METIAS 13 - Bible en langue Bulu

Minkana ya éjôé

¹ Môs ôte, Yésus a nga kôlô nda a ke tabe e nsaʼa mañ.

² Ane bizuʼu bi bôt bi nga sulane nye bebé, nde a nga jibi dañ e bial a tabe été; jama bôt a nga tele e kindik.

Nkana mmiase mvoñ

³ A nga kobô be abui mam a minkana nye na: Mmiase mvoñ a nga kui, asu ya miase mvoñ,

⁴ ésaé zañe, va, nde mefese me mvoñ mevok ma ku e fefele zen; anone ya yôp ve so a mane di me mese.

⁵ Mevok me nga ku e vôme mekok me né, e vôme metek me nji bo abui; me nga jiʼa faa amu metek me nji bo édok;

⁶ éyoñe jôp é nga tôô, me nga dik a amu me mbe teke minkañ, nde me nga mane viele.

⁷ Mefese mevok me nga ku e biyo été, nde biyo bi nga yaé a mane wôé me.

⁸ Mevok me nga ku e mbamba si, a wume bibuma, foʼo éziñ ntet nyô fok mewôm mesaman a nyô fok mewôm mela!

⁹ Môt a bili melo ya wôk a wôʼôk!

¹⁰ Ane beyéʼé be nga zu bebé a sili nye na: Amu jé wo kobô be a minkana?

¹¹ A nga yalane na: Amu é ne mia mvebane na mi yem minsolane mi mam yʼéjôé ya yôp, ve mfaʼa balé bete, e nji bo be mveban.

¹² Amu nyô a bili nye ba ye beta ve a a ye nyiñ abui afok été; ve nyô a nji bi, ba ye vaa jaʼane jôm a bili.

¹³ Ajô te nde ma kobô be a minkana; amu ba fombô ve teke yen, ba kee melo ve teke wôk.

¹⁴ A mejô nkulu mejô Ezayi a nga kobô ma tôéban mfaʼa wobe na: Mia ye juʼu baé melo ve teke wôk, mia ye juʼu fombô ve teke yen

¹⁵ Amu minlem mi bôte bana mi maneya bo afip be maneya bo ayet mfaʼa ya melo map, be maneya buti mise map na be bo te vôʼôlô a melo map na be bo te wôk a minleme miap. A na be bo te kôñelane minlem. A me nga ye bo be mvoʼé .

¹⁶ Ve mia, mise menan me ne mevak amu ma yen, melo menane fe avale da amu ma wôk.

¹⁷ Ma jô mia bebela na: Abui bekulu mejô, abui bezôsôô be bôt be nga kômbô yene mam mia yen, ve be nji yene me, be nga kômbô wôʼô mam mia wôk, ve be nji wôʼô me.

Atinane nkana mmiase mvoñ

¹⁸ Mia, vôʼôlaʼane ñhe nkana mmiase mvoñ:

¹⁹ Nyô ase a wôʼô mejô yʼéjôé ya yôp teke me nyoñ, nalé a ne na nduʼu bôt a so a nyoñe jôm é nga béban e nleme wé été; avale te nde mvoñ é nga béban fefele zen é né.

²⁰ Mvoñ é nga béban e mevôm me ne mekok é ne môt a ne na, nné ane a wôʼô mejô me Zambe, ve jiʼa nyoñe me a mevak;

²¹ ve a nji bi minkañ e be émien, a ne môte ya mone nté, nné ane ôlun a étibelaʼa bia so amu mejô me Zambe nye ve ku.

²² Mvoñ é nga béban e biyo été, é ne môt a wôʼô mejô me Zambe ve nyeʼane mam ya si nyô a akum yʼété bia mane tibi me yôp, môt ase a liʼi teke bibuma.

²³ Mvoñ é nga béban e mbamba si é ne môt a wôʼô mejô me Zambe a nyoñe me: éyoñe te a beʼe bibuma a wum fese jia ntet, nyô fok mewôm mesaman, a nyô fok mewôm mela.

Mbia élok

²⁴ A nga beta liti be nkana ôfe na: Ejôé ya yôp ja funane môt a nga bé mbamba mvoñ afube dé été.

²⁵ Nté bôt be mbe ôyo, nde nsiñe wé a nga zu a miase mbia élok ézezañe blé a bulan.

²⁶ Eyoñe mvoñ é nga faa a wume bibuma, éyoñe te mbia éloʼo fe a nga yené.

²⁷ Ane bebo bisaé be mie ndaa be nga zu be nye, a sili nye na: Ye sa mbamba mvoñ nye ô nga bé afube dôé été? Amu jé mbia élok a yené été.

²⁸ Nye ki a nga yalane be na: Ke môt a vini ma nye a nga bo ésaé te. Bebo bisaé be nga sili na: Ye bi ke mane té mbia éloʼo si?

²⁹ Nye be na: Momo a za bo na éyoñe mia té mbia élok, mi nga viane té ba be blé nsamba wua;

³⁰ jôkaʼane bebaane be yaé éyoñe jia akekui éyoñe ya nkôane bidi. A éyoñe mvaane bidi mefup wo ye kui, ma ye jô bekôane bidi na: Tataʼa vaane mbia élok a kaʼa nye mimbom asu ya diʼi mie, ve kôʼane blé angune dam.

