METIAS 12 - Bible en langue Bulu

Beyéʼé ba wondé fese ya di

¹ Melu mete, Yésus a lôte mefube me fôn e môse Sabat. Beyéʼé béé be nga wôʼô zaé a taté na ba buk a di je.

² Eyoñe Befarizieñ be yeneya jame te be nye na: Yenek, ane beyéʼé bôé ba bo jam é nji bo nkañesane ya boban e môse Sabat.

³ A nga yalane be na: Ye mi nji lañe jame David a nga bo, éyoñ a nga wôʼô zaé, émien a bôte ya nsamba wé,

⁴ ane a nga nyiin e nda Zambe, ane be nga di belet ya mimvean, nje éte, toʼo émien, toʼo bôte ya nsamba wé be nji bi ngule ya di, vengevenge ve betuni?

⁵ Nge na, ye mi nji lañ e kalate metiñe na: E môse Sabat e nda Zambe été, betuni ba tyam étyi ya Sabat, nalé te lañebane be ane ékop?

⁶ Ve me ma kate mia na ndañe nda Zambe a ne va.

⁷ Nge mi too yem atinane ya ajô di: Nkoon éngôngo ñwô ma yi sake étyiʼa metunaʼa, mi nji ye ve bôte ba mekua mbe be nji bo ékob été,

⁸ amu Mona Môt a ne njôô Sabat.

Yésus a saé môte wo e môse Sabat

⁹ Akôlô ya valé, a nga ke mfaʼa ya aba Zambe dap a nyiin été!

¹⁰ Nde môt éziñ a mbe valé wo ñyemelan; be ve sili nye nsili wu na: Ye e ne nkañesane ya saé môt e môse Sabat? Nalé a mbe asu ya boʼolô nye.

¹¹ Ve a nga yalane be na: Za ya be mia, nge a bili ve ntômba wua, wô ve ku ébé été e môse Sabat, a ye bo teke nyoñe wô a dutu wô ébé?

¹² Kô fé môt a dañe ntômba! Ajô te ñhe e ne nkañesane ya bo mvaé e môse Sabat.

¹³ Nde a jô môt ate na: Same wo. Ane a nga same wô a ô nga bulane bo mvoʼé ane wu ôvok.

¹⁴ Befarizieñ, nné ane be nga kui atan, be nga tebe ésoʼo ya jeñ ane be ne bo na a wu.

Mbo ésaé wom nye nyô

¹⁵ Eyoñe Yésus a wôʼôya de, ane a nga kôlô valé. Abui bôt e nga tôñe nye; a nga saé be bese.

¹⁶ A nga bendé be a ayoʼo ese na be bo te bo na bôt be yeme nye,

¹⁷ nalé ate jame nkulu mejô Ezayi a nga jô da ye tôébane na:

¹⁸ Mbo ésaé wom me nga top nye nyô, nyô ma dañe nyeʼe me nga yene mvaé ya top, ma ye futi e nsisime wom e be nye, a a ye kate foé metiñ e be meyoñ me bôt.

¹⁹ A ye bo te jeñe mintañete, a ye bo te yôtane tyiñ , tyiñe jé ja ye bo te wôʼé minseñ.

²⁰ A ye bo te buʼu nden é maneya tyaʼé, nge dime nsañ ô ngenan ô kui ôtita akekui a wuluya metiñ a kui ndañan.

²¹ Meyoñ me bôt ma ye futi ndi minleme jap e be jôé déé.

Yésus baa Bélzébul

²² Nde be nga zuu nye môt a bili mbia nsisim , ndindim te kobô; a nga saé nye a kui na mvumvuk ô kobô a a yen.

²³ Jama bôt a mbe a jôʼôk, feʼe ne vema na: Ye nyôna a se mona David?

²⁴ Ve Befarizieñ, éyoñ be wôʼôya jame te be nga jô na: Nyôna a vaa mimbia minsisim ve a ngule Bélzébul, évete mimbia minsisim.

²⁵ Eyoñ a yemeya asimesane dap, a nga jô be na: Ejôé ése ja salé a wosan ébien ja ye tyamban; teke tison nge nda bôt ja salé a wosan ébien ja ye tabe.

²⁶ Nge Satan a titane Satan, a saléya zañ a wosan émien: éjôé jé é ne nguleya tabe aya?

²⁷ A nge a ngule Bélzébul nje ma ma vaa mimbia minsisim, beyéʼé benan be ba vaa mie a ngule za? Bebien ba ye bo betyiʼi mejô benan.

