

²² Jôm ja bo na môt a dutu bôt é ne mbamba nyoñan a nyoñe be; nzôzoé ô ne mvaé a dañe nlaa minsos.

²³ Nkoone Zambe woñ wo kee môt ényiñ, a nyô ase a bili wô a ye bi mam mese a njuk wo ye bo te kui be nye.

²⁴ Nleles wo kee ngum akule wo e beʼe été, ve te nguleya bulane de mvuse na a futi dʼanyu.

²⁵ Bibiʼi nkpweʼele, wôna akut da ye tabe ntye. Komekaʼane mfefek wôna a ye wôʼô ñyemane mam.

²⁶ Nyô a bo na ésaa a kui ôsame, nge bo na nyia a tup, a ne mon a ve ôson a mimbote nyô.

²⁷ Jibiʼi bo te nyoñe ñyeʼelan a mone wom, nge nyeʼelane te wo viane bo na ô dimi fé, a ke minkobô ya ñyemane mam ôyap.

²⁸ Nsusuʼu ngaa wo biasé metiñe ya nkobane mejô, a anyu mbia be bôt da wôʼô abé mvaé.

²⁹ Mintyiʼane mejô mi ne nkôman asu bekpweʼele, a minkasa asu mvuse mekut.