MINKANA 13 - Bible en langue Bulu

¹ Mfefeʼe mon wo wôʼô ñyeʼelan ésaa, ve môt ane mbia anyu a ne te kañese melep .

² Mbamba be bôt ba ye nyoñe maʼane ya nkobô wop, ve jam bekoñe bôt ba yene mvaé e ne mboon évô.

³ Nyô a kale anyu dé a nyii ényiñ jé, ve nyô a kui biyaé bié ne ngeññ, a mate mbile ya jañele émien.

⁴ Nleme nleles ô bili minkômban émien a se nguleya jalé; ve nleme ya bôt ba saé abui wo ye buʼuban.

⁵ Zôsôa môt a vini minsos, ve mbia môt a ve émien ôson a ôsame.

⁶ Zôsôô a kale nyô zene jé é ne mvoʼé , ve abé ki da dume mbo mam e si.

⁷ Bôt abui ba duʼu bebiene na be ne kum, ve te bi jôm. Befe ba simesane na be nʼazoé, ve ba bi akum abui.

⁸ Nkukum wo yiane belane moné wé na a kaman ényiñe jé, ve teke môt a ko nzôzoé woñ.

⁹ Bezôsôô be bôt be ne anʼéfufup ja faé abui, ve bebo abé be ne ane lambe a dim.

¹⁰ Bôt ba ben e môt ase a ne mebun, ve ba ba kañese melep ba liti na be ne fek.

¹¹ Akume môt a bi mbia mbian da nyolan, ve di môt a kôan ôteʼetek da tabe a bo abui.

¹² Ndi nlem ba buk ja bo nleme na ô kon, ve nkômban wo tôéban ô ne élé ja ve ényiñ.

¹³ Nyô a biasé meleb a ne njañan, ve nyô a baʼale abendé a ye nyoñe maʼan.

¹⁴ Nyeʼelane mfefeʼe môt ô nʼanjeñe yʼényiñ, mfaʼa ya saʼale melam mʼawu.

¹⁵ Atyeñ ya wôʼô mam da soo ésemen, ve ba be nji be bo ya buni ba wulu e zene ja dutu njañan.

¹⁶ Môt ase a ne fek a taté fas te na a bo jam éziñ, vʼakut da liti asuʼu dé éngengeñ.

¹⁷ Nkatefoé a ne mbo abé a ku njuʼu été, ve nkatefoé a ne zôsôô a soo mvoʼé .

¹⁸ Nyô ase a bene nyeʼelan, azoé a ébiasé bia ye tôbane nye, ve ba ye seʼe nyô a semé melep .

¹⁹ Nkômban wo tôéban wo soo mvoʼé e nlem , ve mekut ma yene nsaʼalan abé mbia jôm.

²⁰ Nyô a wulu a mimfefek a ye bo fek, ve nyô a wulu a mekut a ye tôban abé .

²¹ Njuk wo tôñe bebo abé , vʼébotan é ne maʼane bezôsôô be bôt.

²² Mbamba môt a kalane bendaé élik, vʼakume mbo abé e ne maʼan asu zôsôa môt.

²³ Afub e ne nlian asu bingôngole bi bôt, da kuli abui bidi, ve môt éziñ a jañ amu ékotekote ntyiʼane mejô.

²⁴ Nyô a nji kômbô belane nkasa, a vini mone wé, ve nyô a belane wô, a kômbô telé nye e mbamba zen .

²⁵ Zôsôa môt a di akekui zaé jé ja man, vʼabume bebo abé da wôʼô zaé éyoñ ése.