METIAS 22 - Bible en langue Bulu

Abôʼô aluk

¹ A yalaʼane be, nde Yésus a beta kobô a minkana a jôʼô na: Avale di nde me ne beta funane dee éjôé ya yôp:

² ja funane jame njô bôt éziñ a nga bo éyoñe ya a nga bo ésulan aluʼu mone wé;

³ a nga lôme bebo bisaé bé be loone bôt a nga bañete ésulan aluk: ve be nga bene zu.

⁴ Ane a nga beta lôme bebo bisaé befe nye na: Katane bôt me nga bañete na: Yenan ane me maneya kôme dina wom: beyôme benyaʼa bam, a mevoñ biyem biam bi nga tyiʼiban, a mam mese me ntoo nkôman, zaʼan abôʼô aluk.

⁵ Be nji kee kee melo wé, ve viane tube tup: nyina a ke afube dé li, nyô mbok e makite mé;

⁶ ba be nga liʼi ve bi bebo bisaé bé a taa be, a wôé be.

⁷ Nde njô bôt a nga yaa a lôme minsamba bezimbi mié na mi wôé bewôé bôt bete a diʼi tisone jap.

⁸ Nye bebo bisaé bé na: Jam ôsu é ne na abôʼô aluk é ntoo nkôman, di baa ke na bôt me nga bañete be litiya na be nji yian,

⁹ ajô te ñhe kelan e maʼane mezen a loone bôte bese mia ye yene na be zu abôʼô aluk.

¹⁰ Ane bebo bisaé be nga ke mezen a kôane ba bese be nga koone be: mbia a mbamba be bôt; abôʼô aluk ve jaé ne lut a bôt.

¹¹ Eyoñe njô bôt a nyiine na a yene bôt be nga looban, ve yene mboʼo éziñ a too tee ngômesan ya abôʼô aluk,

¹² a nga sili nye na: A mvôé jam, wo te nyiine vana aya tee ngômesan ya abôʼô aluk? Nye ke ve ane ba te loé nye anyu.

¹³ Ajô te njô bôt a nga jô bebo bisaé na: Kaʼane nye mebo a mo, a wuʼane nye e dibi é ne atan, e wé a ye bo ve ñyôn a nlatane mesôñ.

¹⁴ Amu abui bôt e ne nlooban, ve ba be ne ntoban be ne tyôtyoé.

Vaʼane kéza biôme bié a Zambe émbié

¹⁵ Eyoñe Befarizieñ be keya, be nga tebe ésoʼo ya bi Yésus ôlam ya bifia bié.

¹⁶ Nde ba lôme beyéʼé bap a bôte ya ngame Hérôde e be nye be jôʼô na: A Nyeʼele, bia yeme na ô ne bebela a é ne fe bebela na wo yeʼele bôt zene Zambe teke ko môt éziñe woñ, amu ô nji semé ngume môt:

¹⁷ Kate ñhe bia, wo yen aya, ye da yiane na be yaʼane kéza toya ye momo?

¹⁸ Amu Yésus a mbe a yemek nsisime nkpwala ô ne be be, nye be na: Amu jé mia bôbôlô ma a bebaduʼu be bôt?

¹⁹ Litaʼane ma moné toya , nde ba liti nye denié wua.

²⁰ A nga jô be na: Fôtô za nyô a za a nee ntilane wu?

²¹ Be nga yalane nye na: Sézar. Nde a jô be na: Bulaʼane ñhe Sézar biôme bi Sézar a Zambe biôme bi Zambe.

²² Eyoñe be nga wôʼô nalé, be nga semé ve liʼi nye a ke ôyap.

Nsili ajô ñwômane miñwuan

²³ Môs ôte, Besadusieñ be nga zu be nye, mbe ba jô na ñwômane miñwuan ô nji bo, nde ba sili nye na:

²⁴ A Nyeʼele, Môze a nga jô na: Nge môt éziñ a wu tee bon , monyañe wé a ye luʼu minga wé a biaé monyañe wé ate mvoñe bôt.

²⁵ Bobenyañe zamgbwale bʼéziñ be nga too be bia, ntôl ve luk a wu te liʼi mvoñe bôt, ane a nga liʼi monyañe wé e minga wé;

²⁶ avale te fe e nga kui e be monyañe baa, nyô lale a kui nyô zamgbwale.

²⁷ Mvus éte minga fe a nga wu.

²⁸ Nde ñhe éyoñe ya ñwômane miñwuan, minga nyô a ye bo nga za ya bobenyañe zamgbwale ba? Amu bese be nga luʼu nye.

²⁹ Yésus a nga yalan a jô be na: Mia fuʼu fé amu te yeme mintilan a ngule Zambe;

³⁰ éyoñe ya ñwômane miñwuan, befam ba ye bo te luk a binga ba ye bo te luʼuban, ve ba ye bo ane beéngele ya yôp.

³¹ Mfaʼa ya ajô ñwômane miñwuan ye mi nji lañ ane Zambe a jô mia na:

³² Ma me ne e Zambe Abraham, e Zambe Izak a e Zambe Yakob? A nji bo e Zambe miñwuan ve nyôa bevevee.

³³ Eyoñe jama bôt a nga wôʼô nalé be nga bi ébuʼa anyu a mo amu ñyeʼelane wé.

Atiñe da dañe metiñe mese

³⁴ Eyoñe Befarizieñ be wôʼôya na a feteya Besadusieñ menyu, be nga sulan e vôme wua ate.

³⁵ Wua ya été, a too ñyeme metiñ, a nga sili nye nsili asu ya bôbôlô nye:

³⁶ A nyeʼele, abendé avé da dañ anen e metiñ été?

³⁷ Yésus a nga yalane na: Wo ye nyeʼe Nti e Zambe wôé a nleme wôé ôse, a nsisime wôé ôse a ôsimesane viôé ôse;

³⁸ abendé e ne anen a e tele ôsu nde le.

³⁹ Di baa da funane fe di ôsu nde di: Wo ye nyeʼe môt a ne wo bebé ane womien.

⁴⁰ Metiñ mese me tyele e mebendé mana mebaé nalé fe bekulu mejô.

Nsili ajô mone David

⁴¹ Eyoñe Befarizieñ be sulaneya, Yésus a nga sili be

⁴² na: Mia simesane aya ajô Krist? A ne e mona za? Be nye na: Mona David.

⁴³ A nga jô be na: Amu jé ñhe David, e Nsisim été, a loone nye Nti a jôʼô na:

⁴⁴ Nti a nga jô Nti wome na: Tabeʼe si e mbo nnôme wom akekui me futiya besiñe bôé e mebo môé si?

⁴⁵ Nge David a loone nye Nti, nne a ne bo mone wé aya?

⁴⁶ Teke môt a mbe nguleya yalane nye toʼo ve ajô da, a ataté éyoñe te, teke môt a nga beta bi ayoʼo nleme ya sili nye nsili.