MALAKI 2 - Bible en langue Bulu

¹ Eyoñe ji, mia betuni mi nee abendé di.

² Nge mia bo te wôk, a bo te nyoñe jame di nya nyoñane na mi ve jôé dame duma, nalé Nti ya minsamba mewosan a jô, ma ye lôme mia biyoʼé, a ma ye yoʼé bibotane bienan. Yaa, ma yoʼé ébotane jenan, amu mi nji semé je.

³ Ma nyô, ma yaa na me mane jiane mvoñe bôte jenan, a ma ye lôô mia mebi e mesu, mebi bityiʼa ya mebôʼô menan, a ba ye kee mia a mebi mete nsamba wua.

⁴ Eyoñe te mia ye yeme na me lômeya mia abendé te, nalé élate jam bia Lévi ja ye tabe, nalé Nti ya minsamba mewosan a jô.

⁵ Elate jam é nga too be nye, é too ényiñ a mvoʼé me nga ve nye na a ko me woñ, nde a nga ko me woñ, a fôʼôban amu jôé dam.

⁶ Atiñ e ne bebela e mbe nye anyu, a mvô é nji bebe nye biyaé môs éziñ; bia nye bi nga wulu e mvoʼé été a e zôsôô été; a nga bo bôt abui na be kôlô abé été.

⁷ Amu biyaé bi ntuni bia baʼale ñyeman, a ñyeʼelane metiñe ya bôt ba jeñ ô ne anyu dé amu a ne nlômane Nti ya minsamba mewosan.

⁸ Ve mia mi maneya kôlô nya zene, mi maneya fe bo na bôt abui be nga too metiñ été be ku, a mi maneya tyam élate Lévi, nalé Nti ya minsamba mewosan a jô.

⁹ Ajô te ma fe ma ve mia mi bo jôm ébiasé a jôm ôsame e mise mʼayoñ ese, amu mi nji baʼale mezene mam, a amu mia nyiñili fulu ôbangam e metiñ me Zambe été.

Malaki a wosane nluʼan bengon bikuu

¹⁰ Ye bia bese bi nji bi ésaa wua? Ye sa Zambe wua nye a nga té bia? Amu jé bia kuane biabebien a ndaman étyi yʼélate bʼésaa bangan?

¹¹ Yuda a kuaneya émien, a e jam e nʼangôndô e maneya boban Israél a e Yérusalém été; amu Yuda a ndamaneya jôm é ne ntelan étyi asu Nti, e jôme Nti a nyeʼe. Be luʼuya fe binga ba kañe bezambe bikuu.

¹² E môt ase a bo avale jame te, jaʼan a ne zʼavale môtô, a jaʼan a ne nyô a ve Nti ya minsamba mewosan mimvean, Nti a ye vaa nye nda bôt Yakob été.

¹³ Jam afe mia bo nde di: Mia jalé ataʼa metunaʼa Nti a milik, miñyôn a mintat, amu a nji beta fombô mimvean nge nyoñe mie mvoʼé e mo menan.

¹⁴ Mia jô na: Amu jé nalé? Amu Nti a nga too ngaa e zañe mia minga ô nga luk ô too ésoé nyô ô maneya joñôlô. Ve wo vuane na a ne nyô mia nye mi nga wulu nsamba, nyô womien ô nga top!

¹⁵ Ye Nti a nji té môte wua, a too minsôn, ve nsisim ényiñ ô boʼo nye na a fôʼôsan? Môt ate wua a jeñe jé? Ye sa mvoñe bôte Zambe a ve nye? Ajô te semaʼan ényiñ jenan, môt a boʼo te bo minga a nga luk a too ésoé njoñ.

¹⁶ Nsuane minga amu évini, nalé Nti, e Zambe Israél a jô, nalé a ne na wo bo mam ane njenjete môt, Nti ya minsamba mewosan a jô nalé. Ajô te semaʼan ényiñe jenan, a te boone bôt be njoñ.

Nsoone Zambe asu ntyiʼane mejô

¹⁷ Mia ndeñele Nti a minkobô mienan. Mia jô na: Bia ndeñele nye aya? Eyoñe mia jô na: Môt a bo abé a ne mbamba môt e mise me Nti, bôte bete e mbe a yene mvaé; nge na: E Zambe a tyiʼi mejô zôsôô a ne vé?