METIAS 18 - Bible en langue Bulu

Za a dañ beta môt éjôé ya yôp?

¹ Eyoñe be nga subu Yésus bebé a sili nye na: Za a dañe beta môt éjôé ya yôp?

² Yésus ve loon ôyôme mongô, a telé wô ézezañe jap,

³ nye be na: Ma jô mia bebela na: Nge mi nji tyendé a bo ane ayôme bongô, mia ye bo te nyiin éjôé ya yôp.

⁴ Nyô a ye ñhe suu émiene si ane ôyôme mongô, nye a dañe beta môt éjôé ya yôp.

⁵ A nyô a nyoñe ôyôme mongô wua avale te a jôé dam, mamiene le a nyoñ.

⁶ Ve nyô a kolé wua ya ayôme bone di da buni ma ôbak, da dañe nye mvaé na be tiñeti nye beta akok e tyiñ a wua nye e mendim me mañ.

E mam me ne wo mvaé

⁷ Bidim a émo ji amu mam ma kolé bôt abak. Mam ma kolé bôt abak me ne ane mam ma yiane foʼo kui; ve bidim a môt jam da kolé ôbak da so be nye.

⁸ Nge akule wo dôé nge akule abo dôé da kolé wo ôbak, tyiʼi de a wua de ôyap; amu e ne wo mvaé na ô nyiin ényiñ étune wo étun abo, nge na ô too éyem, a lôte na ô bili mekule me mo mebo nge mekule mebo mebaé ve ô viane wuaban e nduane ya nnôm éto.

⁹ A nge dise dôé da bo wo na ô ku mbek , vaʼa de a wua de ôyap; e ne wo mvaé na ô nyiin ényiñ ya melu mese dise da a lôte na ô ke ébé nduan a mise môé mebaé.

Ntômba ô nga jañ

¹⁰ Tabaʼane ntyele ya biasé wua ya ayôme bôte di. Amu ma kate mia na beéngele bap ya yôp, éyoñ ése, ba fombô asu Esaa wom a ne yôp.

^11-12 Mia yen aya? Nge môt a bili mintômba ntet, wua ya été ve jañ, ye a ye bo te liʼi mi mewôm ébul a ébul mi e minkô a ke jeñe wu ô ne njañan?

¹³ Nge a yene wô, ma jô mia bebela na a ye vak a wô a dañe mi mewôm ébul a ébul mi nga bo te jañ.

¹⁴ Avale te nde nkômban ésoo wônan a ne yôp ô né na wua ya ayôme bôte di ô bo te jañ.

Nkobane mejô e zañe bebuni

¹⁵ Nge monyoñ a bo wo abé , kele liti nye nkobane wé mia nye bebaé. Nge a wôʼô wo, ô dutuya monyoñ a bo éñwôé.

¹⁶ Nge a bo te wôʼô wo, nyoñe môte wua mfe nge bebaé éyoñe te ajô da ye kômban anyu bengaa bebaé nge belaa.

¹⁷ Nge a bene wôʼô be, kate de keké; nge a bene fe wôʼô keké, a ntoo ve nyoñe nye ane mone bikuu nge nyoñe toya.

¹⁸ Ma jô mia bebela na: Mam mese mia ye tiñeti e si nyô, ma ye bo ntiñetane yôp, a ma mia ye kuli si nyô, ma ye bo nkulan e yôp.

¹⁹ Ma beta jô mia nyaa njôane na: Nge bebaé ya be mia ba kui tyiñ e si nyô aval ajô ese, jam ba ye sili da ye kui be be e soʼo be Esaa wom a ne e yôp.

²⁰ Yaa! Vôme bôte bebaé nge belaa ba sulan a jôé dam, me ne ézezañe jap.

Ma ye jamé biyoñ tañ aya?

²¹ Eyoñe te Pierre a nga zu nye bebé a sili nye na: Mojañ a ye bo ma abé biyoñe tañ aya me jaméʼé nye? Ye biyoñe zamgbwa?

²² Yésus a nga yalane nye na: Me nji jô wo na a kui biyoñe zamgbwa, ve na zangwale biyoñ mewôme zamgbwa.

²³ Ajô te éjôé ya yôp ja funane njô bôt éziñ nye a nga kômbô bo sitoʼo a bebo bisaé bé.

²⁴ Be nga taté zuu nye môt a nga bili nye mvôla betalañ toyini awôm.

²⁵ Amu a nji bi jôme ya bulane mvôla, nde masa a bendé na be kuan émien a ngal a bone bé a biôme bise a nga bili, asu ya yaʼane mvôla a nga bili.

²⁶ Ane mbo ésaé a nga ku mebo mé si, a kute meboñ a jô nye na: Tame jibi ma, a ma ye bulane wo mvôla ése

²⁷ amu mboone wu ô nga bi nye a kui biôme ya abum été, nde masa mbo ésaé nyô a tii nye ngataʼa a jamé nye mvôla jé.

²⁸ Eyoñe mbo ésaé nyô a kuiya atan, a nga tôban ébe mbo ésaé wé, nyô a nga bili nye bedenié ntet, nde a bi nye a miate nye tyiñ a jôʼô na: Bulaʼan jôm ô bili ma.

²⁹ Eyoñ a kuya si, ébe mbo ésaé wé ate a nga yeʼelane nye a jôʼô na: Jibiʼi ma, ma ye yaʼane wo.

³⁰ Ve nye a nji kômbô, nde a nga futi nye nda mimbôk akekui a maneya yaʼane nye mvôla jé.

³¹ Eyoñe beébe bebo bisaé be yeneya jam é nga boban, be nga wôʼô ôlun abui a ke kañete masa wop ane mam me nga lôt.

³² Nde masa wé a loone nye a jô nye na: A wo mbia mbo ésaé, me nga jamé wo mvôla jôé ése amu ô nga yeʼelane ma;

³³ ngaa wo fe ô nga yiane ko ébe mbo ésaé wôé éngôngo ane ma fe me nga ko wo éngôngo?

³⁴ Masa wé ve zu wôʼô ôlun a kee nye e be minjenjet mi bôt akekui a mane yaʼane tañ ése a bili.

³⁵ Avale te fe Esaa wom a ne yôp a ye bo mia nge mi nji jamé môt ase monyañe wé, njaman wo so nye nlem .