METIAS 15 - Bible en langue Bulu

Metiñ me Zambe a mefulu ya nlam

¹ Ane Befarizieñ a beyeme bekalate ya Yérusalém be nga zu be Yésus a jô nye na:

² Amu jé beyéʼé bôé ba tyame biyem bi bôbetô? Amu na be ne te sôbe mo éyoñe ba di.

³ A nga yalane be na: Mia ki, amu jé mia tyame abendé Zambe a jôé ya biyeme bienan?

⁴ Ke Zambe a nga jô na: Seméʼé ésoo baa nyua, a na: Nyô a yoʼé ésaa nge nyia, a yiane wôéban.

⁵ Ve mia mia jô na: Nyô a jô ésaa nge nyia na: Mvolan ô nga yiane nyoñe be ma ô ntoo mvean ô ne étyi,

⁶ môt ate aa bili ke na a semé ésaa wé. A nalé ate mia tyame nkobô Zambe a jôé mefulu menan.

⁷ A bôte bebaduʼu! Ezayi a nga tuʼa kulu ajô denan éyoñ a nga jô na:

⁸ Bôte bana ba semé ma biyaé ve minleme miap mi ne ma ôyap.

⁹ Ba kañe ma e zezé amu miñyeʼelane miap mi ne foʼo ve mi mi bôt.

¹⁰ Nde a loone jama bôt a jô nye na: Vôʼôlaʼan a wôʼan!

¹¹ Saa ke jôm ja nyiin anyu nje ja ve môte mvin; ve ji ja so anyu, nje ja ve môte mvin.

¹² Beyéʼé be nga subu nye bebé a jô nye na: Ye wo yeme foʼo na Befarizieñ ba te koleban ôbak éyoñ ba te wôʼô éfia te?

¹³ Nye be na: Atôʼô mvoñ ese ésaa wom a ne yôp a nji bé da ye tébane si.

¹⁴ Jôkaʼane be be ne mindindim mia yaʼale mindindim mivok. Ve nge ndindim wo wulu wu ôvok, mibaane mia ye ku ébé!

¹⁵ Ane Pierre a nga yalan a jô nye na: Timiʼine bia nkana .

¹⁶ Nye na: Ye éyoñe jia éfe jina mi ne te yeme wôk?

¹⁷ Ye mi ne te yeme yene na jôme ja nyiin anyu ja lôt abum a mevôme yʼabum été a suʼulane kui atan?

¹⁸ Ve biôm bia kui anyu bia so e nlem a biôme bite mbie bia ve môte mvin?

¹⁹ Mam ma so môte nlem me ne na: Mbia minsôñan, mewôé me bôt, mejian , mbia dulu, wup, bibôta, nkobô ébiasé.

²⁰ Mam mete mme ma ve môte mvin. Ndian te taté sôbe mo ô nji ve môte mvin.

Mbunane minga a mbe ngone Bekananééñ

²¹ Akôlô ya valé, Yésus a nga ke mefôla ya Tir a Sidoñ.

²² Ateme na minga Bekananééñ ya mefôla mete a nga zu a yôn a jôʼô na: A Nti, e mone David, koo ma éngôngo! Ngo jam ja kone mbia nsisim .

²³ Yésus a nji yalane nye toʼo vʼajô da. Nde beyéʼé béé ba zu nye bebé a jô nye na: Titaʼane nye amu a yône bia mvus.

²⁴ Yésus na: Me nga lômban vʼasu mintômba ya nda Israél mi ne njañan.

²⁵ Minga ve zu ku bubutu ôsu vié nye na: A Nti, volôʼô ma!

²⁶ Yésus na: E Nji bo mvaé ya nyoñe belete bon a wua je bone bemvu.

²⁷ Minga nye na: Yaa a Nti, e ne fe bebela na: Bone bemvu ba di afufus da ku e tawôlô si masa wop.

²⁸ Yésus a nga yalan a jô nye na: A minga, mbunane wôé ô ne anen! E boʼo wo ane wo kômbô. Nde ngo jé é nga bo mvoʼé awolo te ebien.

Minkôkon ya ékôte mañ

²⁹ Eyoñ a kôlôya vôm ate, Yésus a nga zu nsaʼa mañ ya Galilé, e bete nkô, a tabe si valé.

³⁰ Bizuʼu minsamba mi bôt bi nga zu nye bebé bi bili mimbôbôk, mindindim, miñyeyem, mindôndok a befe abui; nde be nga ku nye mebo a a nga saé be;

³¹ jama bôt a nga kam éyoñ a nga yen ane mimvumvuk mia kobô, mimbôbôk mia bo mvoʼé , miñyeyem mia wulu a mindindim mia yen; ane be nga ve e Zambe Israél duma.

Yésus a ve bôte bidi

³² Yésus a nga loone beyéʼé bé a jô na: Ma wôʼô jama bôte nyô éngôngo, amu be ntoo fefele den môse milaa te jôme ya di, a me nji kômbô suu be teke abel anyu, be za kuu some zen .

³³ Beyéʼé be nga jô nye na: Nne belet é ne yian abime ézuʼu bôte di fé été va ja ye so bia vé?

³⁴ Yésus a nga jô be na: Mi bili belet jañembé? Be na: Zamgbwa a tyôtyoé kos.

³⁵ Nde a bendé jama bôte na a tabe si;

³⁶ ve nyoñe belet zamgbwa a kos; éyoñ a maneya yeʼelan, a nga beʼe je a kalane je beyéʼé, be ki be nga ve je minsamba mi bôt.

³⁷ Bese be nga di a jaé. Afufus e nga buk, be nga vaa de minkoé zangwale njalan.

³⁸ Ba be nga di be mbe, befam toyini ényin, te lañe binga nge bongô.

³⁹ Eyoñ a maneya suu minsamba mi bôt, a nga dañ éfunga été a ke mfaʼa bifuse bi si ya Magadan.