MINKANA 14 - Bible en langue Bulu

¹ E minga a dañe fek a lôñe nda bôte jé, vʼakute minga da buʼu je a mo mé mebien.

² Nyô a wulu e zôsôô été a ko Zambe woñ, ve nyô a wulu mezen me nʼékotekot a biasé Zambe.

³ Anyu nsusuʼu môt e bili ôlé asu mebune mé, ve biyaé mimfefeʼe mi bôt bia ye kamane mie.

⁴ Eyoñe beyôm benyak be ntoo momo, éwolo ba di été é nʼékôkoé, abime ngule nyaʼa é bili, nde da ve abui akum.

⁵ Ngaa a ne zôsôô a ne teke laa minsos. Vʼékotekote ngaa ja kobô meduʼan.

⁶ Nkpweʼele bôt a jeñe fek, ve teke yene je, ve ñyemane mam ô ne tyiʼibi e be nyô a nʼatyeñ.

⁷ Tebeʼe nsusuʼu ôyap, amu ô nji yene ñyemane mam e biyaé bié.

⁸ Feʼe ya môt a ne ntyee é ne na a wôk ane zene jé é né. Ve mvô é ne jôme mekut a bôt be ne te fek.

⁹ Mekuk ma bisaé metunaʼa ya mmeman abé , ve bôt be ne zôsôô ba yene mvam .

¹⁰ Nlem môt étam ñwô wo yem ôlun ô bili, a môte mfe a se nguleya kabane mevaʼa mé.

¹¹ Nda bebo abé ja ye tyamban, ve nda bôt be ne zôsôô ja ye ke kʼôsu.

¹² Môt a ne yene zen éziñe mvaé atataʼa, vʼasuʼulan yʼété é nʼawu.

¹³ Nlem ô ne tat e vioé été, wôna amané mevak me ne suʼulan ôlun.

¹⁴ Môt a kobeya zen a ye jaé a mbia mimboon mié émien, ve mbamba môte ki a mbamba mimboone mié.

¹⁵ Môt a ne te yeme fas a buni jam ese ba jô, ve ntyele môt wo yemelane mendaa mebo mé.

¹⁶ Mfefeʼe môt wo ko abé woñ ve saʼale de, vʼakute môt da dumban njalan a ndi nleme éziñ.

¹⁷ Nyô a jiʼa yaa a bo mbia be mam, nyô a bili mefeʼe me mvô a bo émien mbia jôm.

¹⁸ Bôt be ne te yeme fas be bili mboon akut ane maʼan, ve ba ba yeme yen ôyap ñyemane mam ô ne maʼane map.

¹⁹ Mbia be bôt ba ye silibane si e mise me mbamba be bôt, avale te fe bebo abé ba ye bo e mimbé bezôsôô be bôt.

²⁰ Jaʼane môt a too nzôzoé bebé a vini wô, Ve nkukum ô bili bemvôé abui!

²¹ Nyô a biasé môte mbok a bo abé , ve nyô a ko bingôngole bi bôt éngôngo a bili ébotan.

²² Ye ba ba bôndé mefeʼe ya bo abé be nji kop? Ve ba ba bôndé feʼe ya bo mvaé, bebela a nyeʼan bi ne be be.

²³ Esaé ése é bili mfi, ve zezé nkobô ja suʼulane soo zaé;

²⁴ maʼane mimfefek me ne akume dap, vʼakute mboone mekut e ne akute dap.

²⁵ Ngaa a kobô bebela a nyii minsisim, ve nyô a vebe minsos, ékotekot é bili nye.

²⁶ Môt a ko Zambe woñ a bili ngule ndi nlem , a e bone bé be bili vôme ya sobô e fefele jé.

²⁷ Nkoone Zambe woñ ô nʼanjeñ yʼényiñ mfaʼa ya saʼale melam yʼawu.

²⁸ Eyoñ bôt be nʼabui nalé a ve njô bôte duma; vʼéyoñe tañe bôt ja sise si njô bôt a ye kui azoé.

²⁹ Nyô a nʼôteʼeteʼe ya yaa a bili abui atyeñ, ve nyô a nʼavôle ya yaa a kulan asuʼu dé.

³⁰ Nlem ô ne njeʼebane si ô nʼényiñe ya nyôle môt, vʼéviele é ne ôkon wo di bives;

³¹ nyô a fite nzôzoé a biasé nté wé; ve nyô a mvaman éngôngole môt a semene je.

³² Mbia mefeʼe mé mebien ma ye kpwéʼe mbo abé si, ve zôsôa môt a yene vôme ya sobô jaʼane awu dé été.

³³ Fek é bôô e nleme ntyetyeñe môt été, Ve ézezañe mekut ye ba ye foʼo yeme je?

³⁴ Zôsôô a lôñ ayoñe bôt, vʼabé da ve meyoñ me bôt ôson.

³⁵ Mbo ésaé a ne fek a yene mvam be njô bôt, vʼayaa njô bôt da ye bo asu ba ba bo mam me nʼôson.