METIAS 11 - Bible en langue Bulu

¹ Eyoñe Yésus a maneya ve beyéʼé béé awôm a bebaé miñyeʼelane mite, a nga téé valé na a ke a yeʼele a kate Mbamba Foé e bitisone biap.

² Nde a kooé Yôanes e nda mimbôʼô été, éyoñ a wôʼôya be kobôʼô ajô mame Krist a bo, ane a nga lôme beyéʼé béé be sili nye na:

³ Ye wo ô ne nyô a yiane zu, ye bia yiane yange mfe?

⁴ Yésus a nga yalane be na: Kela katane Yôanes mam mia wôk a yen:

⁵ mindindim mia yen, e bôte ba feñke ba wulu mvoʼé , minzezam mia tuneban a mindôndok mia wôk, mimbim mia wômô a Mbamba Foé a kateban e be bingôngole bi bôt;

⁶ mvom a nyô a ye bo te ku amu ma.

⁷ Be bulaʼan, nde Yésus a taté na a kobô jama bôt ajô Yôanes: Jé mi nga yene nkôte si? Ye nden évuñulu ja fôʼô?

⁸ Nde ñhe jé mi nga ke yen? Ye môt a beʼe nyanga mimbot? Ve ba be beʼe nyanga mimbot be ne e menda bejô bôt.

⁹ Nde ñhe jé mi nga ke yen? Ye nkulu mejô? Yaa, ma jô mia na, a dañe nkulu mejô.

¹⁰ Nye a ne nyô ajô dé e ne ntilane na: Ô lôô, ma lôme nkatefoé wom ôsu viôé; a ye kôme zene jôé ôsu viôé.

¹¹ Ma jô mia bebela na e zañe ya ba bese be nga bialé be minga, teke wua yʼété a nga tebe a too éwôlô ane Yôanes Babtist; ve da, nyô a dañe tyôtyoé éjôé ya yôp a ne éwôlô a dañe nye.

¹² Ataté melu Yôanes Babtist a kui den, éjôé ya yôp ja nyoñeban a ngu; bôte be ne ngu mbe ba wôlé je.

¹³ E ne foʼo na bekulu mejô bese, nalé fe metiñ, be nga kulu mejô a kui melu Yôanes.

¹⁴ Nge mia tuʼa kômbô wôk, nye a ne Elie a yiane beta so.

¹⁵ E môt a bili melo, a wôʼôk!

¹⁶ Ma ye funane miaé wuna za? Be ne veʼane wô a bongô be too bito, mbe ba loone ba bevok:

¹⁷ Bi maneya loñe mia mfañ, ve mi nji jem! Bi maneya yia jia awu, mi teke yôn!

¹⁸ Amu e ne foʼo na Yôanes a soya nye te di, te nyu, be na: A dimiliya fek.

¹⁹ Mona môt a soya, a di a nyu, be na: Yenane seba a nsoʼo bilam, mvôé benyoñe toya a bebo abé ! Ve fek é kabeya amu mimboone mié.

Yésus a yône bitisone ya Galilé

²⁰ Nde a nga taté na a ve bitison bijô e vôme beta ngabe ya bitua bi mam bié a nga boban, amu bi nji ke kôñelane minlem.

²¹ Engôngol a wo a Korazin! Engôngol a wo a Bétsayida! Amu nge bitua bi mam bi nga bobane be mia bi nga ye boban e Tir a Sidoñ, ve be nga ye kôñelan a ayap e nkuta a asup été.

²² Yaa, ma jô mia de na e môse ntyiʼane mejô, mia ye dañe tôban ayaa a dañe Tir a Sidoñ.

²³ A wo, a Kapernawum, ye wo ye beteban a kui yôp? Wo ye sis a kui vôme miñwuan mi too! Amu nge bitua bi mam bi nga bobane be wo bi nga ye boban e Sodom, ve a ngenan a kui den.

²⁴ Ajô te, ma kate mia de, e môse ntyiʼane mejô, wo (Kapernawum) ye dañe tôban ayaa a dañe Sodom.

Esaa ba mon

²⁵ Eyoñe te Yésus a nga nyoñe nkobô a jô na: Ma ve wo duma, a Tate, Nti ya yôp a si amu ô nga solé mimfefek a mintyetyeñ mam mete a amu ô nga kulane me bone be bongô.

²⁶ Yaa a Tat, e mvame jôé été, nne ô nga taʼa me nalé.

²⁷ Esaa wom a nga ve ma mam mese. Te ke môt a yeme mon, vengevenge ve Esaa, a teke môt a yeme Esaa, vengevenge ve mon, a nyô mon a kômbô nye liti.

Nyôñane mbeʼe mon

²⁸ Zaʼane be ma, mia bese mia wôʼô njuk amu adite mbeʼe a ma ma ye ve mia awoʼon.

²⁹ Bekaʼan éboñeté jam a yékaʼane be ma, amu me ne évôvoé a nleme njeʼebane si a mia ye yen awoʼone ya minsisime mienan.

³⁰ Yaa, ébôñeté jam é ne tyiʼibi ya beʼe a mbeʼe wom éveves.