MIKÉ 1 - Bible en langue Bulu

Nti a boʼolô e bôte bé

¹ Nkobô Nti ô nga kui be Miké, môte ya Morését, melu Yôtam, e ma me Akaz a ma me Ezékias, bejô bôte ya Yuda be nga too, nkobô te ô too ajô bitison: Samari a Yérusalém.

² Mia meyoñ mese vôʼôlaʼan! Keʼe alo a si, a jôm ése ô bili! Nti Emien a zu bo ngaa ya boʼolô wo, Nti, Nyô a so étabaʼa jé é nʼétyi!

³ Amu ô lôô Nti a so étabaʼa jé, a sis, a wulu e mevôme ya si nyô me nʼôyabe yôp.

⁴ Minkô mia nyemé e mebo mé si, mimbiʼili mia kandeban ane éko é ne fefele nduan, ane mendim ma lôt avô ayo nkô.

⁵ Jame te ese da boban amu mbia mboone Yakob, amu mam abé ya nda Israél! Mbia mboone Yakob a ne jé? Ye sa Samari, nlô tison Israél? Bito bikôndôʼô yôbe ya Yuda bi ne jé? Ye sa Yérusalém, nlô tison Yuda?

⁶ Ajô te Nti a jô na: Ma ye kôñelane Samari a bo avise mekok e nʼafan asu ya bé afube ndiʼi woon; ma ye sôʼôlô mekoʼo mé mbiʼili si, a ma ye bo mimbôkaʼa mié mi yené atan.

⁷ Bengunemelane bé bese ba ye buʼubane bifus, a memvaka a nga nyoñ ma ye diʼibane nduan, biveʼelaʼa bezambe bié, ma ye bo bie bifus, amu a nga kuse biôm bite bise a tañ ja so ébamba jé, a bia ye fe volô asu ya yaʼane bebo ébamba befe.

Nkulu mejô Miké a yôn

⁸ Ajô te, ma Miké, ma zu yi a yôn, ma zu wulu minsoé mebo a nyôle nsoé, ma zu yôn ane benyôk, a yi ane beéngutu.

⁹ Amu be se nguleya saé aveñe Samari, e ne anen a kui e Yuda. Ntyaman ô keya kui e Yérusalém émien, e tison ényiñe ya bôte bam é tii.

¹⁰ Te katane foé éte e tisone Gat, môt éziñ a boʼo te kuli miliʼi mis ne tya! E Bét-Léafra, ma bume mbuluʼu été.

¹¹ E minga a too Safir a lôtôk a too soé, nalé fe njalan a ôson e minga a too Sanan, a nji bo ayoʼo ya kui e tison atan. Minyôn mia so e tisone Bét-Essél, amu é nji ke fe bo mia asoé.

¹² E minga a too tisone Marôt a bili mvaé, ve nlem ô kumetaʼan, amu bidime Nti a lôm, bi kuiya e mimbé ya Yérusalém.

¹³ A mia bôt mi too Lakis, tiñetaʼan bevagoñ a bikabela bienan! Amu mi nga vu mbia mimboon mi Israél, a dutu Yérusalém na a bene njôane wom.

¹⁴ Ajô te mia ye kandane bôte be too tisone Morését-Gat, wôna tisone Akzib ki ja ye bo te volô bejô bôte ya ayoñ Israél.

¹⁵ A mia bôt mi too Maréka, Nti a ye kalane mia e mo me mfefé môt mfaʼa mewosan. Bivete ya Israél bi ne njalan a duma bia ye ke sobô mbas akoʼo Adulam.

¹⁶ Téane bisile bienan miabebien, sôtébaʼan mintui, a bôt be too Yérusalém! Nalé nlô wônan wo ye bi ayan ane nlô ndôé. Yônane bone benan mia dañe nyeʼe, amu ba ye kee be mekaban, ôyap a mia.