MINKANA 11 - Bible en langue Bulu

¹ Ekotekote kop é ne mbia jôme be Zambe, vʼatyi kop e ne zôsôô a yene de mvaé.

² Ebiasé ja so éyoñe mebune me né, ve bôte ba suu bebiene si baa be fek be ne nsamba wua.

³ Mvoʼé ya bezôsôô be bôt ja liti be zen , vʼékotekote ya bejoñôlô bôt ja ye jiane be.

⁴ Abui akum e ne te volô jôm e môs ayaa, ve zôsôa mboon a nyii môt awu.

⁵ Zôsôô ya môt a ne nya mvoʼé a bo zene jé zôsôô , vʼabé mbia môt da kpwéé nye.

⁶ Zôsôô ya mbamba be bôt a nyii be, ve bekoñe bôt ba bili ôlam amu ôzañe wobe ya kômbô bo abé .

⁷ Eyoñe mbia môt a wu, baa ndi nleme jé ba wu éyoñe jia a ngul a too a buniʼi ja jañ;

⁸ zôsôa môt a ye nyiiban ôlune wé été ve mbia môt a ye nyoñ éto ôlune jé;

⁹ mbia môt a kômbô jiane môte mbo ke a mejô yʼanyu dé, ve feʼe ya bezôsôô be bôt ja nyii be.

¹⁰ Eyoñe mbamba be bôt be bili mvom, tison ése ja fôn, éyoñe mbia be bôt ba wu, bôt ba bete metyiñe mevak.

¹¹ Ebotane bezôsôô be bôt ja bete tisone yôp; ve nkobô wo so anyu bebo abé wo kpwé tison.

¹² Nyô a biasé môte mbok a nji bi fek, ve môt a yeme wôʼô mam a tabʼévô.

¹³ Nyô a miase mfuk a kulane minsolan mi mam, ve nyô a bili nsisime nyeʼan a solé mie.

¹⁴ Eyoñe mbamba miñyeʼelan mi ne momo ayoñ da ku; ve nyian wo so éyoñ abui beve melep be né.

¹⁵ Nyô a kañese yaʼane mvôla nneñ a ye jô bane jame te ve nyô a saʼale kaʼa émiene mimbeʼe a ye tabe te jam da tyelé nye nleme yôp.

¹⁶ Minga a nʼabeñ a bili abui duma, a e bôt be nʼévô ba nyoñ abui akum.

¹⁷ Môt a ne akap a bo nsisime wé mvaé; ve njenjet wo ndeñele minsône mié émien;

¹⁸ mbo abé a bi maʼan ma duʼu nye ve môt a bé zôsôô a bili benya maʼan.

¹⁹ Ajô te zôsôô a soo ényiñ, ve nyô a tôñ abé a ye suʼulan awu.

²⁰ Bôt be bili minlem mi nʼékotekot be ne mbia jôme be Zambe. Ve mvame jé é ne asu ba mezene map me ne mfuban .

²¹ Bebela a ne na mbia môt a se nguleya bo te tôbane melep; ve mvoñe bezôsôô be bôt ja ye nyiiban.

²² Eyoñe ntui ngôé ô beʼe élondo jame te da funane minga a nʼabeñ ve feʼe momo be nye.

²³ Jame bezôsôô be bôt ba kômbô e ne na mvoʼé; ve jame bebo abé be ne tabe de ndi e ne na ayaa,

²⁴ môt a kab akume dé a ye dañe bo kum; ve nyô a dañe bo ôkôlôt a bo ve wulan.

²⁵ Nyô a miase bibotan a ye bi biôm ne zuk; a nyô a volô bôt ba ye fe volô nye.

²⁶ Nyô a bene kuane nlisi, bôt ba yoʼé nye, ve bibotan bi ne e nlô ya môt a kuane nye.

²⁷ Nge minsôñane miôé mi ne mvoʼé ba ye semé wo ve môt a jeñ abé , abé da ye kui be nye.

²⁸ Nyô a tabe akume dé ndi a ye ku, ve bezôsôô be bôt ba ye yaé ane akaé.

²⁹ Nyô a ndeñe mfuk e nda bôte jé été a ye nyoñ évuñulu ane ngap, a akute môt da ye bo ôlo ya môt a bili nlem ô ne fek.

³⁰ Ebuma ya môt a ne zôsôô é ne élé ja ve ényiñ a mfefeʼe môt wo dutu minlem mi bôt.

³¹ Nge mbamba môt a nyoñe maʼane mé e si nyô, kô fé mbia môt a mbo abé !