METIAS 16 - Bible en langue Bulu

Befarizieñ a Besadusieñ ba kômbô yen étua jam

¹ Nde Befarizieñ a Besadusieñ be nga zu, asu ya veʼele nye, a sili nye na a liti be ndem ja so yôp.

² Nye ve yalan a jô be na: Eyoñe ngôʼé é kuiya, mia jô na: Eyoñ é ne abeñ amu yôp é ne évele;

³ mametyé ke na: Den, nkulu a ye vuñ, amu yôp e ne ane évele ane ékukut: nde, mia yeme yemelan avale yôp e né, ve mendeme ya biyoñ, mi te nguleya yemelane me!

⁴ Mvoñe bôt é ne abé a mejian ja yi ndem! Mfaʼa ajô ndem, ba ye bo te liti be fe ve nyô Yôna. Ane a nga liʼi be a ke.

Mvusu Befarizieñ a Besadusieñ

⁵ Eyoñe be keya e kindiʼi fok, beyéʼé be nga vuane nyoñe belet.

⁶ Yésus nye be na: Ntyee! Balaʼane miabebien mfaʼa mvusu Befarizieñ a Besadusieñ!

⁷ Mfaʼa wop, be nga bili ôsimesane vina na: E ne na bia te vuane nyoñe belet.

⁸ Ve Yésus a nga yeme nalé a jô be na: A bôte ya ôyôme mbunan amu jé mia fas abui ajô ya na mi nji bi belet?

⁹ Mi ngenan te wôʼô nga? Ye mi teke simesane belet étan, asu bôte toyini étan, a tañe minkoé mi nga kee je?

¹⁰ Nge belet zamgbwa asu bôte toyini ényin a tañe minkoé mi nga kee je?

¹¹ Mia kate wôʼô aya na me nji kobô mia ajô belet éyoñe me mbe me jôʼô mia na: Balaʼane miabebien mfaʼa mvusu Befarizieñ a Besadusieñ!

¹² Nde be nga yeme na a nji jô na be baʼale bebien mfaʼa mvusu belet, ve mfaʼa nyeʼelane Befarizieñ a Besadusieñ.

Pierre a kulane na: Yésus a ne Mesi

¹³ Eyoñe be kuiya éfuse si Sézaré ya Filip, Yésus a nga sili beyéʼé bé na: Bôte ba jô na mona môt a ne za?

¹⁴ Be na: Mfaʼa bevok, a ne Yôanes Babtist, ba bevoʼo ke na Elie a bevoʼo ke Yérémi nge wua ya bekulu mejô.

¹⁵ Nye be na: Ve mia mia jô na me ne za?

¹⁶ Simon Pierre ve nyoñe nkobô a yalane nye na: Ô ne Krist e mona vevea Zambe.

¹⁷ Yésus a nga beta nyoñe nkobô a jô nye na: Mvom a wo Simon, e mone Yôna, amu saa ke minsôn nge metyi mbie bia te kulane wo jame te, ve Esaa wom a ne yôp.

¹⁸ A ma ma jô wo na: Ô ne Pierre, a akoʼo te yôp, ma ye lôñe keké jam, a mimbé yʼétôtôlan mia ye bo te dañe je ngu.

¹⁹ Ma ye ve wo bidibaʼa ya éjôé ya yôp; jam ese wo ye kañese e si nyô da ye kañeseban e yôp a e jam ese wo ye ben e si nyô, da ye beneban e yôp.

²⁰ Ajô te a nga bendé beyéʼé a ayoʼo ese na be bo te kate môte na a ne Krist.

Yésus a kate foé ya awu a ñwômane wé

²¹ Ataté éyoñe te, Yésus a nga taté na a kobô beyéʼé béé ne ngeññ na: Ma yiane kee Yérusalém na me tôbane njuʼu abui e be bemvendé, bivete betuni a beyeʼele metiñ. Ma ye wôéban, ve môse lale, ma ye wômô.

²² Pierre, éyoñ a dutuya nye be tebe bebaé, a nga taté na a bamé nye na: Zambe a kamaʼane wo, a Nti! Momo, avale jame te da ye bo te kui be wo!

²³ Ve nye, éyoñ a veñesaneya, a nga jô Pierre na: Kôlôʼô! Kele ma mvus, a Satan! Ô ne ma ékolé ôbak, amu avale wo yene mam e nji bo di Zambe, ve di bôt.

²⁴ Nde Yésus a jô beyéʼé bé na: Nge môt a kômbô tôñe ma, a tame ben émien, a bekeʼe krôa jé a a zaʼa tôñe ma.

²⁵ Bebela na: Nyô a kômbô kaman ényiñe jé a ye dimili je, ve nyô a dimili ényiñe jé amu ma, a ye je beta bi.

²⁶ Mfi jé môt a ye yene na a nyoñe si nyô ése ve a viane jañele nsisime wé? Nge na, jé môt a ye ve mvol a nsisime wé?

²⁷ Amu mona môt a ye zu a beéngele béé étôtoʼo Esaa été: éyoñe te a ye yaʼane môt ase a ne mimboone mié mi né.

²⁸ Ma jô mia bebela na: bôte bʼéziñ ya ba be ne va ba ye bo te wu ve tame yene mona môt a zaʼak aval ane njô bôt.