MINKANA 10 - Bible en langue Bulu

Minkana mia yeʼele ntaban yʼényiñ

¹ Minkana mi Solômon. Mfefeʼe mon wo ve ésaa wé mevak ve mon a ne te fek a ve nyia wé ôlune nlem .

² Akum da so mbia mezen e ne teke mfi ve zôsôa mboone mam a nyii mfaʼa yʼawu.

³ Zambe a ne teke jôʼé mbamba môte na a wu zaé, ve a vini mbia ndiane bebo abé .

⁴ Nyô a nʼéles mboon ésaé azoé da ye kui be nye, ve bôt ba saé abui ba ye bo minkukum.

⁵ Môt a kôane bidi a ésep a ne mfefeʼe mon, ve nyô a ke ôyo éyoñe ya nkôane bidi a ne mon a ve bebiaé ôsone nyô.

⁶ Mbamba môt a nyoñe bibotan, ve mejô ma so anyu mbo abé me ne njalan a nsisime yʼévô.

⁷ Nsimesane ba simesane mbamba môt ô nʼébotan, ve ba jiʼa vuane mbo abé .

⁸ Môt a bili nlem ô ne nteʼan a kañese melep ve nyô biyaé bié bia kobô nkobô akut a ke mbile ya jañele émien.

⁹ Môt a saʼale mvô a ye wulu teke tyelé nleme yôp, ve nyô a wulu mezen me nʼékotekot ba ye bôôé nye kayale.

¹⁰ Nyô a solé bôte bevoʼo bebela a bo be na be tôbane njuk; ve nyô a komekane be mfuban été a ve be mvoʼé .

¹¹ Mejô ma so anyu zôsôa môt me ne anjeñ ya ényiñ ve mejô ma so anyu mbo abé , ma solé nsisim évô.

¹² Ziñ ja dutu mintañete ve nyeʼan wo buti minkobane mise;

¹³ fek é ne biyaé bi ñyeme mame yôp, ve mvuse môt a ne feʼe momo ja yange ve nkasa.

¹⁴ Mimfefeʼe mi bôt mia jeñe ñyemane mam abim ese be ne nguleya bi, vʼéyoñ akut da kobô, nzametan a nji ke bo ôyap.

¹⁵ Mvoʼé ya minsôn ja baʼale nkukum vʼazoé da wôé éngôngole môt.

¹⁶ Maʼane ya mbamba mboon me nʼényiñ vʼabé da tindi ve na môt a bulu bulu bo abé;

¹⁷ môt ase a bo mewôk éyoñ ba lebe nye a ye nyiñ, ve nyô a ne te kañese mekua, njuk wo yange nye.

¹⁸ Nyô a solé ziñ a beʼe biyaé bi nʼékotekot, a nyô a miase njoñ a ne te fek.

¹⁹ Abui nkobô da dutu mboon abé , ve nyô a bi biyaé bié ngbwak a ne nyô a yeme simesan.

²⁰ Ôyeme mbamba môt ô ne argent a ne ntoban, a nleme bebo abé ô nji dañe bi kop.

²¹ Biyaé bi mbamba môt bia liti abui bôte zen , ve mekute me bôt ma wu amu feʼe momo.

²² Ebotane Zambe nje ja ve môte kum, a a nji beté ôlun éziñ été yôp.

²³ Akute môt da yene mbia mboon ane bivôé avale môt a yeme fas a yene fek.

²⁴ Jame mbia môt a ko woñ nde da kui be nye, a e jame mbamba be bôt ba kômbô Zambe a ve be de.

²⁵ Eyoñ ôlendé a lôt a wundi mbo abé , ve zôsôô môt a too jôm teke nye bo.

²⁶ Avale woon a ne sañ a bo mesôñ a ôtita wo bo mis, avale te nleles ô né e be ba ba lôme wô.

²⁷ Nkoone Zambe woñ wo limiti môt melu mʼényiñ, ve mimbu bebo abé mia tyiʼi étun.

²⁸ Ndi nleme mbamba be bôt ja suʼulane mevak, ve nyô bebo abé ja ye suʼulane momo.

²⁹ Zambe a kamane bôt be ne zôsôô , ve a jiane bebo abé .

³⁰ Zôsôa môt a ye bo te fôʼôsane môs éziñ, ve bebo abé ba ye bo te tabe si nyô.

³¹ Anyu zôsôa môt da kuli nkobô fek, vʼékotekot ôyem ja ye tyiʼiban.

³² Biyaé bi zôsôa môt bia yem avale jam bi ne ngule ya jô, vʼanyu mbia be bôt da kobô ve mam ma balan.