LUKAS 8 - Bible en langue Bulu

Betôñe Yésus

¹ Wôna Yésus a mbe a kelek e bitison bitison a e minlam minlam, a kobôʼô mejô me Zambe a kateʼe fe bôt mbamba foé yʼéjôé Zambe.

² Baa be beyéʼé awôm a bebaé be mbe a binga bʼéziñ be nga saéban mimbia minsisim a akon: Marie Madeleine, nyô mimbia minsisim zamgbwal mi nga kôlô be nye,

³ Yôana, e minga Kuza, e mbaʼale akume Hérôde, Suzane a befe abui be mbe be volôʼô be a akume dap.

Nkana mmiase mvoñ

⁴ Beta nkunda bôt a nga sulan, a ba ba so bitison bitison be nga zu be nye. E nde a nga kane nkana wu:

⁵ Mmiase mvoñ a nga kui atane na a ke miase mvoñ. A miase mvoñ, e nde ngabe jia ja ku e zene zen : bôt be nga tibi je a mebo, a anone ya yôp e nga di je.

⁶ E ngabe fok é nga ku akoʼo yôp; éyoñ é nga faa é nga kôt, amu é nji bo émumun.

⁷ E ngabe fok é nga ku ézezañe minsinik; baa be minsinik be nga faa a minsinik mi nga yametane je.

⁸ E ngabe fok é nga ku e mbamba si, éyoñ é nga faa, é nga wume bibuma mintet. A jôʼô nalé, e nde a yôtane na: e nyô a bili melo ya wôk a wôʼôk!

⁹ Ane beyéʼé béé be nga sili nye atinane ya nkana ôte.

¹⁰ Nye be na: e nga vebane be mia na mi yem ndimba mam yʼéjôé Zambe; ve e mfaʼa bôte bevok mam mete ma kobane be e minkana, ndembene be bo te yen be kusa fombô, be bo te wôk akôsa bo na ba vôʼôlô.

¹¹ Nkana ôte wo tinan avale di: Mvoñ é ne mejô me Zambe.

¹² E ba be ne zene zen , be ne ba ba wôk, mvus éte, satan a zu a vaa mejô me Zambe e minleme miab été, nalé ate ba ye bo teke yaé a ba ye bo teke nyiiban.

¹³ E ba be ne akoʼo yôp, be ne e ba be ne na éyoñe ba wôʼô mejô me Zambe, ba nyoñe me a mevak; ve be ne teke minkañ; ba yaé nté éziñ, vʼéyoñe meveʼele , be mane kôlô.

¹⁴ E mvoñ é nga ku e minsiniʼi été, é ne ba be ne na éyoñ be maneya wôʼô mejô me Zambe, be kelé, mam ma tyelé bôte minleme yôp, akum a mimvôman yʼényiñ bia mane dibetane be, be ntoo teke fe ve bibuma bi ne bitôtôlô.

¹⁵ E fes é nee mbamba si é ne e ba ba wôʼô mejô me Zambe a mbamba nlem , teke meduʼan, be baʼale me, a wume bibuma bia so e njiban.

Nkana lambe

¹⁶ Teke môt éziñ a ne futi lambe e jôm éziñe si éyoñ a maneya nye boʼé, nge na a telé nye énoñe si, ve a telé nye ételé lampe yôp, ndemben e ba ba nyiin e nda été ba ye yen éfufup.

¹⁷ Amu teke jôm é solô ja ye bo te kulan, teke jôm é ne asoé ja ye bo te yené bizôña môs .

¹⁸ Tabaʼane ñhe ntyel a avale mia vôʼôlô; amu ba ye ve e môt a bili, ve nyô a nji bi, ba ye vaa jaʼane jôm a simesane na a bili.

Nyia a bobenyañ be Yésus

¹⁹ Nyia a bobenyañ be Yésus be nga suan, ve teke nguleya kui nye bebé amu abui bôt.

²⁰ E nde ba kate nye de na: nyua a bobenyoñ be ne atan ba kômbô yene wo.

²¹ Ve a nga yalane be na: nyia wom a bobejañ be ne e ba ba wôʼô mejô me Zambe a bo me.

Yésus a bamé ôkôs

²² Môs éziñ, Yésus a nga dañ e bial été baa beyéʼé béé. A nga jô be na: e nkelane kindiʼi foʼo ya yat. Ane be nga ke.

²³ Ezezañe dulu, e nde Yésus a ke ôyo. Beta ôkôs ve zu taté na a vuñ atoʼo yôp, bial ô mbe ô nga jaé a mendim, mbia jam a ntoo be bebé.

²⁴ Be nga subu nye bebé a vele nye be jôʼô na: A Nyeʼele, a nyeʼele, bi nga jañ, bi nga jañ! Ane a nga vee, a nga yaa évuñulu a mintyôa, bie ve sis a bo ne mieññ.

²⁵ Nye be na: e mbunane wônan ô ne vé? Mbôlô woñ a nseman bi nga bi be, e nde ba jôan bana a ba bevoʼo na: Nyina a ne za? Amu a jôʼô jaʼan évuñulu a mendim, bi ve wôʼô nye.

E mbeʼe mbia Nsisim a bo mvoʼé

²⁶ Ane be nga kui e sii Begerazénieñ, zoʼone a Galilé.

²⁷ Eyoñe Yésus a nga sise si, môt éziñe ya tison a nga zu nye ôsu a beʼe abui mimbia minsisim. Obe ayab éyoñe mvus, a mbe teke jaé mengômesan, teke tabe e nda , ve mesoñ.

