METIAS 4 - Bible en langue Bulu

Satan a bôbôlô Yésus

¹ Eyoñe te Nsisim ô nga beʼe Yésus a kee nye fé été na Satan a bôbôlô nye.

² Eyoñ a tabeya mimôse mewôm menyin a melu fe mewôm menyin teke di, a nga suʼulane wôʼô zaé.

³ Nde mbôbôlô bôt a nga subu nye bebé a jô na: Nge ô ne mone Zambe, jôʼô mekoʼo mana me veñesane belet.

⁴ Nye ke a nga yalan a jô na: E ne ntilane na: Môt a nji nyiñ a belet étam, ve nalé fe a ajô ese da so anyu Zambe.

⁵ Eyoñe te satan a nga nyoñe nye a kee nye e mfufube tison, a telé nye ôzolom nkume ya nda Zambe

⁶ a jô nye na: Nge ô ne mone Zambe womien yôʼô a tebe si amu e nga tilibane foʼo na: A ye bendé be éngele asu dôé na be beʼe wo abo dôé e za kômôtô akok.

⁷ Ane Yésus ke a nga jô nye na: E ne fe ntilane na: Te bôbôlô Nti e Zambe wôé.

⁸ Nde satan a nga beta kee nye étun beta nkôle yôp, a nga mane kee a liti nye bijôé bise ya si ése a duma ese yʼété,

⁹ a jô nye na: E biôme biseseʼe bi, ma ye ve wo bie, nge ô kumbu si a kañe ma.

¹⁰ Eyoñe te Yésus a zu jô nye na: Kelek a Satan! Amu e nga tilibane foʼo na: Wo ye kañe Nti e Zambe wôé a nye étam wo ye saane nye.

¹¹ Eyoñe te ñhe nje satan a nga liʼi nye, ateme na beéngele be nga zu a saane nye.

Yésus a ke tabe Galilé

¹² Awôʼô a nga wôʼô na Yôanes a biliya, a nga ke ôyap e Galilé.

¹³ Eyoñ a kôlôya Nazarét, nde a nga ke tabe Kapernawum, e sii Zabuloñ a Néftali;

¹⁴ Ndemben nkobô nkulu mejô Ezayi a nga kobô ô jalébane na:

¹⁵ E sii Zabuloñ a sii Néftali, e zene mañ, e Yordane yat, Galilé meyoñ !

¹⁶ E mvoñe bôt é nga too dibi été, é yeneya beta éfufup. E bôte be nga too sii dibi awu éfufup é faéya asu dap.

¹⁷ Ataté éyoñe te, Yésus a nga ke a yôtane foé a jô na: Kôñelaʼane minlem, amu ayoñe ya yôp e ntoo bebé.

Yésus a taté tobe beyéʼé

¹⁸ A wuluʼu mfôme mañ ya Galilé, nde a yene bobenyañ bebaé: Simon Pierre baa monyañ wé André be wuʼa avot e mañ amu be mbe beyobe kos;

¹⁹ ane a nga jô be na: Tôñane ma a ma ye bo mia beyobe bôt.

²⁰ Ane be nga liʼi memvot été te ébien a tôñe nye.

²¹ Eyoñ a kôlôya valé a subu ôsu, nde a nga yene bobenyañ befe bebaé: Yakob Zébédé a Yôanes monyañ wé, ane a nga loone fe be.

²² Be fe be nga liʼi éfunga été te ébien a ke ba tôñe nye.

Yésus baa bizuʼu bi bôt

²³ Ane a nga wulu e Galilé ase a vaʼa ñyeʼelan e meba me Zambe map; a yôtaʼane Mbamba Foé yʼEjôé; a yeteʼe aval ôkon ese a aval éyem ése e be bôt.

²⁴ Duma dé e nga yiane Siri ase; be nga zuu nye minkôkone mise mi bili akone mevale meva nge na be nga bili éndeñelaʼa amu mintaé mevale meva: bebeʼe mimbia minsisim, ba menyôl me ne ñyemelan, ba be ne mimbôbôk, a a nga saé be.

²⁵ Bizuʼu bi bôt bi nga ke bia tôñe nye bi soʼo Galilé, Dékapôl, Yérusalém, Yudé a Yordan yat.