METIAS 10 - Bible en langue Bulu

Beyéʼé awôm a bebaé ba ke nlôman

¹ Eyoñ a looneya beyéʼé bé awôm a bebaé, Yésus a nga ve be ngu e be mimbia minsisim na be vaa mie, na be saé aval ôkon ese a aval éyem ése.

² Biyôlé minlôman awôm a mibaé mbie bi: wu ôsu, Simon, nye ba loone na Pierre, a André, monyañe wé; Yakob, e mone Zébédé a Yôanes, monyañ;

³ Filip a Bartélémi; Tômas a Metias, nyoñe betoya; Yakob e mone Alfé a Tadé;

⁴ Simon nkaman ayoñ a Yudas Iskariôt nyô émien a nga koñe nye.

⁵ Eyoñe Yésus a nga lôme minlôman awôm a mibaé mite, a nga jô be na: Te nyôñane zene betebuni a te nyian e tisone bôte ya Samari;

⁶ ve nne kelan mfaʼa mintômba yʼayoñ Israél mi ne njañan mi né.

⁷ E zen , yôtaʼane na: Ejôé ya yôp é ntoo bia bebé.

⁸ Saane minkôkon, wômelaʼane mimbim, boʼone minzezame mfuban , titaʼane mimbia minsisim. Mi nga nyoñ te kus, vaʼane fe te kuan.

⁹ Te nyoñane or nge argent, nge moné ya futi e mimfeʼe mienan,

¹⁰ nge mfek ya wulu wô, nge melôʼô mebaé, nge besilefas, nge ntum , amu mbo ésaé a yiane nyoñe bidi bié.

¹¹ Tison nge nlam ôse mia kui, tataʼa yemelan za a yiane nyoñe mia a tabaʼane valé akekui éyoñe ya nkôlane wônan.

¹² Eyoñ mia nyiin e nda , bataʼane je;

¹³ nge nda éte ja yian, mvoʼé jenan é zaʼa été; ve nge é nji ke yian, mvoʼé jenan é bulaʼan e be mia.

¹⁴ Nge ba bo te nyoñe mia a nge ba bo te vôʼôlô mejô menan, éyoñe mia kôlô nda éte nge tison éte, sasane mbuluʼu ya mebo menan.

¹⁵ Ma jô mia bebela na, e môse ntyiʼane mejô, tison éte ja ye dañe tôban ayaa a dañe Sodom a Gômor.

Bôt ba ye feme mia

¹⁶ Mi lô na ma lôme mia ane mintômba ézezañe beze; boʼone ñhe fek ane benyo a évôvoé ane bezum.

¹⁷ Tabaʼane bôte ntyee: ba ye kee mia e meba mejô a bôme mia e meba me Zambe map.

¹⁸ Ba ye somane mia e be bengovina a bejô bôt amu ma; nalé a ye bo ngaa a boʼolô mfaʼa wop a betebuni.

¹⁹ Eyoñ ba ye koñe mia, te tyelane minleme yôp ya yem ane mia ye kobô nge ane mia ye jô: Jam mia ye jô da ye vebane be mia awolo te,

²⁰ amu sake mia mia ye kobô, ve Nsisim Esoo wônan ñwô wo ye kobô be mia.

²¹ Monyañ a ye kee monyañ awu, a ésaa e mone wé; bon ba ye wosane bebiaé a ve be mekua ya awu.

²² Bôte bese ba ye vini mia amu jôé dam. Ve nyô a ye yeme ngu a kui asuʼulan nye a ye nyiiban.

²³ Eyoñe ba ye tôñesane mia e tison éziñ tuban a ke e tisone fok. Ma jô mia bebela na mia ye bo te mane tôbane bitison ya Israél te na mona môt a so.

²⁴ Nyéʼé te dañe nyeʼele wé, nge mbo ésaé e dañe masa wé.

²⁵ Mfaʼa ñyeʼé da sili na a bo ane nyeʼele wé a mfaʼa mbo ésaé a bo ane masa wé. Mbôle be nga loone mie ndaa na Bélzébul, kô fé ba ye jô de mfaʼa bôte ya nda jé!

Te mia ko woñ éziñ

²⁶ Te koone ñhe be woñ! Te ke jôm é butu ja ye bo te yanebe, teke jam éziñ é ne asoé bôt ba ye bo te yem.

²⁷ Jame ma jô mia e dibi été, katane de bizôña môs; jame mia wôʼô ôfôfoé, yôtaʼane de bikôndôʼô yôp.

²⁸ Te koone ba ba wôé nyôle woñ ve be too te ngule ya wôé nsisim; ve vianaʼane, koone woñ nyô a ne wôé nsisim a nyô a wua bie ébé nduan.

²⁹ Ye be nji kuane bemvokuma bebaé frank jia? Ve da, teke wua ya be be a ne ku si, ésoo wônan teke yem.

³⁰ Mfaʼa wônan, toʼo ésile jenan ése, é ne nlañan.

³¹ Ajô te ñhe te koone woñ: mia mi ne beta tañ a dañe ézuʼu bemvokuma.

³² Nyô ase a ye meme na a ne éñwom asu bôt, ma fe ma ye meme na me ne éñwé asu ésaa wom a ne yôp.

³³ Ve nyô a kate ma bôt été, ma fe ma ye kate nye asu ésaa wom a ne yôp.

Sake mvoʼé ve nkpwaté mekôn

³⁴ Te bunane na me nga zu soo mvoʼé e si nyô; me nji zu soo mvoʼé , ve nkpwaté mekôn.

³⁵ Yaa! Me nga zu kandé fam baa ésaa, ngon baa nyia, mbom baa ntyi:

³⁶ besiñ be môt ba ye bo bôte ya nda jé.

Bene womien ô tôñe Yésus

³⁷ Nyô a nyeʼe ésaa nge nyia a dañe ma a nji yiane ma; nyô a nyeʼe monafame wé nge monaminga wé a dañe ma a nji yiane ma.

³⁸ Nyô a bo te beʼe krôa jé a bo te tôñe ma, a nji yiane ma.

³⁹ Nyô a kaman ényiñe jé a ye jañele je a nyô a ye jañele ényiñe jé amu ma a ye je beta yen.

Nyô a nyoñe mia a nyoñe mamien

⁴⁰ Nyô a nyoñe mia a nyoñe mamien, a nyô a nyoñe ma a nyoñe nyô a nga lôme ma.

⁴¹ Nyô a nyoñe nkulu mejô amu na a ne nkulu mejô a ye nyoñe maʼane me nkulu mejô, a nyô a nyoñe zôsôa môt amu na a ne zôsôa môt a ye nyoñe maʼane me zôsôa môt.

⁴² Nyô a ye ve wua ya oyôme bôte di a too ñyeʼé, jaʼane ve élaé mendime na a nyu, ma kate mia bebela na, a ye bo te dimili maʼane mé.