MARKUS 8 - Bible en langue Bulu

Yésus a ve toyini bôt bidi

¹ E nde ñhe, e mimôs mite, mbôl bôt be mbe abui, teke be bili jôme ya di, ane a nga loone beyéʼé bé a jô be na:

² Ma wôʼô bôte bana éngôngo, amu bia be be bi ntoo den tañe melu mela, ve be nji bi jôme ya di.

³ Nge ma suu be na be bulane menda map, zaé e mebum, ba ye ke ba ku som e zene zen . Amu bevoʼo ya été ba so ôyap.

⁴ Ane beyéʼé bé be nga yalane nye na: E môt a ne ve abim abui bôte dina bidi, e fé été va, bi mane yiane be, a ye so vé?

⁵ Ane a nga sili be na: Mi bili belet tañ aya? be na: Zamgbwa.

⁶ E nde a nga jô bôte na be tabee si. A nyoñe ñhe belete zamgbwale nyuna, a mane ve akéva, ane a nga beʼe je a ve beyéʼé bé na be ke ba kabe bôt; ane be nga kabe je bôt.

⁷ Be nga bili fe ayôme kos. E nde fe a nga mane botane je a jô na be ke fe ba kabe je.

⁸ Ane bôte be nga di a jaé. Be nga kee fe bifus bi nga buk, tañe minkoé zamgbwa.

⁹ Bôte be mbe bebé toyini ényin. Ane a nga suu be na be ke.

¹⁰ E nde fe a nga dañ éfunga été été baa beyéʼé bé, a ke éfas ya Dalmanutha.

Ndem fé Befarizieñ ba beta sili

¹¹ Ane Befarizieñ be nga zu, baa be nye be nga sañetane nkobô, be siliʼi nye ndem éziñ ya yôp, zen ya bôbôlô nye.

¹² Asuu a nga suu abuk, e nde a zu jô na: Ndeme fé nje foʼo miaé bôt wu wo sili? Ma jô foʼo mia bebela na, teke ndem éziñ ja ye veban e be miaé bôte wu.

¹³ Ane a nga liʼi be a beta dañ éfunga été a ke kindiʼi yat.

Ye fek é ne foʼo beyéʼé mebum

¹⁴ E nde beyéʼé be nga vuane nyoñe belet, be liʼiya be bili éfunga été va, foʼo ve belete jijia.

¹⁵ Ane a nga bendé be na: Mi kaleʼe, tukaʼa tabane ntye a mvusu Befarizieñ a nyô Hérôde.

¹⁶ E nde be nga ke ba fas e zañe jab bebien, môt ase a jôʼô nyô mboʼo na: Bi nji bi belet.

¹⁷ Eyoñ Yésus a yemeya nalé, e nde a jô be na: Amu jé mia ke mia fas a kobô na mi nji bi belet? E nde mi ngenane foʼo teke yem a teke wôk? Ye minlem mienan mi ngenan ayet?

¹⁸ nde mi beʼe mis ve teke yen, nde mi beʼe melo ve teke wôk? ye mi ne te fek?

¹⁹ Eyoñe me nga beʼe belet étan asu bôt toyini étan, minkoé mi afufus tañ aya mi nga kee mie njalan? Ane be nga jô na: Awôm a mibaé.

²⁰ Eyoñe ke me nga beʼe belet zamgbwa asu bôt toyini ényin, mi nga kee minkoé bitune mebukaʼa , tañ aya? Ane be nga jô na: Zamgbwa.

²¹ E nde a nga jô be na: Ye mi ngenan teke tuʼa wôk?

Yésus a bo ndindim mvoʼé

²² Ane be nga ke kui e Bétsayida. E nde bôt be nga zuu ndindim e be nye, a yeʼelane nye na a nambe nye.

²³ Ane a nga bi ndidime wo a kee wô atan, éyoñ a tuiiya wô mendene mis a beté fe wô mo, e nde a sili nye na: Ye wo yene jôm éziñ?

²⁴ Akui a nga kui mis, e nde a nga jô na: Me lôô bôt, ma yene be be funaʼane bilé, ba ke ba wulu.

²⁵ E mvuse valé, e nde a nga beta beté nye mo e mis, môt a nga fombô ne fonaaa, ane a nga bulane bo mvoʼé , a nga yene fe biôme biseseʼe ne sañe sañ.

²⁶ Ane Yésus a nga bulane lôme nye e nda jé a jô na: Te ñhe wo veʼele ke nyiine nlam.

Pierre a mem na Yésus nye a ne Krist

²⁷ E nde Yésus a nga téé baa beyéʼé bé, be nga ke mfaʼa minlame ya Sézaré Filip. E zene zañe wé ane a nga sili beyéʼé bé na: Bôte ba jô na me ne za?

²⁸ Ane be nga yalane nye a jô na: Bana na Yôanes Babtist, bevoʼo na Elie, e ba bevoʼo ke na, wua éziñ ya bekulu mejô.

²⁹ E nde ñhe a zu sili be na: Mfaʼa wônan, mi mia jô na me ne za? Ane Pierre a nga yalane nye a jô na: Ô ne krist .

³⁰ Ane a nga tuʼa bendé be na, be bo teke kate toʼo môt éziñ jam éziñ e tinaʼane nye.

Yésus a kulu mejô ya awu dé a ñwômane wé

³¹ E nde a nga taté yeʼele be na, Mone Môt a yiane tôbane mintaé abui. Bemvendé, a Betuni Benen a Beyeme Bekalate ba ye bene nye, ba ye fe wôé nye, ve mvuse môs milal, a ye wômô.

³² A nga kobô ajô di ne sañe sañ bôte bese be wôʼôk. Ane Pierre a nga nyoñe nye a kee nye émoʼo, a tebe ñhe na a komekane nye.

³³ Ve Yésus a nga veñesan a fombô beyéʼé bé, a nga bame Pierre a jô na: Kele mʼôyab mfaʼa ya mvus, a Satan, amu ô nji bi asimesane Zambe, ve di bôt.

Fulu ntôñe Krist

³⁴ E nde a nga loone jama bôt a beyéʼé bé na be zu, a jô be na: Nge môt éziñ a kômbô tôñe ma, a tatéʼé nyum émiene mam, a bekeʼe krôa jé a tôñe ma.

³⁵ E môt ase a kômbô nyii ényiñe jé, a ye jañele je; ve nyô ase ki a ye jañele ényiñe jé amu ajô dam a ajô Mbamba Foé, e nye a ye nyii je.

³⁶ Da ye volô môte jé na a bi ngume si ôse, nge a viane jañele ényiñe jé?

³⁷ A za jômô môt a ye ve, e tañ ényiñe jé?

³⁸ Amu na, nge môt éziñ a ye wôʼô mʼ ôson, nge ke mejô mam, e be miaé bôt bijabô wu a bebo abé , Mone Môt fe a ye wôʼô nye ôson, éyoñ a ye zu étôtoʼo Esaa wé été, baa be mimfufub bʼéngele.