METIAS 17 - Bible en langue Bulu

Yésus a veñesane nyôle jé

¹ E mvuse melu mesaman, Yésus a nga nyoñe Pierre, Yakob a Yôanes monyañe Yakob a kee be e nkôl ô ne ôyabe yôp be too ve be be.

² A nga veñesan ôsu viap a asu dé e nga faé ane jôp. Mengômesane mé ve zu bo éfumulu ane éfufup.

³ Ateme na Môze a Elie be nga yené be be ba be Yésus be laʼan.

⁴ Pierre, ve nyoñe nkobô a jô Yésus na: A Nti! E ne mvaé na bi tabe va: nge wo kômbô, ma ye lôñe menda bindelé mebaé va, wo jia, Môze jia a Elie jia.

⁵ A ngenan a kobôʼô nalé, ateme na nkut wo ngemban ô nga buti be éjijine si, a tyiñ é nga so nkut été na: Nyôna a ne mone wom ma dañe nyeʼe me bili mevak a nye, vôʼôlaʼane nye.

⁶ Awôʼô beyéʼé be nga wôʼô nalé, be nga ku mesu me butu si a dañe ko woñ.

⁷ Nde Yésus a nga subu a nambe be a jô na: Kôlaʼane si a te koone woñ.

⁸ Eyoñe be nga bete mis, be nji fe yene môt, ve Yésus a too étam.

⁹ Eyoñ be nga siliki nkô, Yésus a nga bendé be na be bo te kate môt jam ba te yen akekui éyoñe mona môt a wômôya miñwuan.

¹⁰ Ane beyéʼé bé be nga sili nye na: Amu jé beyeme bekalate ba jô na Elie a yiane taté beta so?

¹¹ Nye be na: Elie a zu foʼo a a ye mane kôme mam mese.

¹² Ve mia ñhe ma kate na Elie a soya so, ve be nji kômbô yeme nye, be nga bo nye ane ba kômbô; nalé fe mona môt a yiane tôbane njuʼu be be.

¹³ Nde beyéʼé be nga yeme na a nga kobô be ajô Yôanes Babtist.

Yésus a saé nkon ésesé

¹⁴ Akui be kuiya vôme jama bôt a nga too nde môt éziñ a nga zu be nye a kute meboñe si ôsu vié

¹⁵ a jô na: A Nti, koo monafame wom éngôngo, amu a kon ésesé a wôʼô fe mintaé abui, nalé a ne na biyoñ bi a ku e nduan a bivok a ku e mendim.

¹⁶ Ma te liti nye beyéʼé bôé, ve be nji kui na be saé nye.

¹⁷ Yésus a nga yalan a jô na: A miaé bôt ô ne te mbunan a abé , bia be mia bia ye tabe a kui éyoñ évé? Ma ye jibi mia a kui éyoñ évé? Zaʼane ma nye vana.

¹⁸ Ane Yésus a nga bamé wô a mbia nsisim a nga kôlô be nye a mongô a nga bo mvoʼé awolo te ebien.

¹⁹ Eyoñe be zuya nye bebé, nde beyéʼé ba sili Yésus vôm étame na: Amu jé bi nga kate vaa wô?

²⁰ Yésus nye be na: Amu tyôtyoé mbunane jenan; ma jô mia bebela na: nge mi bili mbunan ve abime fes ôndôndôô, mia ye jô nkôle wuna na: Kôlôʼô va ô ke li, wô ve kôlô a teke jam mia ye kate bo.

Ba ye kuane mona môt

^21-22 Eyoñe te be bulaʼan e Galilé, Yésus a nga jô be na: Ba yiane ve mona môt e mo me bôt;

²³ a ba ye wôé nye, ve môse lale a ye wômô. Ajô te be nga dañe wôʼô ôlun.

Yésus ba Pierre ba yaʼane toya

²⁴ Eyoñe be keya kui Kapernawum, nde bôte ba nyoñe toya be nga subu Pierre bebé a jô na: Ye masa wônan a nji yaʼane toya ya nda Zambe nga?

²⁵ Nye na: Yaa, a yaʼan! Eyoñ a keya nda , Yésus a zu tôbane nye a jô na: Wo yen aya a Simon? Bejô bôte ya si nyô ba nyoñe toya mevale meva e be beza? Ye e be bone bap, ye e be beyeñ?

²⁶ Pierre na: E be beyeñ; Yésus a nga jô nye na: Ke bone bap be ne ñhe fili te yaʼane nga?

²⁷ Ve asu ya bo te kolé be ôbak, kele kui e mañ, ô wua nnop a kos ja ye taté bili, nyoñe je ô kui je anyu, wo ye koone nsañ moné tañe betoya bebaé, nyoñe wô a ve be asu dam a asu dôé.