MARKUS 9 - Bible en langue Bulu

¹ E nde a nga kate fe be na: Ma bele foʼo ane ma jô mia na, e bôt be tele vana ba, bevoʼo yʼété ba ye bo teke wu, akekui be tameya yen ane Ejôé Zambe ja so a ngu.

Yésus a veñesan a faé ane éfufup

² E mvuse melu mesaman, e nde Yésus a nyoñe Pierre baa Yakob a Yôanes, a kee ve be étam avie, e beta nkôle yôp. Ane a nga mane tyendé nyôl e mise mab été.

³ Mengômesane mé me nga ngemban a bo angôndô éfumulu, avale woseman éziñ ya si nyô a se ngul ya bo na éndelé é fum nalé.

⁴ Ane Elie baa Môze be nga yené be mis, baa be Yésus be laʼane minlañ.

⁵ E nde Pierre a nga nyoñ nkobô a jô Yésus na: A Rabbi, e ne mvaé na bi tabe vana. Nlôñane bibem bilaa, wô jia, Môze jia, Elie ke jia.

⁶ A nji ke foʼo yem e jôm a jô, amu be mbe be fôʼôbaʼan a woñ.

⁷ E nde nkut ô nga zu buti be yôp. Ane tyiñ é nga so e nkut été na: Nyuna a ne mone wom ma dañe nyeʼe, vôʼôlaʼan nye.

⁸ Atemetem na, éyoñ be nga ke ba fombô mbômaʼane, be teke fe beta yene môt éziñ mfe, ve Yésus étam baa be nye.

⁹ Eyoñ be nga siliki be susuk e nkôle si, e nde a nga ve be abendé na, be bo te kañete môt éziñ e mam ba te yen, ve akekui éyoñ Mone Môt a wômôya, a soʼo miñwuan.

¹⁰ E nde be nga baʼale abendé te, ve ba ke ba silan e zañe jab bebien-bebien jôm é ne na, e wômô a so miñwuan.

Nsili beyéʼé ajô Elie

¹¹ Ane beyéʼé be nga sili Yésus nsili a jô na: Amu jé Beyeme-bekalate ba jô na Elie a yiane taté so?

¹² E nde a nga yalane be a jô na: Elie a yiane foʼo taté so a kôme mam mese. Ve amu jé e ne ntilan ajô Mone Môt na, a ye bi mintaé abui a tôban ébiasé?

¹³ Ajô te ma kate mia na Elie a soya, ane be nga bo nye aval ese be nga kômbô, aval ane e ne ntilan ajô dé.

Yésus a vaa mongô mbia nsisim

¹⁴ Eyoñe be zuya koone beyéʼé bevok, e nde be nga yen étua abui bizuʼu bi bôt, be too be mbômaʼane, a Beyeme-bekalate, baa be be be sañetaʼan.

¹⁵ Eyoñe nkunda bôt ôse wu ô yemelaneya nye avôl-avô, ane angônda woñ a nga taté bi be, be bumu ñhe mimbi a ke wubane nye.

¹⁶ E nde a nga sili be na: Jé mia be be mia sañetan?

¹⁷ Ane môte wua ya ékoone bôt jina a nga nyoñe nkobô, nye na: A Ñyeʼele, ma te zuu mona fame wome nyuna be wo, a bili nsisime mvuk.

¹⁸ E vôm ase nsisime ôte wo bi nye, wo dum nye e si, avul e nga kui nye anyu, a nga wôté mesôñ, a mane yemele. Me jôya beyéʼé bôé na be titane nsisime ôte, ve be tekeʼe ngu.

¹⁹ Ane Yésus a nga yalane be a jô na: A mvoñe bôt é ne teke mbunane nyuna, ntaa vé ma ye tabe a mia, ntaa vé ma ye jibi mia? zaʼane me nye bebé vana!

²⁰ E nde be nga zuu nye mongô. Ayene nsisim ô nga yene Yésus, été été, ane ô nga bo mongô na a kpwemetan. Ane a nga ku e si a nga ke a biʼiti, avul ve kui nye anyu.

²¹ E nde Yésus a zu sili ésaa na: Eyoñ évé jame te e nga taté nye? Ane a nga yalane na: Aso mongô.

²² Biyoñ abui, nsisim wo wua nye, nge sa e nduan, wôna e mendim, na ô wôé nye. Ajô te, nge ô ne foʼo ngule ya bo jam éziñ, volôʼô bia, ko bia éngôngo.

²³ Ane Yésus a nga jô nye na: Nge ô ne ngule ya bo a! ke mame mese me ne ngule ya boban e be môt a bili mbunan.

²⁴ Eté été, ane ésaa mongô a nga yôtan a jô na: Ma buni, volôʼô ma e vôm: Me ngenan te buni.

²⁵ Ayene Yésus a nga yene na jama bôt a nga mane tôkan vôm ate, e nde a nga bame mbia nsisim a jôʼô na: A nsisime mvuk a ndok, ma ma jô wo na: Kôlôʼô be nye, ô bo teke beta nyiin e be nye!

