MINKANA 15 - Bible en langue Bulu

¹ Evôvoé éyalan ja jeʼe ayaa, vʼéfia ja balé ja dutu ayaa.

² Ôyem mimfefek wo ve ñyemane mam étua mvaé, vʼanyu mekut da sôé mboon akut.

³ Mise me Zambe me ne vôm ase, me fombôʼô mbia a mba be bôt.

⁴ Evôvoé ôyem é nʼélé ja vʼényiñ, ve ngʼékotekot é nʼété ja ve ateʼe nyô.

⁵ Akut da vini meleb mʼésaa, ve nyô a semé melep a bo mam a atyeñ.

⁶ Nda zôsôa môt é bili abui akum, vʼakume mbia môt da soo njuk.

⁷ Biyaé mimfefek bia mialane ñyeman ve nleme mekute me bôt ô nji bo nalé.

⁸ Metunaʼa bebo abé me ne mbia jôme be Zambe ve a kañese meyeʼelane bezôsôô be bôt.

⁹ Zene mbo abé é ne mbia jôme be Zambe, ve a nyeʼe nyô a tôñe zôsôô;

¹⁰ mbia melep me ne asu nyô a kôlô zen ja yian; Nyô a vini melep a ye wu.

¹¹ Vôme miñwuan mi né a mbiʼili ya njañan bi ne Zambe ôsu, ngumaʼane ke minleme mi bôt!

¹² Nkpweʼele bôt a nji nyeʼe na be jôô nye, ajô te a ne te ke e mfaʼa mimfefeʼe mi né.

¹³ Nlem ô ne mevak wo ve asu ne njema; vʼéyoñe nlem wo wôʼô njuk nsisime fe wo tek.

¹⁴ Nlem ô ne fek wo jeñe ñyeman, vʼanyu mekut da di mboon akut.

¹⁵ Melu mʼéngôngole môt me nʼabé mese, ve nlem ô bili mevak ô nʼabôʼô bidi yʼéyoñ ése.

¹⁶ Tyôtyoé biôm ô laté nkoone Zambe woñ bi ne mvaé a dañ abui akum e nzametaʼan été.

¹⁷ Esua bijebejebaʼa é ne mvaé e vôme nyeʼan ô né, a dañ avoñe nyak e vôme ziñ é né.

¹⁸ Môt a yaa a dutu mintañete, ve nyô a nʼôteteʼe ya yaa a jeʼe mewôman.

¹⁹ Zene nleles ja funane nkaʼalé biyo, ve zene bezôsôô be bôt é ne njeʼese.

²⁰ mfefeʼe mon wo vʼésaa wé mevak, akute môt de ki da biasé nyia;

²¹ nyô a ne te fek a vak a mboon akut, ve mfefeʼe môt wo wulu ne tiññ e dulu dé été.

²² E mam môt a kak ma bo te tôéban amu mbôndane feʼe momo, ve ma boban e vôm abui bevee melep be né.

²³ Eyoñe môt a vʼéyalan yʼanyu dé, jame te e ne di ya mevak, a ngoʼo akaʼa mvaé éfia ja toteban éyoñ éyoñ ja yian.

²⁴ Zen ényiñ ja bete môt a yeme fase yôp, nalé ate a ye saʼale étabaʼa bewu e ne mfaʼa ya si.

²⁵ Zambe a kpwé e ndaa bôt be ne mebune si, vʼa yemete jôme nkuse minga wo yiane bi.

²⁶ Zambe a yen asimesan e nʼabé mbia jôm; ve mbamba minkobô mi ne mfuban .

²⁷ Nyô a nʼôzañe ya bi maʼan me ne te yian, a ndeñele nda jé émien, ve nyô a vini biboteze a ye nyiñ.

²⁸ Nleme zôsôa môt wo fas mfaʼa ya yalan, vʼanyu bebo abé da sôé mbia bifia.

²⁹ Zambe a ne bebo abé ôyap, ve a wôʼô meyeʼelane bezôsôô be bôt.

³⁰ Asu e ne memuñ da ve mevak, a mbamba foé a ve ngule nyô.

³¹ Môt ase melo mé ma vôʼôlô melep ma kee môt ényiñ, a ye tabʼézezañe mimfefek.

³² Nyô ase a sase melep a biasé ényiñe jé, ve nyô a vôʼôlô melep a bi fek.

³³ Nkoone Zambe woñ wo yeʼele fek, a duma da tôñe nsuubane si mvus.