MARKUS 4 - Bible en langue Bulu

Nkana mmiase mvoñ

¹ E nde a nga beta taté na a yeʼele bôt e nsaʼa mañ. Ane jama bôt a nga tôkan e vôm a mbe, ane a nga jibi bet éfunga été a ke tabe mendime yôp, ndulu bôt ase nyuna ki a too e kindik a fombôʼô mañ.

² A nga yeʼele ñhe be abui mam a minkana. E ñyeʼelane wé été, a mbe a jôʼô be na:

³ Vôʼôlaʼan! mmiase memvoñ a nga ke a miase fes.

⁴ A nga bo na, éyoñ a kele a miase nalé, fese éziñ é nga ku e mfôme zen , ane anon e nga so a mane di je.

⁵ Ane fese fok é nga ku e si mekok , e vôm a mbe tekeʼe metek abui, e nde fes éte é nga jiʼa faa; amu teke mfañ afib tyia.

⁶ Eyoñe vian ô nga faé, ane fes éte é nga mane viele, a amu é mbe teke minkañ, e nde é nga mane dik.

⁷ Fese fe é nga ku e minsiniʼi été, ane minsinik mi nga bet a yandan je yôp, e nde é nga bo teke ve bibuma.

⁸ Fese foʼo kik é nga ku mbamba si, ane é nga faa a yaé a ve bibuma, é nga wum, fese jia bibuma mewôm mela, fese éziñ mewôm mesaman, foʼéziñ ntet.

⁹ E nde ñhe a zu jô na: E môt a beʼe melo ya wôk, a wôʼôk!

Amu jé Yésus a yeʼele a minkana

¹⁰ Eyoñe Yésus a liʼiya étam, e nde bôt be nga too nye mbômaʼane baa be beyéʼé awôm a bebaé ba zu sili nye ajô minkana mite.

¹¹ Ane a nga jô be na: Mia e vebaneya na mi yem ndimba mam ya éjôé Zambe. Ve mfaʼa ba ya atan, ba kobô be mam mese ve a minkana,

¹² ajô te ba ye fombô na be yen, ve teke yen ba ye vôʼôlô na be wôk, ve teke wôk, be za kôñelan minlem a nyoñe njaman .

¹³ Ane a nga jô be na: Mi ne teke wôʼô nkana wu amu je? E nde mia ye yeme wôʼô minkana mivoʼo mise aya?

Nkana mmiase mvoñ wo tinan aya

¹⁴ E môt a miase mvoñ a miase Mejô me Zambe.

¹⁵ E ba ya vôm fes é nga ku e mfôme zen , e mbe be ne na, éyoñ be wôʼôya Mejô me Zambe, Satan a soé été été, mejô ba te miase be e minlem, a jiʼa zu té me si.

¹⁶ Avale te fe e ba ya fese be nga mias e si mekok , e mbe be ne na, éyoñe be maneya wôʼô Mejô me Zambe, ba nyoñe me avô a mevak;

¹⁷ ve mbôl bebien be nji bi minkañ, amu be ne bôt bʼandôn, éyoñ minjuk a ékpweʼele bi soya amu Mejô me Zambe, ba ku foʼo si été été.

¹⁸ Bana mbe be ne bôte ya fes be nga mias e minsiniʼi été: Balé bete be ne na, éyoñe be maneya wôʼô Mejô me Zambe,

¹⁹ minjuʼu ya si ndôn a meduʼane ya akume si a minkômbane ya mame mevoʼo mese, bi jaé be nlem ne lut, a mane yametane mejô mete, me ntoo ñhe teke fe awumi ébuma.

²⁰ Bana kik be ne bôte ya fes be nga mias mbamba si: E ba bese ba wôʼô mejô me Zambe, be nyoñe me, be nga wume ñhe, bibuma fes éziñ mewôm mela, foʼéziñ mewôm mesaman, nyô fok ntet.

Ye lambe a tetebe éwolo si

²¹ Ane a nga jô be na: Ye ba zuu lambe na a tebee tawôlô si, nge ke énoñe si? Ye sa na a tebe ételé belambe yôp?

²² Teke jam éziñ e solô da ye bo te kui atan; a teke jôm éziñ be ne solé, ja ye bo te kui éngengeñ.

²³ Nge môt éziñ a beʼe melo ya wôk, a wôʼôk.

²⁴ E nde fe a jô be na: Mi tukaʼa fas e jôme mia wôk. Ovek mia ye veʼe wô ñwô fe ba ye veʼe mia, abet da ye fe kôʼôlane mia yôp.

²⁵ Amu na e nyô a bili e nye fe ba ye beta ve; a e nyô a nji bi, ba ye vaa nye jaʼane mon abim a bili.

Mvoñ ja yaé, môte teke yem

²⁶ Ane a nga jô fe be na: Ayoñ Zambe e ne aval ane môt a wua mvoñ e si.

²⁷ Toʼo nyʼa ke ôyo, toʼo ke a vee, a alu a môs , fese ve faa, é nga yaé éyoñe nye a nji yem.

²⁸ Si ébien ja vu bidi, a taté kaé, akui abam, akekui ndu fes ya abam été.

²⁹ Ane ébuma é tôlôbô, be jiʼa daa meyo me fa, amu éyoñ ya mekoé é kpwaaneya.

Nkana fes ôndôndôô

³⁰ E nde fe a beta jô na: Jé foʼo bi ne funane jee ayoñe Zambe? Nge ke na bia ye veʼane de a za nkanaa?

³¹ E ne aval ane fes ôndôndôô. Eyoñe ba bé je e si, é ne tyôtyoé é lôte mefese mese ya si nyô.

³² Ve éyoñe be béya je, ja bet a ke e yôp alôte bibébéé bise, é nga biaé fe beta mintyap, abim ane anone ya yôb e ne lôñe mumbaʼa e éjijine jé.

³³ A zen ya abui minkana avale te, e nje a mbe a kate be Mejô me Zambe ane be ne tuʼa yeme wôk.

³⁴ A nji kobô be teke ku minkana. Ve éyoñ baa beyéʼé be liʼiya étam, a mbe a timiʼine be mam mese.

Yésus a jeʼe ôkôs

³⁵ Môs ôte, valé ngôʼé é nga bo, e nde a jô be na: E ndañekan e kindiʼi yat.

³⁶ Ane be nga liʼi ékoone bôt, be ve kee nye éfunga a nga too été, bifunga bife bi mbe fe nsamba té.

³⁷ E nde mbia ngul ôkôs a nga taté na a vuñ, mintyôa mi nga sembe éfunga été, éfunga é nga ye ñhe jaé a mendim.

³⁸ Nye ki a bôô ôyo e mvus éfunga, nlô ô bete ébônga. E nde ñhe ba ke vele nye a jô nye na: A Ñyeʼele, ye ô ne teke bisi nge bia mane jañ?

³⁹ Ane a nga vee ôyo, a sa évuñulu mvam , ne tiñ, a jô mañ na: Tabeʼe évô, boʼo ne mieññ! E nde évuñulu é nga tebe, mañ ve bo ne mieññ.

⁴⁰ Ane Yésus a nga jô be na: Mia ko woñ abime di amu jé? Amu jé mi ne tekeʼe mbunan?

⁴¹ Ane be nga dañe ko woñ, be nga ke fe ba sili na: Nyuna nye ñhe a ne za? amu jaʼane évuñulu, a mañ bi ve wôʼô nye?