MARKUS 11 - Bible en langue Bulu

Yésus a nyiin e Yérusalém ane Mesie

¹ Eyoñe be nga subu bebé e Yérusalém, e zia Bétfajé baa Bétani, bebé a nkôle bʼôlivié, e nde Yésus a lôme beyéʼé bé bebaé,

² a jô be na: Kelan e jal e ne mia zoʼone yate vana di, nné ane mia ye kui, mia ye koone mon éjakas a tii, môte mfe éziñ a ngenan teke tame betebe nye yôp, tiʼane nye, mi zuu nye.

³ Nge môt éziñ a sili mia na: Jé mia bo le? Mi yalane na: Nti nye a yi nye, a ye fe bulane lôme mia nye vana anaʼana.

⁴ E nde be nga ke, be koone mon éjakas a tii atan bebé a mbé akak, e mfaka yôp; ane be nga tiine nye.

⁵ Ane bôte bʼéziñ ya ba be nga tele valé be nga jô be na: Mia tiine mon éjakas ate amu jé?

⁶ E nde be nga yalane be aval ane Yésus a nga jô. Ane be nga jôʼé be.

⁷ E nde ñhe be nga kee mon éjakas ate e be Yésus, be nga ta mengômesan mab e mvus jé, ane Yésus a nga ke tabe nye e yôp.

⁸ Abui bôt e nga ke da ta mengômesane mab e njoñe njoñ, ba bevoʼo ki mebui bilé be nga ke ba tyiʼi e fé fé.

⁹ E bôte ya ôsu, a bôte ya mvus, be nga zu ba yôtane na: Hôzana! Ébotan a môt a zu e jôé Nti!

¹⁰ Ebotan a éjôé ja zu, e ji ésaa wongan David! Hôzana e susuʼa nkôñ ya yôb été!

¹¹ E nde a nga ke kui e Yérusalém, a nyiin e Nda Zambe été. Aman a nga mane fombô biôm bise mbômaʼane, éyoñ éte ngôʼé é nga bo foʼo abui, ane a nga kui atan a ke e Bétani baa Beyéʼé awôm a bebaé.

Yésus a yoʼé élé fiig

¹² Tyé-kpwa, valé be kôlôʼô e Bétani, e nde Yésus a nga wôʼô zaé.

¹³ Eyoñ a yeneya élé fiig é tele ôyab analé, é beʼe mekaé, ane a nga ke jom nge a ye yene jôm éziñ été. Ve éyoñ a nga ke kui je bebé, a viane koone ve mekaé-mekaé, amu éyoñ éte é nji bo éyoñ befiig.

¹⁴ Ane a nga kobô a jô élé na: Akekui melu mese ma zu, môt éziñ a boʼo te beta di ébuma ya be wo ne tya! Beyéʼé bé be nga vôʼôlô a wôʼô nkobô ôte.

Yésus a titane bôt ba bo makit e Nda Zambe

¹⁵ Ane be nga ke kui e Yérusalém. Anyiin a nga nyiin e Nda Zambe, a tebe ñhe na a titane bôt ba kuan, a bôt ba kuse biôm e Nda Zambe été, a sôʼôlô betebele betyendé moné a bito bekuane bezum e si.

¹⁶ Teke fe jôʼé na môt éziñ a tulane Nda Zambe a beʼe jôm éziñ.

¹⁷ A nga yeʼele bôt a jô na: Ye e nji bo ntilane na: Ba ye loone nda jam na, nda meyeʼelan asu meyoñe mese? Ve mia mi vianeya kôñelane je mfule befanga.

¹⁸ Eyoñe Betuni Benen a Beyeme-bekalate be wôʼôtaneya ajô te, be nga jeñe ñhe aval avé be ne jiane nye. Ve be mbe be mateʼe nye amu nkunda bôt ôse ô mbe ô semeʼene ñyeʼelane wé.

¹⁹ Eyoñe ngôʼé é nga bo, ane be nga kôlô tison éte.

Nkôt élé fiig; meyeʼelan ya mbunan

²⁰ Eyoñe be nga zu lôte bia-tyé, ane be nga yen élé fiig é maneya kôt, ataté mindi.

²¹ E nde Pierre a zu beta simesan, a jô nye na: A Rabbi, tame yen ane élé fiig ô nga yoʼé é maneya kôt!

²² Ane Yésus a nga nyoñe nkobô a jô be na: Bunaʼane Zambe!

²³ Ma kate mia bebela na, nge môt éziñ a jô nkôle wuna na: Kôlôʼô si va ô ke ku e mañ, teke bone bisô biziñ e nlem été, a buniʼi foʼo ve na e jam a jô da ye boban, da ye foʼo boban vʼane a jô.

²⁴ E nde ma jô mia na, e jam ese mi ne jaʼé a meyeʼelan, bunaʼane foʼo na mi mbili de, da ye foʼo veban ane mia sili.

²⁵ A éyoñ mi ntele na, mia yeʼelan, nge mi bili môt jam éziñ e nlem été, mi jaméʼé, ndemben Esaa wônan ya yôb nye fe a ye jamé mia bikobe bienan.

²⁶ Ve nge mia bo te yeme jamé, Esoo wônan a ne yôb nye fe a ye bo te jamé mia bivuse bienan.

Ngule fé wo boo je mam ma?

²⁷ Eyoñe be beteya zu kui e Yérusalém, Yésus a nga ke a lôtan e Nda Zambe été. Ane Betuni Benen, Beyeme-bekalate a Bemvendé, be nga zu yene nye.

²⁸ E nde be nga jô nye na: Ngule fé, e nje wo boo je mame ma? Nge na: Za a nga ve wo ngule ya bo mam mete?

²⁹ Ane Yésus a nga jô be na: Ma fe ma zu sili mia ve nsili wua, mi yalaʼane ñhe ma, nde ma fe me kate mia, ngule fé ma boo je mame ma.

³⁰ E nduan Yôanes a nga du bôt, ô nga so vé, ye yôb, ye be bôt? Yalaʼane ma!

³¹ Be nga ke ba fas beebe be jôʼô na: Nge bia jô na: Ô nga so yôp, ke a ye sili na: Vʼamu jé mi nji buni nye?

³² Nge bia jô ke na: Ô nga so be bôt be nga viane ko ékoone bôte woñ, amu bôte bese be nga buni na Yôanes a ne foʼo totii nkulu mejô.

³³ E nde be nga yalane Yésus na: Bi nji ke yem. Ane Yésus a nga jô be na: Ma fe maa ye kate mia, ngule fé nje ma boo je mame ma.