Fes ôndôndôô

³¹ A nga ku be nkana ôfe a jô na: Ejôé ya yôp ja funane fes ôndôndôô nje môt a nga nyoñ a ke mias afube dé.

³² Fes éte é ne foʼo tyôtyoé a lôte memvoñ mese ve éyoñ é yaéya, ja bo anen a dañe bijebejeba bivok a ja bo élé a kui na anone ya yôp da zu bebe été a lôñe mumbaʼa e mintyaé mié.

Jôm ja vusu avut

³³ A nga ku fe be nkana ôfe a jô na: Ejôé ya yôp ja funane jôm ja vusu avut nje éte, éyoñe minga a nyoñeya je a nga solé je e mveʼan avut biyoñ bilal été a kui avut ése da mane vus.

Yésus a ku minkana amu jé?

³⁴ Yésus a nga kobô jama bôt mam mete mese e minkana; a nji kobô be jam éziñ te minkana:

³⁵ nalé jame nkulu mejô a nga jô da ye tôéban na: Ma ye kui anyu dam a minkana, ma ye kobô mam me nga soléban ataté éyoñe si nyô é nga téban.

Mesuu me nkana mbia élok

³⁶ Nde éyoñ a maneya suu jama bôt, ane a nga ke e nda jé. Beyéʼé bé be nga zu vôm a nga too a jô nye na: Kate bia mesuu me nkana mbia élok ya afup.

³⁷ Nde a yalane be na: Mmiase mbamba mvoñ a ne Mona môt.

³⁸ Afup e ne si nyô; bone yʼéjôé mbe be ne mbamba mvoñ; bone be satan mbe be ne mbia élok.

³⁹ Nsiñ a nga miase mbia mvoñ a ne satan; éyoñe nkôane bidi ô ne asuʼulan; bekôane bidi be ne beéngele.

⁴⁰ Tukaʼa yemane na avale ba nyoñe mbia élok a diʼi nye nduan, nalé ate a ye boban asuʼulan.

⁴¹ Mona môt a ye lôme beéngele bé, ba ye nyoñe mam mese ma kolé bôt ôbak a ba bese ba bo abé ,

⁴² a kee be atane ya éjôé jé, ba ye wua be mbeʼe nduan été, e wé a ye bo ve du a nlatane mesôñ.

⁴³ Wôna bezôsôô be bôt ba ye faé ane jôp e Ejôé ésaa wop. Nyô a bili melo, a wôʼôk.

Akume é solô

⁴⁴ Ejôé ya yôp ja funan akum be nga solé afup nde môta binam, éyoñ a someya de, a nga solé; amu mevak a nga bili, nde a ke a kuane biôme bise a bili a kus afube te.

Atabe e ne édima

⁴⁵ Ejôé ya yôp ja beta fe funane mbo makit éziñ a mbe a jeñe metabe me ne abeñ.

⁴⁶ Eyoñ a yeneya atabe e ne édima, a nga ke a kuane biôme bise a nga bili a kuse de.

Nkana avot asu kos

⁴⁷ Ejôé ya yôp ja beta fe funan avot é ne ñwuan e mañ a nde da bi mevale me kos mese.

⁴⁸ Eyoñ é jaéya a be dutuya de e kindik, bôt ve tabe si a futi mbamba kos e minkoé été a wua nyô é ne ébo atan.

⁴⁹ Nalé ate nye a ye boban asuʼulan: beéngele ba ye zu a kandé mbia be bôt ézezañe ya ba be ne zôsôô

⁵⁰ a wua be e mbeʼe nduan; e wé a ye bo du a nlatane mesôñ.

⁵¹ Ye mi maneya wôʼô mam mete mese? Beyéʼé na: Yaa!

⁵² Nye be na: Amu ajô te nde mfase bekalate ase a ntoo ñyeʼé ya éjôé ya yôp a funane mmie ndaa a kuli akume dé atan mimfefé mi biôm a minnôm mi biôm.

Ba biasé Yésus e Nazarét

⁵³ A nga bo na, éyoñe Yésus a maneya ku minkana a nga kôlô valé.

⁵⁴ Eyoñ a kuiya vôm a nga bialé (Nazarét), a nga yeʼele bôt e meba me Zambe map a kui na be vembe be siliʼi na: Fek a bitua bi mam bia so nyôna vé?

⁵⁵ Ye sa mona kabinda nyô? Ye nyia wé a nji bo jôé na Marie? Bobenyañe ke na: Yakob a Yôsep, Simon a Yudas?

⁵⁶ Ye bekale bé bese be nji bo be bia va? E mam mese ma ma so nye vé?

⁵⁷ A nga bo be na be kolôban ôbak. Yésus nye be na: Nkulu mejô a biasébane foʼo ve si jé a nda jé.

⁵⁸ Amu be mbe te mbunan (mfaʼa wé) nde a nga bo te bo abui bitua bi mam.