MINKANA 17 - Bible en langue Bulu

¹ Efuse nkôte belet é ne mvaé évôvoé été, a dañe nda é ne njalan a tit e metyamaʼan été.

² Mbo ésaé a yeme fas a dañe mon a vʼôsone nyô, a mbo ésaé ate a ye nyoñe ngap ézezañe ya bobenyañ bʼakute mone te.

³ Nduan ja veʼele or a argent, ve Zambe a veʼele minlem mi bôt.

⁴ Mbo abé nye a vôʼôlô biyaé bi nʼékotekot, a ékotekote môt ja kee alo e bʼôyem ô ne mvô.

⁵ Nyô a kpweʼele nzôzoé a biasé Nté wé; môt a vak éyoñe nyô mbok a bili njuk, ba ye bo te jamé nye.

⁶ Bendaé be nʼékate duma e be minnôm befam, a bʼésaa ki mevaʼa ya bobefame bap.

⁷ Benya bôtô be nji laa minsos, a mekut me nji ko woñe ya jô jôm éziñ,

⁸ mvaka é ne akoʼo maʼa e be nyô a bili je, ba simesaʼane na e vôm ase be ne kôñelan, mame mé ma ye ke vʼôsu.

⁹ Nyô a buti ékop a jeñe nyeʼan, ve nyô a baʼalane je bifia bié été a kandé bemvôé.

¹⁰ Nyeme mam nye a semé mveane bijô, a dañe minkasa ntet be ne bibi akute môt.

¹¹ Mbia môt a jeñe vʼane a ne bene njôan, ve ba ye lôme njenjete nkatefoé ô wosane nye.

¹² A ne mvaé ya tôbane ñyôyoʼo tit wo jeñe bone bé, a dañe na ô tôban akut e boʼo mam mʼakute mé.

¹³ Nyô a bulane mvaé a abé , abé da ye bo te ke nda jé ôyap.

¹⁴ Ntyaʼane mewôman ô ne ane wo tyame miek, éyoñ ntañete ô ngenane te bo, tatéʼé wondé.

¹⁵ Nyô a kale mbia môt a nyô a ve zôsôa môte mekua, bebaane be ne mbia jôme be Zambe;

¹⁶ moné a volô jé e mo mʼakut, yʼasu ya kuse fek? Ve fek é ne nye momo.

¹⁷ Mvôé ja nyeʼe biyoñ bise a monyañ a ne valé mfaʼa ya volô éyoñ yʼôlun.

¹⁸ Akute môt étam nde da kute tôé asu éza mvôla.

¹⁹ Nyeʼe mejô a nyeʼe fe mveane mekua, a nyô a bili ngule minkômban ôsame a ye kui be nye.

²⁰ Nlem ô nʼakut ô ne teke tôbane mvom, a nyô a bili ôyem ô nʼékotekot, a ye ku njuʼu été.

²¹ Nyô a biaé akute mon a ye bi ôlun ésaa akut a se nguleya vak.

²² Nlem ô ne mevak ô ne mbamba biañ, ve nsisim ô ne nteʼan wo kôtô bives.

²³ Mbo abé a kañese biboteze alôʼô été, asu ya bo mezen me ne zôsôô ékotekot.

²⁴ Fek é ne fefele ñyeme mam, ve mise mʼakute môt ma fombô a kui akuʼu si.

²⁵ Akute mon da ve ésaa wé ôlun, a ve nyô a nga biaé nye évindi nlem .

²⁶ E nji bo mvaé ya bo na zôsôa môt a yaʼan, jaʼan vʼaleman, nge bôme benya bôtô amu zôsôô wop.

²⁷ Môt a ne te fôtan a bili ñyemane mam, a nyô nlem ô bôô si ne mieññ a ne mfefeʼe môt.

²⁸ Jaʼan akute môt, éyoñ e too évô, da yené ane mfefek; nyô a fete biyaé bié a ne fek.