MINKANA 1 - Bible en langue Bulu

Kalate minkana amu jé?

¹ Minkana mi Solômon, e mone David, njô bôte ya Israél,

² mfaʼa ya ve fek a mbamba ñyeʼelan mfaʼa ya volô ñwôʼane ya zôsôô ntyiʼane mejô a bili ôsimesan ô nʼédok a mvaé

³ mfaʼa ya yeʼele ane môt a ne nyiñ atyeñ, ane a ne bo zôsôô mfaʼa ya ntaban, ntyiʼane mejô a mbaʼalane metiñ.

⁴ Mfaʼa ya ve bôt be ngenane te yem ényiñ ntye a ve ésoé ndôman ñyeman a nsisime ya yeme fas.

⁵ mfefeʼe môt wo ye vôʼôlô a kôʼôlane ñyemane wé a ntyetyeñ wo ye bi ntabane ntye.

⁶ A mfaʼa ya yeme nkana a atinane yʼété, mejô mimfefeʼe beyeme mam a mesoé me ba.

⁷ Nkoone Zambe woñ ñwô ô ne tin ya ñyemane mam. Ve mekute me bôt ma biasé fek a ñyeʼelan.

Melep asu bisoé bendôman

⁸ A mone wom, vôʼôlôʼô meleb mʼésoo a te wua ñyeʼelane nyua fé.

⁹ Amu bia ye bo nyanga ébôbot e nlô wôé, a minsanga asu tyiñe jôé.

¹⁰ A mone wom, nge bebo abé ba kômbô wone wo, te kañese.

¹¹ Nge ba jô na: Zaʼa bi ke, bi mombô asoé a kulu metyi zaʼane bi lame môt a ne te bijô melam te kʼétom,

¹² zaʼa bi mine be bevevee avale ane vôme ya miñwuan a bo, bi mine be mingum ane bôt ba sis ébé si.

¹³ Bia ye koone biôm bi nʼédima mevale mese, bia ye jalé menda mangan a biôme ya nsa.

¹⁴ Wo ye bi ngabe jôé bia be mia amu bia bese bia ye bi mfeʼe moné wua,

¹⁵ a mone wom, te ke e nsamba wop, saʼaleʼe telé mebo môé e mezene ba wulu.

¹⁶ Amu mebo mab ma mate mfaʼa ya bo abé , be nʼavôle ya kulu metyi.

¹⁷ E ne zezé ya yaa avot anon ese e lôô!

¹⁸ Ve be ba mombô ve metyi mabe mebien a ba kômbô jian ve binyiñe biabe bibien.

¹⁹ Nalé ate ényiñe ya bôt ba wôlé bôte biôm ja suʼulan wo nyoñ ényiñe ya bôt be bili wô.

Fek ja bete tyiñ

²⁰ Fek ja ke ja yôtan e minjoñ minjoñ, ja bete tyiñ e mevôm me ne ndam.

²¹ Ja loon e vôme minjoñ mi ne zôʼé abui, ja kobô e mame mé anyiine ya mimbé a e tison été!

²² A mia mekut mia ye nyeʼe mboon akut a kui éyoñ évé? A bekpweʼele bôt ba ye yene mvaé ya kpweʼele bôt a kui éyoñ évé? Nalé fe bôte ya te fek ba ye vini ñyemane mam a kui éyoñ évé?

²³ Nge mia kôñelan a wôʼô melebe mam, éyoñe te ma ye sôé mia nsisime wom, ma ye bo mia na mi yeme mejô mam.

²⁴ Vʼamu na me nga loon, mi ve bo ntip, me nga same wo wom, teke môt a kee dis,

²⁵ amu mi nga bene melebe mam mese a mi nji ke kañese bijô biam,

²⁶ ma fe ma ye woé éyoñ mia ye tebe njuʼu été, ma ye bo teke bisi éyoñe beta woñ a ye kui be mia,

²⁷ éyoñe beta woñ a ye zu be mia ane nkulu, éyoñe bidim bia ye zu be mia ane ôlende, éyoñe biyebe a ôlun bia ye zu be mia

²⁸ ba ye loone ma ve ma ye bo te yalan, ba ye jeñe ma ve ba ye bo te yene ma.

²⁹ Amu be nga vini ñyemane mam a bo teke tobe e nkoone Nti woñ.

³⁰ Amu be nji ke kômbô melebe mam a vini mveane bijô wom;

³¹ ajô te ba ye di ébuma ya mboone wop a mebum ma ye kui be nlem a mefeʼe mabe mebien,

³² amu ñyalane fé ya mekut ô wôéya be a ntabane njeme ya bôt be ne feʼe momo wo ye jiane be.

³³ Ve nyô ase a vôʼôlô ma a ye tabe nda jé jôme teke bo nye.