METIAS 7 - Bible en langue Bulu

Tatéʼé vaa e mone jôm a ne wo dis

¹ Te tyiʼane bôte mejô, ndembene mia fe mia ye bo te tyiʼibane mejô;

² amu avale mia tyiʼi bôte mejô nde ba ye tyiʼi mia, a aval ôvek mia belane de nde ba ye belane de asu denan.

³ Amu jé wo fombô mone jôm a ne e dise monyoñ? Ve beta jôm a ne e dise dôé, wo te yene nye?

⁴ Nge na amu jé wo ke jô monyoñe na: Yangeʼe! Me vaa e mone jôme ya e dise dôé? Ve da ô lôô: beta jôm a ne wo dis!

⁵ A môta bebaduʼu, tatéʼé vaa beta jôme ya dise dôé, mvus éte wo ye yeme vaa e mone jôm a ne e dise monyoñ.

Te veane bemvu a bengôé mekoʼo menan me ne édima

⁶ Te veane bemvu jôm é nʼétyi; te wuane bengôé metabe menan, be za tibi me a mebo a na éyoñe be kôñelaneya éfase mi né be za nyabe mia.

Mi boʼo mi yeʼelaʼane ésoo wônan a ne yôp

⁷ Silaʼan, ba ye ve mia; jeñan, mia ye yen; kutane mbé ba ye dii mia wô.

⁸ Amu môt ase a sili a nyoñ, nyô a jeñ a yen, a ba dii nyô ase a kute mbé mbé.

⁹ Nge na, za ya be mia a ne bo na nge ndômane jé ja sili nye belet, a viane ve nye akok?

¹⁰ Nge na nge a sili kos, a viane ve nye nyo?

¹¹ Ajô te nge mia mi ne mbia be bôt, mia yeme ve bone benane mbamba be biôm, abim avé ésoo wônan ya yôp a ye ve bôte ba sili nye mbamba be mam.

Môte mbok ane womien

¹² Ajô te, mam mese mia yi na bôte be bo mia, miabebien boʼone me asu dap: Metiñ me Zambe a bekulu mejô mbie le.

Mezene mebaé

¹³ Nyiʼane mbé ô ne ôfanefan, mbé ô ne anen a e zene ja ke njañ é ne ndam, a ba ba tyii été be ne ézuk;

¹⁴ vʼaval ôfanefane mbé ô né a avale tyôtyoé zene ja kui ényiñ é né a ba ba yene je teke mfañ abui.

Aval élé, avale bibuma

¹⁵ Mi tabeʼe bekulu mejô be ne minsos ntyee, mbe ba zu be mia be beʼe mengômesan ane mintômba, ve minlem été be ne beze ba bi bôt.

¹⁶ Mia ye yemelane be a bibuma biap. Ye ba kolé bibuma bi woon ésaé biyo, nge bibuma bi figié akoñ ngbwele?

¹⁷ Nalé a ne na mbamba élé ase a wume mbamba bibuma, ve mbia élé ase ki a wume mbia bibuma.

¹⁸ Mbamba élé a se nguleya beʼe mbia bibuma nge mbia élé ki beʼe mbamba bibuma.

¹⁹ Elé ése é nji wume mbamba bibuma, ba ye baʼé je a wua je e nduan.

²⁰ Ajô te ñhe mia ye yemelane be a bibuma biap.

Sake ve na: A Nti, a Nti!

²¹ Sake môt ase a jô me na: A Nti, a Nti, a ye nyiin éjôé ya yôp, ve nyô a bo nkômban ésaa wom a ne yôp.

²² Ezuʼu bôt ja ye jô ma môs ôte na: A Nti, a Nti! Ngaa bi nga kulu mejô a jôé dôé? Ngaa bi nga titane mbia minsisim a jôé dôé? Ngaa bi nga bo bitua bi mam a jôé dôé?

²³ Wôna ma ye jô be na: Me nji tame yeme mia; kôlaʼan ma mis, mia mia bo mbia be mam!

Nda ya akôme yôp

²⁴ Ajô te môt ase a wôʼô mejô me ndôme mane jô a bo me, be ne funane nye mfefeʼe môt ñwô ô nga lôñe nda jé akôme yôp.

²⁵ Mveñ é nga noñ, ndulu mendim a nga so, bivuñulu bi nga vuñ; bi nga jimbi nda éte ve é nji ke ku amu mbôkaʼa wé ô mbe akôme yôp.

²⁶ A môt ase a wôʼô mejô me ndôme jô ve te bo me, be ne funane nye akute môt nde é nga lôñe nda jé e nseleʼe yôp.

²⁷ Mveñ é nga noñ ndulu mendim a nga so, bivuñulu bi nga vuñ; bi nga zu jimbi nda éte, nde é nga ku si, a ntyambane wé ô mbe anen.

Yésus a ne njôô

²⁸ Nde da zu kui na éyoñe Yésus a maneya ve miñyeʼelane mite, bizuʼu bi bôt bi nga kame ñyeʼelane wé;

²⁹ amu a mbe a yeʼeleʼe be ane môt a bili ngule njôan saa ke ane beyeme bekalate bap.