MIKÉ 6 - Bible en langue Bulu

Nti a bili ajô a bôte bé

¹ Vôʼôlaʼan e jame Nti a jô! A bendé me na me suñ ajô dé, me kate de tyiñe yôp. E vôme beta minkô a bone minkô be né.

² Vôʼôlaʼan ajô Nti a bili a mia minkô! A mia mimbôkaʼa mi si mi ne te tyendé, ajô Nti a bili a e bôte bé nde di! A bo nkat ajô ba Israél.

³ A bôte bam, me nga bo mia jé? Me nga ve mia ateʼe nyôle vé? Yalaʼane ma!

⁴ Ye nsoone me nga soo mia Ejipte? Ye nkôtan me nga kôté mia nda belo? Ye nlôman me nga lôme mia belitizen: Môze, Aron a Miriam?

⁵ A bôte bam mi simesaʼane ñhe e jame Balak, njô bôte ya Môab a nga bôndé, éyalane Balam e mone Béor a nga yalan.

⁶ Ma ye tebe asu Nti me bili jé mo? Ye vitibi ôsu Zambe a ne yôb été nga? Ye ma ye tebe asu dé me bili mimvean mia diʼibane ngumba? Me bili bitoñ benyak bi ne mbu wua?

⁷ Ye Nti a yi betoyini beyôm mintômba? Bizuʼu bi atôñe mbon? Ye ma ye ve ntôle monafame wom asu maʼane ya mbia nlô wom? Mone ya minsône miam asu abé dame mamien?

⁸ A môt, be litiya wo Jam e ne mvaé, jame Nti a sili wo e ne ve na: Nsemane nya ntyiʼane mejôô, nyeʼane ya bo mvaé, a ntôñane zene Zambe wôé a liti wo.

Yérusalém a nyoñe melep amu ékotekote ntyiʼane mejô e zañe bôt

⁹ Tyiñe Nti ja loone tison, a ye nyii ba ba ko jôé dé woñ. Vôʼôlaʼan, a ayoñ a ékôane bôte ya tison,

¹⁰ ye me ne nguleya jibi mame ma: nda abé, akum é ne mvin, ôvek ô nʼések a biyoʼé?

¹¹ Ye me ne jamé: asu minlôt mi nʼékotekot, a nkuta be maneya vaa bekili?

¹² E tisone minkukum yʼété mi ntoo njalan a mboone nkpwala , a e bôt be too été ba kobô nkobô mekut e menyu mab été, ôyeme viap ô ne ve meduʼan.

¹³ Ajô te me nga bo wo na ô kon, amu mbane ya bôme wo, amu mbane ya sa biôme biôé, nalé a too vʼamu abé dôé.

¹⁴ Wo wo ye di ve te nguleya jaé. Mfumbale zaé a ye kôm éto be wo. Wo ye naane biôme fefe, ve te nguleya baʼale bie; jôme wo ye baʼale, Nkpwaté mekôn wo ye bi je.

¹⁵ Wo ye bé bidi, ve teke kôane bie. Wo ye bu bikañ, ve teke wobane mbon, wo ye miate bibuma bi ndik ve teke nyu woon.

¹⁶ Wo baʼale memvinda me Omri, a mimboon mise nda Akab é nga bo. Mia wulu e mefeʼe mab été, ajô te ma ye bo wo ne sangaññ. Mia bôt mi too Yérusalém, mia ye bo éwovioé, a ôson wo ye bi bôte bam bese, wo ye fe bi Yérusalém.