MIKÉ 4 - Bible en langue Bulu

¹ A ye bo amané ya biyoñe na: Nkôle ya Nda Nti, wo ye tebe abôbône minkô, a wo ye betebane yôp a dañe minkôle mivok a meyoñ me bôt ma ye tinekane ke wé.

² Meyoñ ya si nyô ma ye ke wé abui abui a jô na: Zaʼane bi bet nkôle Nti, Nda Zambe Yakob, nalé ate a ye yeʼele bia mezene mé, a éyoñe te bia ye wulu mezen a liti bia. Amu nne metiñ ma so Sioñ, a nne ajô Nti da so Yérusalém.

³ A ye bo ntyiʼi mejô e zañ ézuʼu meyoñ me bôt, a Ntyiʼi mejô ya biwôlô meyoñ me nʼôyap; a ye lui beta bibak a minkpwaté mekône miap, a lui fe atyeñ ya sebe bilé a mekoñe map; ayoñ da ye bo te bete nkpwaté mekôn a wosan ayoñ avok, a bôt ba ye bo te beta yéʼé mewosan.

⁴ Môt ase a ye tabe afube mindiʼi dé si, a e figié wé si, a teke môt a ye ndeñele be; amu anyu Nti ya minsamba mewosan e kobeya.

⁵ Eyoñe meyoñ me bôt ma wulu, ayoñ ese a jôé e zambe wé, bia bia wulu a jôé Nti, e Zambe wongan, nnôm éto a nnôm éto.

Nti, njô bôte ya Yérusalém

⁶ Môs wo zu, nalé Nti a jô, ma ye nyoñe nyô a feñke, ma ye bulane soo nyô be nga titan, nyô me nga bo abé .

⁷ Ma ye bo mebukaʼa me soʼok e be nyô a feñke. Ma ye bo ayoñe bôt e ne ngu e soʼok e be nyô me nga telé fefe; a Nti a ye bo njô bôte wop e nkôle sioñe yôp, ataté éyoñe te a kui nnôm éto.

⁸ A wo, nkôle Yérusalém, wo wo fombô bôt ane ôzomezome nda bemombô, anaʼana, wo ye beta bi ngul éjôé jôé, avalʼane melu mvus. Yérusalém a ye beta bo nlô tisone ya Yuda.

Meveʼele a nkôtane Yérusalém

⁹ Amu jé wo yône tyiñe yôp éyoñe ji? Ye njô bôt a nji bo be wo? Mintaé mia bi wo aya ane minga a kôʼôlô mie? Yʼamu mbôndé mefeʼe wôé a wuya?

¹⁰ A ngone Sioñ wôʼô mintaé a tat ane minga a kôʼôlô mie: Amu wo ye kui e tison atan éyoñe ji, a wo ye bo étabaʼa jôé e mefup, wo ye ke a kui Babilôn, nne ñhe wo ye kôtébane wé, e mo be besiñe bôé.

¹¹ Eyoñe ji jama meyoñ me bôt a sulaneya a wosane wo; a jô na: A ne e mvin été, mise mangan me lôô Sioñ!

¹² Ve jama meyoñ ate a ne teke yem asimesane Nti, a ne teke yeme mintyiʼane mié, a ne teke yeme na a maneya sulane nye ane mimbom mi ne nkaʼan afup été.

¹³ Kôlôʼô si, a ngone Sioñ ô tibi mefese me mvoñ! Ma ye kôme wo nlaʼa étyé, a ma ye kôme wo biboʼos bi mvot, wo ye koʼo jama meyoñ me bôt, mefoʼo map, wo ye ve me Nti, akume dap, wo ye ve de Nti ya si ése.

¹⁴ A ngone minsamba mewosan éyoñe ji sulaʼane minsamba miôé! Be diliya bia a bita; ba bibi ntyiʼi mejô yʼIsraél amañ a nkasa.