MIKÉ 7 - Bible en langue Bulu

Nkulu mejô Miké a Yôn

¹ Ngoʼo ma! Me ntoo ane bekôane bidi ya ésep, ane mekoloʼo bibuma bi ndik, éyoñe nya nkolane bibuma a maneya. Ve tekʼésañe ya di, teke ébuma jia ya bi bia jiʼa tôlôbô bite, mbie ma dañe nyeʼe!

² Môt a nyeʼe Zambe a ne momo e si nyô éyoñe ji, zôsôa môt a jemban e bôt été. Bese be nʼasoé asu ya kuli metyi; môt ase a titane monyañ a avot.

³ Ba belane mo map asu ya bo abé , mvaé njô bôt a bo é ne éyoñ a yemete minkômbane mié, ntyiʼi mejô a sili tañe fe abet, beta môt a kobô asu ya volô ôzañ moné wé.

⁴ Nyô a dañe mbamba môt e be be a ne avalʼane nsinik, zôsôa môt a dañ abé ki ane nkaʼalé biyo. E môs wo zu nyoñe melep ô kpwaneya! Bemombô bôé, bekulu mejô be nga kate foé ajô môs ôte, éyoñe ji bese be ne feʼe ne vema.

⁵ Te bunane wua ya bôt be too mia bebé, nge tabe ndi a mvôé éziñ. Ôsu ya minga a bôô wo mebo, tabeʼe ntyel a mejô ma so wo anyu.

⁶ Amu monafam a taa ésaa wé, monaminga a sengane nyia wé mbom ki wo sengane ntyi. Besiñ be môt be ne bôte ya nda jé émien.

⁷ Ve ma ma kôñelan mfaʼa Nti a né, me too ndi e be Zambe a nyii ma; e Zambe wom a ye wôʼô ma.

Ndi nlem a meyeʼelan

⁸ A nsiñe wom, te vak amu ajô dam! Amu nge ma ku, me beta fe tebe tetele. Nge me too e dibi été, Nti a nʼéfufube jam.

⁹ Ma ye jibi ayaa Nti amu me nga bo nye abé , akekui a ye suñ ajô dam a tyiʼi ma ajô zôsôô . A ye zuu ma vôm éfufub é né, a ma ye nyeʼe me yenek zôsôô wé.

¹⁰ Nsiñe minga wom a ye yene jame te, ôson wo ye jaé nye nyô. A mbe a siliʼi na: Nti, e Zambe wôé, a ne vé? Mise mam ma ye fombô ve nye; éyoñe ji ba tibi nye mebo si ane mbotoʼo ya zene yôp.

¹¹ E môs ba ye beta lôñe mimfine miôé, môs ôte ba ye sulu minné miôé.

¹² Môs ôte bôt ba ye zu be wo be soʼo Asiri a bitisone yʼEjipte, ataté Ejipte a kui ôsôé, ataté mañ ma a kui ma mevok, ataté nkôle wu a kui wu ôvok

¹³ si ja ye bo bilik amu bôt be too été, amu ébuma ya mimboone miap.

¹⁴ Vaʼa bôte bôé bidi a ntume wôé, mbame biyem ô ne ngabe jôé ñwô ô too étam afan été ézezañe Karmel! Be jaʼak e Basañ a e Galad avalʼane melu mvus.

¹⁵ Avalʼane melu ô nga kôlô si yʼEjipte, ma ye liti nye bitua bi mam.

¹⁶ Meyoñ me bôt ma ye yene de a bo feʼe ne vema, akôsa bo ngule jap ése; ma ye buti wo anyu, melo map ma ye bo ndok.

¹⁷ Ba ye nyiane mbuluk ane nyo, ane betite ya si ba nyiʼitan; ba ye vame mesoé map a woñ ôse, a zu be Nti, e Zambe wongan; ba ye ko woñ, ba ye ko wo woñ;

¹⁸ Za a ne Zambe ane wo, nyô a jamé ékop a lôte mbia mboon amu a kamane mebukaʼa ya ngabe jôé? A ne te baʼale ayaa nnôm éto, amu a nyeʼe mvam.

¹⁹ A ye fe ko bia éngôngo, a ye futi bikobe biangan e mebo mangane si; wo ye wua abé dap édoʼo mañ été,

²⁰ wo ye liti Yakob nyeʼane wôé ô ne te tyendé, a wo ye liti Abraham mvam aval ô nga kane bʼésaa bangan ngana melu mvus.