METIAS 9 - Bible en langue Bulu

Yésus a saé mbôbôk

¹ Eyoñ a dañeya éfunga été, Yésus a nga ke éfase kindiʼi fok a kui e tisone jé.

² Nde bôt be nga zu be nye be beʼe mbôbôk ô bôô énoñ; éyoñe Yésus a yeneya mbunane wop, a nga jô mbôbôʼô na: Bii ngule nlem , a mon, mam abé môé me ntoo njaman .

³ Nde beyeme bekalate bʼéziñ be nga jô e bebien été na: Nyôna a kobô nkobô ébiasé.

⁴ Eyoñe Yésus a yemeya asimesane dap nye be na: Amu jé mi bili mbia be asimesane minleme mienan été?

⁵ Jé ja dañe tyiʼibi, ye jô na: Mam abé môé me nto njaman ye na: Kôlôʼô si a wuluʼu?

⁶ Nalé ate mia ye yeme na mona môt a bili nguleya jamé mam abé e si nyô, nde ñhe a jô mbôbôʼô na: Kôlôʼô si, bekeʼe énoñe jôé a kelek e nda jôé.

⁷ Nde mbôbôʼô wo kôlô si a ke e nda jé.

⁸ Eyoñe minkunda mi bôt mi yeneya jame di, mi nga ko woñ a ve Zambe duma nyô a nga ve bôt avale ngule njôane di.

Yésus a loone Metias

⁹ Yésus a lôtôk, nde a yene môt jôé na Metias a too e vôme ba bo mam me toya , nde a loone nye a jô nye na: Tôñe ma. Ane Metias a nga kôlô si a tôñe nye.

¹⁰ A nga bo na, Yésus a jaʼa tebele e nda Metias, nde abui benyoñe toya a bebo abé be nga zu tabe ba be Yésus a beyéʼé bé.

¹¹ Ayene Befarizieñ be nga yene jame te, be nga jô beyéʼé bé na: Amu jé masa wônan ba be benyoñe toya a bebo abé ba di vôme wua?

¹² Ve Yésus, éyoñ a wôʼôya mejô mete, a nga jô na: Sa ñhe mimvômvoʼé mmie mia yi dokita , ve minkôkon.

¹³ Kelane ñhe yéʼé atinane ya bifia bina na: Ma yi nkoon éngôngo sa ke étyiʼa. Amu me nga zu loon, sa ke bezôsôô be bôt, ve bebo abé .

Ntyiane bidi, nnôm a mfefé éyé

¹⁴ Nde beyéʼé be Yôanes ba yene nye a sili nye na: Amu jé éyoñe bia a Befarizieñ bia tyi bidi, beyéʼé bôé be teke bie tyi?

¹⁵ Yésus a nga yalane be na: Ye bôte ba te loon abôʼô aluk be ne tabe ôlun awu été nté ba be nluʼu minga be ngenan? Ve melu ma zu, éyoñe ba ye vaa be nluʼu minga éyoñe te ba ye tyi bidi.

¹⁶ Teke môt a ne futi éfuse mfefé éyé e nnôme ngômesane yôp, amu abaka ba te futi da ye limiti ngômesan, a nyaban wo ye dañe bo abé .

¹⁷ Be nji futi mfefé woon e minnôme mendek; nalé momo wôna mendek ma bôlé a woon a nga kui, mendeʼe ki jôme ya wua fé. Ve ba futi mfefé woon e mimfefé mendek, nalé ate woon a mendek bia tabe.

Nkôkone minga ba mbime mona minga

¹⁸ A ngenan a kobôʼô nalé, nde nyamôtô éziñ a subu nye bebé ve kute meboñe si a jô nye na: Ngo jam é ne ñwuan awolo di; ve zaʼa beté nye wo wôna a ye nyiñ.

¹⁹ Nde Yésus a kôlô si ve tôñe môte nyô ba beyéʼé bé.

²⁰ Nde de ki e boya vana na minga éziñ a kone metyi mimbu mi ntoo awôm a mibaé, ve subu Yésus bebé mfaʼa ya mvus a nambe nye ñwôndé ngômesan.

²¹ A mbe a jôʼôk émiene na: Nge ma kui vôme ya nambe nye ve ngômesane jé, ma ye nyiñ.

²² Eyoñe Yésus a kôñelaneya a yene nye a nga jô nye na: Tabeʼe ndi, a ngo jam! Mbunane wôé ô nyiiya wo. A minga a nga bo mvoʼé ataté awolo te.

²³ Eyoñe Yésus a kuiya e ndaa nya môtô nyô, a yene beloñe mimfañ a mfôʼôsane nkunda bôt, nde a jô na:

²⁴ Kôlaʼan: a ngenane teke wu, mona minga a ne ôyo. Be nga kpweʼele nye.

²⁵ Eyoñe be maneya kuli nkunda bôt atan, nde a nyiin, ve bi mone wo mona minga ve vee.

²⁶ Nde foé ja zu mialan afôla te ese.

Mindindim mibaé

²⁷ Yésus a kelek, nde mindindim mibaé mia tôñe nye mvus mi yôtaʼane na: Koo bia éngôngo, a mone David!

²⁸ Eyoñ a nyiiya e nda été, mindindim mibaé mi nga subu mfaʼa a mbe, nde Yésus a jô be na: Ye mia buni na me ne nguleya bo jame te? Be na: Yaa, a Nti.

²⁹ Nde a nambe be mis a jôʼô na: E boʼo mia ane mbunane wônan ô né.

³⁰ Ane mise map me nga kuiban. Wôna Yésus a nga jô be a ayoʼo ese na: Tabaʼane ntyee! Môt éziñ a boʼo te yeme de!

³¹ Ve be, nné ane be nga kui atan, be taté ve na ba kobô ajô dé afôla te ese.

Yésus a saé mvumvuk

³² Be kuik atan, nde ba soo nye mvumvuk ô bili mbia nsisim .

³³ Eyoñe mbia nsisim a kôlôya, nde mvumvuk wo taté na wo kobô. Jama bôt a nga kame jame te a jôʼô na: Avale jame di e ngenane te tame yené Israél été.

³⁴ Befarizieñ be ke be nga viane jô na: Ke a vaa mimbia minsisim a ngule évete mimbia minsisim.

Bebo bisaé be ne tyôtyoé

³⁵ Yésus a nga ke a wulu e bitison bise a minlam mise, a yeʼeleʼe bôt e meba me Zambe map, a yôtaʼane Mbamba Foé yʼéjôé Zambe a saé aval ôkon ese a aval éyem ése.

³⁶ Ayene a nga yene jama bôt, nde a nga ko nye éngôngo, amu a mbe nteʼan a njuʼane nlem ane mintômba mi nji bi mbaʼale.

³⁷ Nde a jô beyéʼé bé na: Nkôane bidi ô ne abui, ve bebo bisaé tyôtyoé;

³⁸ yeʼelaʼane ñhe masa nkôane bidi na a lôme bebo bisaé e nkôane bidi wé.