²⁶ Ane nsisim ô nga bôé ñyôn a minkpwemetan, a vam atan. E nde mongô a nga bo ane mbim, bôte bese be nga jô na: Ke a wuya!

²⁷ Ane Yésus a nga bi nye e wo, a bete nye e si, ane a nga tebe tetele.

²⁸ Abulan a nga bulan e nda jé, ane beyéʼé bé be nga sili nye, baa be nye be to étam na: Amu jé, bi bia te kate titane mbia nsisime ate?

²⁹ Ane a nga yalane be na: Mvoñ minsisim éte é se ngul ya kôlô a zen éziñ fe, foʼo ve a meyeʼelan.

Yésus a beta kate foé awu dé a ñwômane wé

³⁰ Nkôlan ya valé ane be nga tyii e Galilé, ve da Yésus teke kômbô na môt éziñ a yem nalé.

³¹ Ane ñhe a nga ke a yeʼele beyéʼé bé, a jôʼô be na: Ba ye koñe Mone Môt, na bôt be bi nye. Ba ye wôé nye. Ve da, éyoñ a wuya, e mvuse môs mila a ye wômô.

³² Mfaʼa wop, be nji ke tuʼa wôk ajô te, ve da be ko woñe ya sili nye minsili.

Za nye a dañ?

³³ Ane be nga ke e Kapernawum. Eyoñ a nto e nda été, e nde a sili be na: Jé mia te zu mia sañetan e zenezen?

³⁴ Ane be nga ku bivô, amu be mbe be sañetaʼan e zenezen na be yem za nye a dañ?

³⁵ Atabe a nga tabe e si, ane a nga loone Beyéʼé awôm a bebaé, a jô be na: Nge môt éziñ a kômbô bo môt ôsu, a boʼo ntebe mvus ya bôte bese, a mbo bisaé asu bôte bese.

³⁶ E nde ñhe a nyoñ mone mongô a tele nye e zañe bôt ane a nga beʼe nye e mo yôb a jô na:

³⁷ E môt a ye nyoñe ôyôme mongô wua avale di e jôé dam, mamiene le a nyoñ. E nde fe môt a nyoñe ma, sake ma a nyoñ, a nyoñe Nyô a nga lôme ma.

E môt a nji bo e ngame yat, a ne ngame jangan

³⁸ Yôanes a nga jô nye na: A Ñyeʼele, bia te yene môt éziñ a titaʼan mimbia minsisim e jôé dôé, e nde bia te jeñe zen ya kame nye na a bo teke bo de, amu a nji zu a tôñe bia e nsamba wongan.

³⁹ Ane Yésus a nga jô na: Te kamane nye, amu na teke môt éziñ a bo étua jam e jôé dam, a ne jiʼa beta kobô ma abé été été.

⁴⁰ E nde ñhe, e nyô a nji tebe bia e ngame yat, nye a ne ngam jangan.

⁴¹ Ajô te, e môt ase a ye nyuu mia ékpwase mendim amu na mi ne bôt be Krist, ma kate mia bebela na, a se ngul ya jañele maʼane mé.

Meleb ajô nkolan ôbak a bibuʼa biangan

⁴² E môt ase a ye dutu wua ya ayôme bongô da buni ma dina na a ku abé été, jam da dañ mvaé mfaʼa wé e ne na, be fañe nye akoʼo nnen ba koʼo de bidi tyiñ , a wua nye e mañ été.

⁴³ Ajô te, nge wo wôé éziñ wo tindi wo e nsem, tyiʼi wô. E ne mvoʼé na ô ke nyiin ényiñ, étune wo, alôte na ô ke nduane kom ô bili mo mebaé,

⁴⁴ e vôme nsoñ wob ô ne te wu, nduan ke te dim.

⁴⁵ Nge abo dôé éziñ e nde da dutu wo na ô ku, seme de; e ne wo mvaé na ô nyiin ényiñ été étun abo, alôte na ba wua wo ébé nduane kom ô bili mebo mebaé,

⁴⁶ e vôme nsoñ wob ô ne te wu, nduane ke te dim.

⁴⁷ A nge dise dôé éziñ e nde da dutu wo na ô kolé a ku abé été, fôndéʼé de. E ne wo mvaé na ô ke nyiin ayoñe Zambe a dise da, alôte na be ke wua wo ébé nduane kom ô bili mise mebaé,

⁴⁸ e vôme nsoñ wob ô ne te wu, a nduan ke te dim.

⁴⁹ Amu na môt ase a ye wôk ésôbôk nku e nduan été.

⁵⁰ Nku ô ne mbamba jôm. Ve da, nge nku ô mane same zam , mia ye beta ve wô zam a za jômô? Biane nku e be miabebien été, tabaʼane fe mvoʼé wua a nyô mbok.