METIAS 25 - Bible en langue Bulu

Nkana bengon awôm

¹ Nde éjôé ya yôp ja ye funane bengo be binga awôm mbe be nga nyoñe belambe bap a ke tôbane môt a luk.

² Betane yʼété be mbe mekut betane ke mimfefek.

³ Ba be mbe mekut, éyoñ be nyoñeya belambe bap, be nga vuane nyoñe mbon.

⁴ Ve ba be mbe mimfefek, be nga nyoñe mbon e mendek a belambe bebien.

⁵ Amu nluʼu minga a nga bo te jiʼa so, nde bese be nga bili atek a ke ôyo.

⁶ E zañ alu, ôyenga ô nga jô: Nluʼu minga a soya, kuan atan, mi ke tôbane nye!

⁷ Ane bengo be binga bete bese be nga vee a kôme belambe bap.

⁸ Mekut me nga jô mimfefeʼe na: Vaʼane bia ngabe ya mbone wônan, amu belambe bangan be nga dim.

⁹ Mimfefek mi nga yalan a jô na: Teke foʼo! Ô se nguleya yiane bia be mia; ve kelan e be bebo makit mi kus asu denan.

¹⁰ Eyoñe bana be keya kuse mbon, nde nluʼu minga a so, ane ba be mbe nkômesan be nga nyiin e abôʼô éliʼiti, a mbé ô nga feteban.

¹¹ Ayap e lôteya, bengo be binga bevoʼo fe be nga so a jô na: A Nti, a Nti, diʼi bia mbé !

¹² Nde a yalan a jô be na: Ma jô mia bebela na me nji yeme mia.

¹³ Ajô te mombaʼan, amu mi nji yeme môs nge awolo.

Nkana betalañ

¹⁴ Da ye bo ane môt éziñ, nye ate a nga bo na, a zaʼa ke dulu, ve loone bebo bisaé bé a ve be akume dé.

¹⁵ A nga ve wua betalañ betan, nyô mbok bebaé a nyô mboʼo wua, môt ase ane ngule jé é né; mvus éte a nga ke. Eté été,

¹⁶ nyô a nga nyoñe betalañ betan a nga ke bo makit a yene betalañ befe betan.

¹⁷ Avale te fe nyô ya betalañ bebaé a nga bi bebaé befe nsenge.

¹⁸ Nyô a nga nyoñe ve talañ wua, a nga ke, ve faʼa ébé e si a solé moné masa wé.

¹⁹ Ayab éyoñ é lôteya, nde masa bebo bisaé bana a ke so a nga bo be sitoʼo.

²⁰ Nyô a nga nyoñe betalañ betan a nga tebe a liti befe betan a jôʼô na: A masa, ô nga ve ma betalañ betan ô lôô me yeneya befe betan nsenge.

²¹ Masa wé a nga jô nye na: Mvaé, ô ne mbamba mbo ésaé a nyô ya buni, ô litiya zôsôô mfaʼa ya tyôtyoé biôm, ma ye telé wo ô baʼale biôm abui; zaʼa vak mia masa wôé.

²² Nyô ya betalañ bebaé a nga tebe éyoñe jé a jô na: A masa, ô nga ve ma betalañ bebaé; ô lôô me yeneya befe bebaé nsenge.

²³ Masa wé a nga jô nye na: Mvaé, ô ne mbamba mbo ésaé a nyô ya buni, ô litiya zôsôô mfaʼa ya tyôtyoé biôm, ma ye telé wo ô baʼale biôm abui, zaʼa vak mia masa wôé.

²⁴ Nyô ya talañ wua fe a nga tebe éyoñe jé a jô na: A masa, me mbe me yeme na ô ne ayete môt: Wo kôan e vôm ô nji mias, wo toʼé e vôm ô nji bôé;

²⁵ amu woñ, nde me nga ke solé talañ wôé e si été: akume dôé te nde di ô bili.

²⁶ Ve masa wé a nga yalane nye na: Ô ne mbia mbo ésaé a nleles! Ô nga yeme na ma kôan e vôm me nji mias a toʼé e vôm me nji bôé.

²⁷ O nga yiane futi moné wom e bañ; éyoñe me soya, me nga ye bulane nyoñ akume dam a nsenge.

²⁸ Nyoñane ñhe nye talañ wé a kee nye môt a bili betalañ awôm.

²⁹ Amu môt ase a bili, nye ba ye ve a a ye bi abui abui; ve nyô a nji bi, ba ye vaa jaʼane jôm a bili.

³⁰ Ve mfaʼa mbo ésaé a ne tee mfi, wuʼane nye e dibi e ne atan: e wé nye a ye bo miñyôn a nlatane mesôñ.

Môse ntyiʼane mejô

³¹ Eyoñe mona môt a ye so étôtoʼo jé ba be beéngele bé bese, a ye tabe étôtoʼo éto njôane jé.

³² Meyoñ mese ma ye sulan asu dé, a ye kandé bôt bana a ba bevok ane mbaʼale biyem a kandé mintômba a bikela.

³³ A ye telé mintômba e mbo nnôme wé a bikela e mbo ngale wé.

³⁴ Eyoñe te njô bôt a ye jô ba ba ye tebe nye mbo nnôme na: Zaʼan, mia bôt Esaa wom a nga botan, nyoñane ngab éjôé é nga kômban asu denan ataté ane émo é nga téban:

³⁵ Amu me nga wôʼô zaé a mi nga ve ma bidi; me nga wôʼô évé a mi nga nyuu ma mendim; me mbe nneñ a mi nga nyoñe ma;

³⁶ soé a mi nga jalé ma ngômesan; me nga kon a mi nga jome ma; me mbe mimbôk ane mi nga zu yene ma.

³⁷ Eyoñe te bezôsôô be bôt ba ye yalane nye na: A Nti, bi nga yene wo éyoñ évé ô wôʼô zaé a ve wo bidi, ô wôʼô évé a nyuu wo mendim?

³⁸ Bi nga yene wo éyoñ évé ô too nneñ a nyoñe wo, ô too soé a jalé wo ngômesan?

³⁹ Eyoñ évé bi nga yene wo ô too nkôkon nge e nda mimbôk a zu yene wo?

⁴⁰ Njô bôt a ye yalane be na: Bebela ma kate mia na: éyoñ ése mi nga bo wua ya ayôme bôt da dañe tyôtyoé di jam mbe be ne bobejañ, ma ñhe le mi nga bo de.

⁴¹ Wôna a ye jô ba ba ye tebe nye mbo ngale na: Kelan ma ôyap, mia bôte biyoʼé, e nduane ya nnôm éto nje é nga kômban asu diable a beéngele bé.

⁴² Amu me nga wôʼô zaé mi te ve ma bidi; me nga wôʼô évé, mi te nyuu ma mendim;

⁴³ me mbe nneñ, mi te nyoñe ma; me mbe soé, mi te jalé ma ngômesan; me nga kon a me mbe mimbôk mi te zu jome ma!

⁴⁴ Nde be fe ba ye yalane na: A Nti éyoñ évé bi nga yene wo ô wôʼô zaé, nge évé, ô too nneñ nge soé, ô too nkôkon nge nda mimbôk bi te zu volô wo?

⁴⁵ A ye yalane be na: Bebela ma jô mia na, e vôme mi nga bo te bo wua ya ayôme bôt da dañe tyôtyoé dina jam, vôm ate mi nga bo te bo ma.

⁴⁶ Balé bete ba ye tôbane melebe ya nnôm éto, ve bezôsôô be bôt ba ye nyoñ ényiñe ya nnôm éto.