²⁸ Ve nge ma vaa mimbia minsisim a ngule Nsisime Zambe, yemane ñhe na éjôé Zambe é kuiya be mia.

²⁹ Nge na: Môt éziñ a ne nguleya nyiin e ndaa ngungule môt aya a mane nyoñ akume dé, nge a nji taté mane kaʼa ngungule môt? A suʼulane zu sa nda jé.

³⁰ Nyô bia nye bi nji bo nsamba a wosane ma, a nyô bia nye bi nji kôan a tyamelan.

³¹ Ajô te ma jô mia na: abé ese a nkobô ébiasé ôse wo ye jamban e be bôt ve nkobô ébiasé mfaʼa Nsisim wo ye bo te jamban.

³² A nge môt éziñ a kobô mona môt abé jame te da ye jambane nye, ve nge a kobô Mfufube Nsisim abé , jame te da ye bo te jambane nye nge émo ji nge émo ja zu.

Môt a kobô mam ma so nlem

³³ Veʼane feʼe na élé é ne mbamba élé: ébuma jé ja ye bo abeñ; ve veʼane feʼe na ja kon: ébuma jé ja ye kon: ébuma jé ja bo na be yem ane élé é né.

³⁴ A mvoñe mekpwe, mi ne jô mbamba be mam aya mi too mbia be bôt? Amu jam anyu da jô e ne di da fuluku nlem .

³⁵ Mbamba môt a nyoñe mbamba be biôm e mbamba mefoʼo mé été; mbia môt a nyoñe mbia be biôm e mbia mefoʼo mé été.

³⁶ Ve ma jô mia na: bôt ba ye bo sitoʼo ya minsose mise be nga kobô e môse ntyiʼane mejô.

³⁷ Amu minkobô miôé mmie mia ye kale wo a minkobô miôé fe mia ye kpwé wo.

Ndeme Yôna

³⁸ Eyoñe te beyeme bekalate a Befarizieñ bʼéziñ be nga nyoñe nkobô na: A Nyeʼele, bia kômbô na ô liti bia ndem éziñ.

³⁹ A nga yalane be na: A mia bôt ô ne abé a mejian wo sili ndem! Mfaʼa ajô ndem, fe ja ye bo te veban, ve ndeme nkulu mejô Yôna.

⁴⁰ Amu avale Yôna a nga tabe abume kos été môse milaa a melu melaa, nalé mona môt a ye tabe si été môse milaa a melu melaa.

⁴¹ Eyoñe ntyiʼane mejô, bôte ya Ninive ba ye tebe a miaé wu a ve wô mekua, amu be nga kôñelane minlem nkatane foé Yôna; yaa! Jame da dañe Yôna e ne va.

⁴² Eyoñe ntyiʼane mejô, njô bôte ya jôbe da dim a ye tebe a bôte ya miaé wu a ve be mekua amu a nga so akuʼu si asu ya zu wôʼô feʼe Solômon; yaa! Môt a dañe Solômon a ne va.

Mbia nsisim a beta so

⁴³ Eyoñe nsisim ô ne mvit ô kôlôya be môt, ô nga ke wo vôm e bifuse bi si bi bi ne ayet asu ya jeñ awoʼon, ve teke yen.

⁴⁴ Eyoñe te wo jô ôbiene na: Ma zu bulan e nda jam, e vôme me nga so. Nkuane wé, ve koone je teke môt, mvosan, nkôman.

⁴⁵ Eyoñe te a ke nyoñe minsisime mife mi ne mvit a dañ ôbien zamgbwa, be nyiin a tabe été. Asuʼulane môt ate da zu bo abé a dañe di ôsu. Nalé ate fe da ye kui e be miaé bôt ô ne abé wu.

Beza be ne nda bôte Yésus

⁴⁶ A ngenan a kobôʼô a ba bôtô nalé, e teme na nyia a bobenyañ be ntele atan, be jeñe na be kobô nye.

⁴⁷ Nde môt éziñ a jô nye na: Tame yen, nyua a ésoo be tele atan, be jeñe na be laane wo.

⁴⁸ Yésus a nga yalane môt a ndôme kobô nye na: Za a ne nyia wom a beza be ne bobejañ?

⁴⁹ Ve liti beyéʼé béé a wo nye na: Nyia wom a bobejañ mbe ba;

⁵⁰ Nyô ase a bo nkômban ésaa wom a ne yôp, nye a ne mojañ, kale jam a nyia wom.