METIAS 19 - Bible en langue Bulu

Nyeʼelane Yésus ajô nsuane minga

¹ Nde da zu bo na, éyoñe Yésus a maneya kobô mejô mete, a nga kôlô Galilé a ke mefôla me si ya Yudé, e Yordane yat.

² Ane ézuʼu minsamba mi bôt é nga tôñe nye a a nga saé je wé.

³ Befarizieñ be nga zu be nye na be veʼele nye be jôʼô na: Ye é ne nkañesane na môt a suu minga wé amu aval étom ése?

⁴ Nye be na: Ye mi nji yeme na Nté biôm, atataʼa, a nga té be fam a minga?

⁵ A a nga jô na: Amu nalé, fam ja ye liʼi ésaa a nyia a a ye lat a minga wé a ba ye bo bebaane nsône wua.

⁶ Avale ya na be bo te beta bo bebaé ve nsône wua. Ajô te jôme Zambe a lateya, môt a nji yiane kandé je.

⁷ Nde ba jô nye na: Amu jé ñhe Môze a nga bendé mveane kalate ntyaman aluk a nsuane minga?

⁸ Nye ke be na: Môze a nga ve mia nguleya suu binga benan amu ayete ya minleme mienan, ve atataʼa mam, nalé a nji tame boban.

⁹ Ma jô mia na: Nyô a suu minga wé, vengevenge ve a lateya a fame fe, a luʼu fe minga mfe, a ntoo fame mejian .

¹⁰ Ane beyéʼé bé be nga jô nye na: Nge nalé nye a né e zañe fam a minga wôna mfi ô nji bo na môt a luk.

¹¹ Nye be na: Saa ñhe bôte bese mbe be ne wôʼô ajô di, ve ba e ne be mveban.

¹² Yaa! Miaé miziñ mi nga bialé nalé e mebume benyia bap; mivoʼo ke a mboone bôt; ve mife mi nga bo mibiene nalé amu éjôé ya yôp.

Jôkaʼan ayôme bongô e zu be ma

¹³ Ane be nga zuu ayôme bongô na a beté de mo a yeʼelan. Nde beyéʼé be nga viane bamé be.

¹⁴ Ve Yésus a nga jô na: Jôkaʼan ayôme bongô, a te kamane de na e zu be ma, amu éjôé ya yôp é ne jôme mevale me bôte ma.

¹⁵ Eyoñ a maneya beté be mo, a nga kôlô valé.

Nkukume ndômane môt

¹⁶ Nde môt éziñ a nga zu be nye a sili nye na: Za mbamba jam ma yiane bo na me yen ényiñe ya nnôm éto?

¹⁷ Yésus a nga jô nye na: Amu jé wo sili ma nsili ajô mbamba jam? Môte wua a ne mbamba; nge wo kômbô ñhe nyin ényiñ, baʼaleʼe mebendé.

¹⁸ Nye Yésus na: Mebendé mevé? Yésus nye na: Te wôé môt, te bo mejian , te wup, te bôte môt ajô,

¹⁹ seméʼé ésoo baa nyua a wo ye nyeʼe môt a ne wo bebé ane womien.

²⁰ Ane ésoé ndôman éte é nga jô nye na: Me baʼaleya mam mete mese; jé éfe ja beta jembane ma?

²¹ Yésus a nga jô nye na: Nge wo kômbô bo te ayeñ, kelek a kuan akume dôé a ve minzôzoé, a wo ye bi akum e yôp a zaʼa va a tôñe ma.

²² Eyoñ ésoé ndôman é nga wôʼô ajô te, nde a nga ke a wôʼô ôlun; amu é mbe foʼo na a nga bili biôm abui.

Njuʼu na nkukum ô nyiin éjôé Zambe

²³ Yésus a nga jô beyéʼé bé na: Ma jô mia bebela na nkukum ô ne ayaé ya nyiin éjôé ya yôp.

²⁴ Ma beta jô mia na: E ne tyiʼibi be kamel na a tulan abé ôndôndo a dañe na nkukum ô nyiin éjôé Zambe.

²⁵ Eyoñe beyéʼé be wôʼôya nalé, be nga kame beta nkaman be jôʼô na: Za ñhe a ne nyiiban?

²⁶ Eyoñ a fombôya be, Yésus a nga jô be na: Jame te é se nguleya boban e mfaʼa bôt, ve mfaʼa Zambe, mam mese me ne boban.

²⁷ Ane Pierre a nga yalan a jô nye na: Tame yen, bi maneya liʼi mam mese a tôñe wo, za jame ñhe da yange bia?

²⁸ Yésus a nga jô be na: Ma jô mia bebela na: Mia mi maneya tôñe ma, éyoñe mam ma ye bobane mimfefé, éyoñe mona môt a ye tabe éto njôane jé, mia fe mia ye tabe bito bi njôan awôm a bibaé a tyiʼi meyoñ ya Israél awôm a mebaé mejô.

²⁹ A nyô ase a nga liʼi menda, nge bobenyañ nge bekal nge ésaa nge nyia, nge bon , nge mefup amu jôé dam, a ye nyoñ a lôte ntete biôm a bi fe ényiñe ya nnôm éto.

³⁰ Abui bôt é tele ôsu éyoñe ji ba ye tebe mvus a ba be tele mvus ba ye tebe ôsu.