METIAS 28 - Bible en langue Bulu

Yésus a wômô soñ

¹ Mvuse sabat , ndibe tyé, môs ôsu ya sondô, Marie ya Magdala a nga ke fombô soñ baa Marie mbok.

² Ateme na beta mfôʼôsane si a nga boban, e ne na: Engele Nti a nga sis a soʼo yôp; éyoñ a subuya bebé soñ, a nga biʼiti akoʼo fefe a tabe de yôp.

³ A nga yené ane feleves, a ngômesane jé é mbe éfumulu ane sut.

⁴ Ane bebaʼale be nga tyibelan amu woñ be nga ko nye a be nga bo ane mimbim.

⁵ Nde éngel a nga nyoñe nkobô a jô binga na: Te koone woñ, ma yeme foʼo na mia jeñe Yésus nyô be nga tyelé krôa yôp.

⁶ A nji bo va, a wômôya foʼo ane a nga jô, Zakan a yenane vôm a nga bôô.

⁷ Kelan avô a katane beyéʼé bé na a wômôya miñwuan a mi lôô a keya mia ôsu e Galilé; mia ye yene nye wé. Mi lôô me kateya mia foé.

⁸ Be nga ke avô a liʼi soñ, njalan a woñ, mbundaʼan a abui mevak, be mateʼe asu ya kate beyéʼé bé foé.

⁹ Ateme na Yésus a nga tôbane be a jô be na: Mbôlane wé. Be nga subu nye bebé, ve bi nye mebo a kute meboñe si asu dé.

¹⁰ Ane Yésus a nga jô be na: Te koone woñ; kela katane bobenyañe bam na be ke Galilé, nne ba ye yene ma wé.

Foé bemombô soñ

¹¹ Be ngenan be kelek, ateme na, bôte bʼéziñ ya bebaʼale soñ be nga nyiin e tison a kate betuni benen e mam mese me nga kui.

¹² Ba be bemvendé be nga sulan ésok, éyoñe be maneya bi abime moné da yian, be nga ve nye bezimbi

¹³ be jôʼô na: Jôʼane na beyéʼé béé be nga zu wube nye alu bi too ôyo.

¹⁴ Nge ngovina a wôʼô jame te, bia ye bo nye na a yebe njôane te a mia mia ye bo te tyelé minleme yôp.

¹⁵ Eyoñe bezimbi be nyoñeya moné, be nga bo ane be nga yeʼele be. Njôane wu ô nga mialan e be beyude a kui e môse wu.

Beta abendé

¹⁶ Beyéʼé awôm a wua be nga ke e Galilé, e nkôle Yésus a nga bendé be,

¹⁷ éyoñ be yeneya nye, be nga kute meboñe si ve be sôʼane fe.

¹⁸ Eyoñ a subuya be bebé, Yésus a nga kobô a jô be na: Ngul ése é maneya vebane be ma e yôb été a e si nyô.

¹⁹ Kelane ñhe a boʼone meyoñ mese beyéʼé mi duu be e jôé Esaa a Mon a Mbamba Nsisim,

²⁰ mi yeʼele be ane ba yiane baʼale mam mese me nga bendé mia; mi lôô me ne a mia môse mise akekui amané ya si nyô.