MINKANA 16 - Bible en langue Bulu

¹ Môt émien nye a taʼa mam e nlem , ve ntyiʼan ôyem wo tyik wo so be Zambe;

² mezene me môt mese me ne mfuban e mise mé, ve Zambe nye a veʼe minsisime kop.

³ Keʼe Zambe mimboone miôé, éyoñe te mam wo kômbô bo ma ye tôéban.

⁴ Zambe a nga bo jôm ese a sôñe ngume jam, jaʼane mbo abé a nga bo nye asu môse ya njuk.

⁵ Zambe a yene nlem ôse ô ne ziñ mbia jôm; a e ne bebela na melep ma ye tôñ avale nleme te.

⁶ Mvam a bebela bia jamé ékop, a môt a saʼale abé éyoñ a ko Zambe woñ.

⁷ Eyoñe Zambe a yene mezene me môt éziñe mvaé, a bo jaʼane besiñe bé na be tabe mvoʼé a nye.

⁸ Tyôtyoé biôm é ne mvaé e zôsôô été, a dañ abui akum ékotekot été.

⁹ Nleme môt wo fase mame ya zene jé, ve Zambe nye a yemete medaa mebo mé.

¹⁰ Minkulane mejô mi bete biyaé bi njô bôt, e ntyiʼane mejô été, anyu dé e nji yiane bo ékotekot.

¹¹ E kop a avek bi ne zôsôô bi ne biôme bi Zambe, metyi me kop mese fe me ne nkuta été me ne ésaé jé.

¹² Bejô bôt ba wôʼô mimboon mia liti ésas angôndô, amu na éto njôan ja yem ve nya ntyiʼane mejôô.

¹³ Bejô bôt ba yene biyaé bezôsôô be bôte mvaé, a ba nyeʼe môt ase a kobô zôsôô .

¹⁴ Ayaa njô bôt e ne nkatefoé awu, ve mfefeʼe môt ô ne jeʼe de.

¹⁵ Eyoñ asu njô bôt e ne ne njema, ényiñ e nje le, a mvame jé ja funane nkute mveñ yʼamané mbu.

¹⁶ Ngoʼo abim ane mbiane fek ô ne mvaé a dañe or! Mbiane nyeman a dañe argent!

¹⁷ Zene bezôsôô be bôt é ne nsaʼalan abé; nyô a bômbô évévé ya fombô e zene jé, a baʼale ényiñe jé.

¹⁸ Mebun ma dutu ntyamane mam, a nsisime mbia anyu wo dutu na mam me ku.

¹⁹ A ne mvaé ya suu womiene si mia be minzôzoé, a lôte na ô kaban akum mia be bôt be ne mebun.

²⁰ Tukaʼa fase jôm wo yeʼele, éyoñe te wo ye ke ôsu, a môt a too ndi nlem be Zambe a ne mevak.

²¹ Môte nlem ô ne fek a lobane na ñyeme mam, a évôvoé ya biyaé ja kôʼôlane ñyeman.

²² Mbamba mfasan a ne anjeñe yʼényiñ e be ba be bili wô, ve melebe mekut me ne mboon akute wop.

²³ Nleme mfefek wo ve anyu dé na e kobô a nya mfasane, a meyaé ya ñyemane wé ma yeneʼe biyaé bié yôp.

²⁴ Mbamba minkobô mi ne ésia wôé! Ma ve nlem évôvoé a ma saé nyô.

²⁵ Zen éziñ é ne yené mvaé e mise me môt, vʼasuʼulan, zen éte é ne nyô yʼawu.

²⁶ Nkômbane mbo ésaé wo saé asu dé, amu anyu dé da tindi nye mfaʼa ôte.

²⁷ Môt a ne momo jôm a kômesane njuʼu wé, a ôyeme vié wo yôñ a mboone nkpwala .

²⁸ Ekotekote môt ja soé mintañete, a nyô a ne mfuk a kandé bemvôé.

²⁹ Môt a nʼévô a won e môte mbok, a wulu nye e zen é nji bo mvaé.

³⁰ Nyô a dibe mis a bo nalé, amu a bôndé mefeʼe me nʼékotekot, nyô a bem, émien mesôñe biyaé a maneya bo abé .

³¹ Nyub é ne mbamba ékate duma, ba koone je e zen é ne zôsôô .

³² Nyô a ne ôteʼeteʼe ya yaa, a ne mvoʼé a dañe mben, a nyô a yeme jôô émien a dañe nyô a nyoñe ngume tison.

³³ Asimba da wuaban e mfeʼézingi été, ve ntyiʼan ôse wo so be Zambe.