METIAS 5 - Bible en langue Bulu

Mvom a be

¹ Ayene a nga yene bizuʼu bi bôt, nde a nga bete nkôle yôp, a tabe si; beyéʼé bé be mane nye subu bebé.

² Ane a nga kui anyu dé a jô be na:

³ Mvom a bôt be ne azoé e minsisime biab été, amu éjôé ya yôp é ne énjap.

⁴ Mvom a bôte ba wôʼô ôlun, amu ba ye volebane minlem.

⁵ Mvom a bôt be ne bivôvoé minlem amu ba ye nyoñe si nyô ane ngab élik.

⁶ Mvom a ba ba wôʼô zôsôô zaé a évé amu ba ye jaé.

⁷ Mvom a ba ba wôʼô bôte befe éngôngo amu be fe ba ye kooban éngôngo.

⁸ Mvom a ba be nee mfubane minlem amu ba ye yene Zambe.

⁹ Mvom, a bôte ba miase mvoʼé amu ba ye lobane jôé na bone be Zambe.

¹⁰ Mvom a ba ba wu étibelaʼa amu zôsôô amu éjôé ya yôp é ne énjap.

¹¹ Mvom a mia éyoñ ése ba taa mia a tibili a kobô mia kane nkobô ébiasé ése amu ma.

¹² Vaʼan a fôn amu na maʼan me ne mia abui yôp. Avale te fe nde be nga tibili bekulu mejô be nga zu mia ôsu.

Mi ne nku; mi ne lambe

¹³ Mia mi ne nku ya si nyô. Nge nku wo bo éyôs, jé é ne bo na ô beta bo nku? Ô ntoo teke fe jôm, wo yiane wuabane fé na bôt be tibi wô a mebo.

¹⁴ Mi ne éfufube ya émo ji, e tison é se ngule ya sobô é too nlôñan e nkôle yôp.

¹⁵ Nde fe na be nji boʼé lambe a telé nye éwolo si, ve telé nye e tawôlô yôp a nga faé asu bôte bese be ne nda été.

¹⁶ Avale te nde éfufube jenan ja yiane faé e mise me bôt, nalé ba ye yene mbamba mimboone mienan a ve ésoo wônan a ne yôbe duma.

Me nji zu tyame metiñ, ve bo me

¹⁷ Te simesane na me nga zu tyame metiñ nge bekulu mejô; me nji zu tyam, ve bo.

¹⁸ Bebela émien, ma kate mia na, akekui yôp a si bia ye lôt, ôyôm ékanga wua nge ntene wua ya kalate metiñ wo ye bo te kôlô, ve akekui mam mese me maneya boban.

¹⁹ Ajô te, nge môt éziñ, e metiñe ma, a ye tyame ve di da dañe tyôtyoé, a yeʼele fe bôte befe nalé, a ye lobane jôé na: nyô a dañe tyôtyoé éjôé ya yôp; ve nyô a ye bo me a yeʼele fe me nalé, nye a ye lobane jôé na: beta môt éjôé ya yôp.

²⁰ Amu ma kate mia na, nge zôsôô wônan teke dañe nyô beyeme bekalate a befarizieñ, mi se ngule ya nyiin éjôé ya yôp.

Mewôé me bôt. Fulu élat

²¹ Mi nga wôk ane be nga jô bôbetôle na: Wo ye bo te wôé môt, amu nyô a wôé môt a yiane mekua e nda mejô.

²² Ve me ke ma jô mia na: nyô ase a wôʼô monyañ ôlun, nye fe a yiane mekua ya nda mejô; nge môt éziñ ke a jô monyañe na: Raka nalé a ne na ôkukut, a yiane ke e beta aba mejô; a nge môt éziñ a jô na akut, a yiane ke ébé nduan.

²³ Ajô te nge wo beʼe mveane wôé na wo ke beté wô ataʼa metunaʼa yôp, ô ke simesane valé na monyoñ a bili wo jam e nlem ,

²⁴ liʼi mveane wôé ataʼa si valé, ô bulane mvus, ô taté ke mane lat a monyoñ, éyoñe te ñhe ô zu ke ve mveane metunaʼa wôé.

