MINKANA 18 - Bible en langue Bulu

¹ Nyô a bo te fulan a bôte bevok, a jeñe ve nkômbane wé émien. A wosan e feʼe fe ése be ne liti nye.

² Môt a ne tee fek, a nji yene ñyemane mame mvaé, vʼasimesane dé nde a yene mvaé.

³ Eyoñ mbia môt a zu, ébiasé fe ja zu. mboone ya dimili duma dôé wo zuu wo ôsame ôson.

⁴ Bifia bia so môt anyu bi ne bidoʼo mendim ane mañ, nalé fe bi ne anjeñe ngu ane mendim yʼôtoñ fek.

⁵ E nji bo mvaé na be mvamane môt a bili mekua nge kamane môt a ne te bijô na a nyoñ mekabe.

⁶ Eyoñ akut éziñ da taté nkobô, jôm ja sili nye é ne vʼébôm.

⁷ Eyoñ akut da kobô da jian ebien, da bili ôlame ya bifia bié émien.

⁸ Mejô me môta mfuk me ne ane bibuma bi ne mvaé ya di, ma siliki a kui e teme miñya .

⁹ Nyô a bo éles ésaé jé été, a ne monyañe nyô a tyam.

¹⁰ Jôé Zambe e ne ôlem ô ne ngu; zôsôa môt a mate a ke sobô été, jôm te fe ngule ya nnambe nye.

¹¹ Akume nkukum e ne tison é ne ngu, ôsimesane wé été akume te e ne mfine mekok , jôm é se nguleya fôʼô wô.

¹² Môt a bo mebun éyoñ a ngenane te bi njuk, ve duma da tôñe nsubane si.

¹³ Nyô a yalan te taté vôʼôlô, akut a joʼojoʼo le bi ne be nye!

¹⁴ Nkômbane ya nyiñ ô ne volô wo éyoñ wo kon, ve nge wo dimili nkômbane te, susuʼa ndi nleme jôé ñhe le wo dimili.

¹⁵ Nlem ô ne fek wo nyoñe ñyeman a alo mimfefek da jeñe ñyeman.

¹⁶ Biôme môt a ve bôt bia nene zene jé a kui nye e be biwôlô bi bôt.

¹⁷ Nyô ase a tebʼôsu ya kobô ajô dé, a yené ane nyô a bili mekabe vʼéyoñe nyô a ne nye ngame yat a soya, a ye sili nye bʼamu ya nkate wé.

¹⁸ Mboon asimba wo mane mintañete, a kabe biôm e zañe mingungu.

¹⁹ E ne tyiʼibi ya nyiin e tison é ne ngu a dañe na ô dutu monyoñ a wôʼô abé , a mintañete mia funane mengôñe ya ôlem.

²⁰ Môt a jalé abume dé a bibuma yʼanyu dé, a jalé abume dé, a bibuma ya biyaé bié.

²¹ Awu a ényiñ bia so ôyem, môt a nyeʼe wô a ye di bibuma yʼété.

²² Môt ase a yeneya minga ya luk, a someya mvom, mvame le a te nyoñe be Zambe.

²³ Nzôzoé wo kobô a deʼele mo, ve nkukum wo yalan a ayoʼo ese.

²⁴ Nyô a bili bemvôé, a ne nguleya bi be asu bidime bié, ve mvôé éziñ é ne kabetane wo a dañe monyoñ.