²⁸ Ñyenan a nga yene Yésus, a nga yôn, ve ku nye mebo a jô tyiñe ngule na: Wo jeñe ma jé a Yésus e Mone Zambe a Dañ Oyabe Yôp? Ma yeʼelane wo, te tuʼulane ma.

²⁹ Amu Yésus a nga bendé mvimvine nsisime na ô kôlô be môt ate, e nye a nga lat aso ayab éyoñ; be mbe be baʼaleʼe nye nkaʼane bengôkop a bityé mebo, ve a mbe a téék mengataʼa mé a mbia nsisim a mbe a tindiʼi nye e mefan.

³⁰ Yésus a nga sili nye na: jôé dôé e ne za? Nye na ézuk. Amu ézuʼu mimbia minsisim e nga nyiine nye nyôl.

³¹ A mi nga yeʼelane Yésus na a bo te bendé mie na mi ke étôtôlan.

³² Beta mbame bengôé a mbe wé a jaʼak e nkôl. A mimbia minsisim mi mbe mi yeʼelaʼane Yésus a ve be nkañesane ya nyiin e bengôé bete. A nga ve be nkañesane te.

³³ Ane mimbia minsisim mi nga kôlô be môt ate a nyiine be bengôé, e nde mbame bengôé ô nga koo yôp a suʼulan atoʼo été a mane nyoñ e mendime si.

³⁴ E bôt be mbe be yaʼaleʼe be vôme ba di, éyoñe be nga yene jam e nga kui, be nga tup a mialane foé e tison a mefan.

³⁵ Bôt be nga ke yene jam e nga boban. Be nga zu be Yésus a be nga koone e môt mimbia minsisim mi nga kôlô be nye a too nye mebo, a beʼe mengômesan a fek abum, e nde woñ ô nga bi be.

³⁶ E ba be nga yene jam e nga lôt be nga kañete be ane môt a nga beʼe mbia nsisim a nga kôtéban.

³⁷ E ba bese ya afôla si Begerazénieñ be nga sili Yésus, môt teke liʼi na a kôlô be be, amu beta woñ a nga bi bese. Ane Yésus a nga dañ e bial été a bulan.

³⁸ E môt mimbia minsisim mi nga kôlô be nye a nga sili nye awolo te ébiene na nge baa nye be ne liʼi. Ve Yésus a nga suu nye a jôʼô na:

³⁹ Bulaʼan e nda jôé a kañeteʼe mam mese Zambe a boya wo. Ane a nga ke a mias e tison ése, foé ya mam mese Yésus a nga bo nye.

Yésus a wômôlô ngone Yayirus Yésus a saé minga a konôya mimbu 12

⁴⁰ E mebulane mé, nkunda bôt ô nga nyoñe Yésus, amu bese be mbe be yangeʼe nye.

⁴¹ Ane môt éziñ a nga so jôé na Yayirus, ntebe ôsu ya aba Zambe. A nga ku Yésus mebo a yeʼelane nye na a nyiin e nda jé,

⁴² amu a nga bili atyiʼi ngon bebé mimbu awôm a mibaé, a duʼuk. Yésus a kelek e wé, ane ndula bôt a nga bametane nye.

⁴³ Nde minga éziñ a mbe a konôk metyi mimbu mi ntoo awôm a mibaé, a kooé na a dimiliya akume dé ese e be bedokita, ve teke wua a nga kui na a saé nye.

⁴⁴ Ane a nga ke bebé mfaʼa ya mvus a nnambe e ñwôndé ngômesane Yésus. Awôlo te ébien nkuane metyi ô nga tebe.

⁴⁵ Yésus nye na: Za a te nnambe ma? Mbôlô bese be nga kat ajô di, Pierre nye na: a Nyeʼele, ndula bôt a bôman a bametaʼane fe wo!

⁴⁶ Ve Yésus a nga yalane na: môt éziñ a te nnambe ma, amu ma yeme na ngul éziñ ja te kôlô be ma.

⁴⁷ Eyoñe minga a yeneya na be kulaneya nye asoé, a nga zu a fôʼôbaʼan a ku nye mebo, a kobô asu bôte bese amu jé a nga nnambe nye, a aval avé a nga bo mvoʼé awolo te ebien.

⁴⁸ Yésus a nga jô nye na: a ngo jam, mbunane wôé ô nyiiya wo; kele mvoʼé .

⁴⁹ A ngenan a kobôʼô, e nde môt éziñ a ke so be ntebe ôsu ya aba Zambe a jôʼô na: ngo jôé é wuya; te wo beta ndeñele nyeʼele.

⁵⁰ Vʼamu Yésus a nga wôʼô jame te, e nde a nga jô ntebe ôsu ya aba Zambe na: Te ko woñ buniʼi ve mbunan, wôna a ye nyiiban.

⁵¹ Eyoñ a nga kui e nda , a nji kañese na môte mfe a nyiin baa nye, vengevenge ve Pierre, Yôanes a Yakob, ésaa a nyia mon.

⁵² Bese be mbe be kuliʼi miliʼi mis a yône nye. E nde Yésus a jô be na: a nji wu, ve a ne ôyo.

⁵³ A be mbe be kpweʼeleʼe nye, amu be be yemeʼe na a wuya.

⁵⁴ Ve a nga bi nye wo a jô tyiñe ngule na: a mongô, kôlôʼô si.

⁵⁵ E nsisime wé ô nga beta zu be nye, awolo te ebien a nga kôlô si a Yésus a nga bendé na be ve nye bidi.

⁵⁶ Bebiaé be ésoé ngone minga be nga semé a Yésus a nga bendé be na be bo te kate môt e jam e nga boban.