²⁵ Jikaʼa mane kui tyiñ a môte mia nye mi bili ajô nté mia nye mi ngenan e zene zañ, e môte mia nye mi bili ajô a za kee wo e be ntyiʼi mejô, nye ke a kele wo e be mone bezimbi na a wua wo e nda mimbôk.

²⁶ Ma kate wo bebela na ô se nguleya kôlô vôm ate nge ô nji taté yaʼan étune kabe ja suʼulan.

Ajô mejian a jôm ja tindi môt a bo abé

²⁷ Mi nga mane wôk ane e nga jôban na: Te bo mejian .

²⁸ Ve ma ma kate mia na: e môt ase a fombô minga a nkômban éziñ e nlem , a boya mejian a minga ate e nleme wé été.

²⁹ Nge dise dôé ya mbo nnôm da tindi wo na ô bo abé , fôndéʼé de ô wua de ôyap; amu asu dôé, e ne mfi na ébuʼa nyôle jôé jia é jañ a lôte na ngume nyôle wôé ô ke étôtôlan.

³⁰ Nge wo wôé ya mbo nnôm wo kolé wo ôbak: tyiʼi wô a wua wô ôyap, amu e ne mfi wôé na ébuʼa jia ya bibuʼa biôé é jañ a lôte na ngume nyôle wôé ôse ô ke étôtôlan.

Ajô nsuane minga

³¹ E nga jôbane na: Môt a suu minga wé a vaʼa minga ate kalate ntyaman aluk.

³² Ve ma ma jô mia na: nyô ase a suu minga wé, vengevenge ve amu mejian , a bo nye a beʼe mekua mejian , a nyô ase a luʼu minga a ne nsuan, a ntoo mbo mejian .

Te kalane minka

³³ Nalé fe na e nga jôban e be bôbetôle na: Wo ye bo te tyame ngana jôé, ve wo ye tôé mengana môé asu masa wôé.

³⁴ Ve ma ma jô mia na: môt a boʼo boʼo te veʼele kalane minkaa; te kalane yôp, amu e ne éto njôane Zambe,

³⁵ te kalane si, amu é ne ételé ya mebo mé; te kalane Yérusalém, amu a ne tisone beta njô bôt,

³⁶ te kalane nlô wôé, amu ô se nguleya veñesane kongo ésile jia ya nlô wôé éfumulu nge évindi.

³⁷ Nkobô wônan ô boʼo ve yaa, yaa; momo, momo! Mam ma bebe yôbe valé ma so be mbia Môt.

Dis da tañe dis

³⁸ Mi nga wôk ane e nga jôbane na: Dis da tañe dis, asôñ da tañ asôñ.

³⁹ Ve ma ma jô mia na: Te litane ngule jenan asu be mbia môt éziñ; ve nyô a bibi wo abaé amañe ya mbo nnôm, veñesaʼane fe nye di avok;

⁴⁰ a nyô a kômbô kee wo aba mejô na a wôlé wo éwomane jôé, jôkéʼé fe nye kôt;

⁴¹ a e môt a ye bi wo a ngu na ô telé nye zen tañe kiliméta jia a étun kele telé nye kiliméta élaa.

⁴² Nge môt a sili wo jôm, vaʼa nye je; môte ki a sili wo ékôla te lume nye mvus.

Ô nyekeʼe môt a siñe wo

⁴³ Mi nga wôk ane e nga jôbane na: Wo ye nyeʼe môt a ne éngôé a vini nsiñe wôé.

⁴⁴ Ve ma ma jô mia na: mi nyekeʼe besiñe benan a yeʼelan ajô bôte ba tibili mia.

⁴⁵ Nalé mia ye bo foʼo bone bʼésoo wônan a ne yôp, amu nye a bo na jôp e tôô asu mbia be bôt a asu mbamba be bôt, a noo fe mveñ asu bezôsôô a bikotekote bi bôt.

⁴⁶ Amu nge mia nyeʼe ve bôte ba nyeʼe mia, maʼane mevé mia ye nyoñ été? Ye benyoñe toya bebien be nji bo nalé avale da?

⁴⁷ A nge mia batane ve bobenyoñ étam, za étua jame mia bo? Ye bikule bi nji bo avale da nalé?

⁴⁸ Ajô te nde mia mia ye bo ntute zôsôô ane ésoo wônan a ne yôp a ne ntute zôsôô .