METIAS 3 - Bible en langue Bulu

Yôanes Babtist

¹ Melu mete, Yôanes Babtist a nga lôt, a kele a yôtan afan-afan, e si ya Yudé

² a jôʼô na: Kôñelaʼane minlem amu éjôé ya yôp é ntoo bebé.

³ Nye a ne môte Nkulu Mejô Ezayi a nga jôô nye na: Tyiñe ñyôtan afan-afan ja jô na: Kômane zene Nti, sôʼane mezene mé zôsôô ne tiññ.

⁴ Yôanes émien a mbe a beʼe éyé é too ntiñan a mimvot mi kamel, kandé ékôp é tii nye angeteñ; bidi bié bi mbe bitandak a wôé ya mefan.

⁵ Eyoñe te Yérusalém a mbe a kele be nye a Yudé ase a afôla si ese ya Yordan,

⁶ be memek minsem miap a duban e mo mé e mendim mʼôsôé Yordan.

Kôñelaʼane minlem!

⁷ Ayene a nga yene befarizieñ a besadusieñ abui be zaʼak e nduane bôte wé, a nga jô be na: A Mvoñe mekpwele nyô! Za a nga yeʼele mia na mi tub ayaa da zu?

⁸ Wumane ñhe ébuma ja yiane nkôñelane nlem,

⁹ a te mia bo zezé énguñ e be mia bebiene na: Abraham a ne ésaa wongan! Amu ma kate mia bebela na, Zambe a ne soo Abraham bon e mekoʼo ma.

¹⁰ Amu ôvôn ô mbôô tine bilé a élé ése ja ye bo te wume bibuma bi ne mvaé, ba ye baʼé je a wua je e nduan.

Mbaptizô mendim a wu nduan

¹¹ Ma ma du mia e mendim asu nkôñelane minlem, ve nyô a zu ma mvus a ne ngul a dañe ma: me nji bo nyô a yiane vaa nye besilefas; nye a ye du mia e Mfufube Nsisim été a e nduan été.

¹² Esobelé ja seʼese biôm é ne nye wo, a ye bale afôla si dé a kôane nlisi angun; ve a ye diʼi bikumba e nduan é ne te dim été.

¹³ Ane Yésus a nga so Galilé na a ke Yordan e be Yôanes na a du nye.

¹⁴ Nde Yôanes a nga tyiʼi nye ôsu a jô nye na: Ke ma ma yiane duban e be wo, ye wo wo viane zu be ma?

¹⁵ Ane Yésus a nga yalan a jô nye na: Tame jôʼé éyoñe ji, amu avale di nde da yian asu dangan na zôsôô ase a jaléban. Eyoñe te a nga jôʼé nye.

¹⁶ Nné ane Yésus a nga mane duban, a nga kôlô mendim été été a dañ e kindik, ateme na yôp e nga yombô asu dé a Nsisime Zambe ô nga sise be nye ane zum;

¹⁷ ateme fe na tyiñ é nga so yôp é jôʼô na: Nyôna a ne mone wom ma dañe nyeʼe me bili mevak e be nye.