MARKUS 7 - Bible en langue Bulu

Ajô Befarizieñ a metume me bôt betô

¹ E nde Befarizieñ be nga sulan vôm a nga too, baa Beyeme bekalate bevok, be soʼo Yérusalém.

² Ane be nga yene beyéʼé bé bevok be jaʼa bidi a mo mvit, nalé a ne na teke sôbe mo.

³ Amu na, Befarizieñ a Beyude bese, be ne teke di nge be ngenan te taté tuʼa mane sôbe mo, mbôle ba tôñe metume me bôbetô.

⁴ E nde fe, éyoñe ba so nseñ, nge be te taté mane sôban, be teke di, a mam mefe abui be nga nyoñ e be bôbetô, aval ane nsôbane mekob, a meviek, a bisoo bi mvot.

⁵ Ane Befarizieñ a Beyeme bekalate be nga sili nye na: Amu jé beyéʼé bôé be ne te wulu aval ane ñyeʼelan metume me bô-betôl ô né, ve ba viane di bidi a mvin ése mo?

⁶ Ane a nga jô be na: Ezayi a nga yeme foʼo kobô ajô denan, a mia bôte meduʼan, éyoñ a nga tili na: Ayoñe bôte di da wumulu ma ve biyaé, ve minleme miab kik mi tyete ma ôyap.

⁷ Ba kañe ma momo nkañan, ñyeʼelan ba yeʼele bôte ki ô too mebendé me bôt.

⁸ Mia viane liʼi, metiñ me Zambe, mi nga tôñe metume me bôt.

⁹ Yaa, mebendé me Zambe e me mia tindi a mvuse mo, na mi viane baʼale metume menan mia bebien.

¹⁰ Môze nyʼa nga jô na: Ô seméʼé éso ba nyua, a na: E môt a kobô ésaa abé , nge nyia, a ye foʼo wu a si.

¹¹ Mfaʼa wônane kik mia jô na: Nge môt éziñ a jô ésaa nge nyia na: E jôm ése ô ne bi mfi e be ma é nto korban, nalé a tinane na mvean asu Zambe,

¹² mia jôʼé nye teke beta bo mone jôm éziñ asu ésaa nge nyia.

¹³ Nalé ate ajô Zambe e nde mia wôé ntuk, amu metume menan mia zu mia kalane bôt. Mia bo fe mam mefe abui avale te.

¹⁴ E nde a nga beta loone babôtô a jô be na: Mia bese tameka vôʼôlane ma, a tuʼa wôk.

¹⁵ Teke jôm éziñ ja so atan é zaʼa nyiin abume môt é ne ngule ya ve nye nsem. Ve mame ma so abume môt me zaʼa kui nseñ, e me ma ve môt mvit e nsisim .

¹⁶ Nge môt éziñ a beʼe melo ya wôk, a wôʼôk!

¹⁷ Eyoñ a kandaneya a bôt a ke nda , ane beyéʼé bé be nga sili nye mesuu ya nkana ôte.

¹⁸ E nde a jô be na: Nde mia fe mi ne be-te-feʼe avale di! Ye mi nji yeme wôʼô na e jôm ése ja so atan é kele abume môt été é se ngule ya ve nye mvit e nsisim .

¹⁹ Amu é nji nyiine nye e nlem été, ja ke ve abum, é ke fe lôt a ke fé? Nalé a nga mane fubu bidi bise.

²⁰ E nde fe a zu jô na: E jôme ja so môt mfaʼa ya été é zaʼa kui atan, e nje éte ja ve môt nsem.

²¹ Amu na, mfaʼa yʼété, e minlem mi bôt été, mbia bʼasimesan ba so, ajô bibon, wup, ñwôane bôt,

²² mejian , ôzañ akum, mbia nlem , meduʼan, bijabô, ébamba, mbia be mis, nkoban Zambe ébiasé, mebun, mboan ôkukut.

²³ Mame mete mese me ne abé , ma so mfaʼa ya été, me nga ve môt mvit e nsisim .

Mbunane minga Sirôfénis

²⁴ Akôlô a nga kôlô valé, ane a nga ke mfaʼa ya Tir. Eyoñ a nyiineya e nda été, a nji kômbô na môt éziñ a yeme nalé; ve da teke zene ya sobô.

²⁵ Eté été, minga éziñ a nga wôʼôtane nye, ngone jé ki é bili mbia nsisim , e nde a nga ke so a zu kute nye meboñe si.

²⁶ Minga ate a mbe ngon Grék, teke a too e ñyebe Beyude, ngon Sirôfénis e mebialé. Ane a nga yeʼelane nye na a vaa ngo jé mbia nsisim .

²⁷ Ane a nga jô nye na: Tame jôʼé bon e mbe be taté di, be jaé, amu e nji bo mvaé na be nyoñe bidi bi bon , a wua bie bo-bemvu.

²⁸ E nde minga ki a nga yalan a jô nye na: Wo bele foʼo, a Nti; ve da ke bo-bemvu ba bo fe be jaʼak menyuñe bidi bi bon e tebele si.

²⁹ Ane a nga jô nye na: Amu éfia jôé te, kele ñhe, mbia nsisim a kôlôya ngo jôé e nyôl.

³⁰ Ake a nga ke nda jé, ake koé mon a bôô énoñ, mbia nsisim a suuya nye.

Yésus a bo môt a too ndok a mvuk mvoʼé

³¹ Akôlô a nga beta kôlô si ya Tir, e nde a nga ke lôte Sidoñ, éfas ya mañe me Galilé, ézezañe si ya Dékapôl.

³² Ane be nga zuu nye môt a too ndok a mvuk, be nga yeʼelane nye na a betéé njaʼa nye mo.

³³ Avaa a nga vaa nye e bôt été a kelee nye étam e fefe, e nde a futi nye anyu e melo été, a tui menden, a nambe nye ôyem,

³⁴ a bete mise yôp, a suu mvebe, a jô nye na: Effata, nalé a tinane na: Yombôʼô.

³⁵ E nde melo me nga yombô nye, a été été e nkol ô nga tii nye ôyem ô mane fe tyiʼi, a nga kobô ne sañe sañ.

³⁶ Ane a nga ve be atiñe na, be bo te kate de môt éziñ. Abim a nga bo a bendéʼé be, abime te e nde be kik be nga dañe dañe ke ba beʼele de.

³⁷ Be mbe be seméʼé angôndô ya abui, be jôʼô na: A boya mame mese mvaé, a boʼo mindôndok na mi wôk, a boʼo mimvumvuk na mi kobôô.