MIKÉ 5 - Bible en langue Bulu

Bétléhém, tisone njô bôt a ne nyii bôt

¹ Mfaʼa wôé, a Bétléhém Efrata, wo ô ne tyôtyoé ézezañe betoyini ya Yuda été, nyô a ye bo njôô Israél a ye so be wo asu dam. Tine jé ja so ôyabe mvus, e melu ya nnôm éto.

² Ajô te Nti a ye liʼi bôte bé, nté a yange na minga a yiane biaé a biaé monafam, éyoñe te mebukaʼa bobenyañ ma ye beta zu be bone bʼIsraél.

³ A ye tebe a ve be bidi a ngule Nti, a éjijine ya jôé Nti, e Zambe wé; a ba ye bi étabaʼa ya buni éyoñ ése. Amu ataté éyoñe ji, a wum a kui mekuʼu ya si nyô.

⁴ Nye a soo mvoʼé ! Eyoñ Beasirieñ ba ye zu e si jangan, a nyiine menda bejô bôte mangan, bia ye telé nye bebaʼale mintômba zamgbwa, a bivete yʼayoñ muam e ngame yat.

⁵ Ba ye jôô si yʼAsiri a nkpwaté mekôn, a sii Nimrôd e mimbé mié été. Nalé a ye kôté bia be mon Asirieñ, éyoñ a ye zu e si jangan, a éyoñ a ye nyiin éfuse si jangan.

Mebukaʼa yʼIsraél e meyoñ été

⁶ Mebukaʼa me Yakob ma ye bo e zañe jama meyoñ ane mfô mendim a so be Nti, ane mendim me ne bilok, nge timbi e be bôt.

⁷ Mebukaʼa me Yakob ma ye bo e zañe meyoñ , e jama meyoñ me bôt été, ane ngbwengbwem ézezañe betite ya fé, ane étoñe ngbwengbwem e mbam mintômba a bikela été; éyoñ ja lôt, ja tibi a nyap, a teke môt a nyii.

⁸ E wo wôé ô betebaʼane be besiñe bôé, a besiñe bôé be ntoo ve wôéban!

Nti a ye tyame biôm Israél a buni

⁹ Môs wo zu, nalé Nti a jô, ma ye vaa bikabela biôé ézezañe jôé;

¹⁰ ma ye vaa bitisone ya si jôé; a ma ye tyam aleme dôé;

¹¹ ma ye vaa mam me ngbwee e mo môé; a wo ye bo te beta bi bebo majik;

¹² ma ye vaa bengunemelan a bengunemelan be ne kpwelan ézezañe jôé; a wo ye bo te beta kute meboñe si ôsu ya biôm ô nga bo a mo môé;

¹³ ma ye findi mekôn mʼakéra môé ézezañe jôé, a ma ye tyame bitisone biôé.

¹⁴ Ma ye liti akunaʼa dam, ayoʼo été a ayaa été, e be meyoñ me nga bo te wôʼô ma.