LUKAS 5 - Bible en langue Bulu

Angônda nsôme kos

¹ Mbôlô nkunda bôt ô nga ke avôl ya bômane nye na be wôʼô mejô me Zambe a na a mbe e fefele ébataʼa mendim ya Genézarét,

² e nde a yen e kindiʼi ébatak bone bilelé bibaé, beyobe kos be ndôme sis été, be sôbe mevote map,

³ e nde a bet élélé jia yʼété é mbe e ji Simon, ve sili Simon na a ke ôbe ôyap a si. Wôna a nga tabe si, e nde a yeʼele bôt a too élélé été.

⁴ Eyoñ a nga suu nkobô, a nga jô Simon na: Kelek e vôme mendim me nʼédok, a wuʼane mevote menan na mi yop.

⁵ Simon a nga yalane nye na: A Nyeʼele bia te saé ngum alu teke bi jôm, vʼamu wo jô, ma ye wua mevot.

⁶ Eyoñ a boya nalé, e nde be nga bi étua abui kos, a mevote map me nga tuui.

⁷ Be nga febe bôte bevoʼo mo e mbe be mbe élélé évok été na be zu volô be. Be nga zu a jalé bilélé bibaane a kui na bi nyoñ e mendim.

⁸ Eyoñe Simon Pierre a nga yene nalé a nga ku Yésus meboñ a jô na: A Nti, kele ma ôyap amu me ne mbo abé .

⁹ Amu woñ ô nga bi nye, émien a ba bese baa be nye be mbe, amu nsôme mevot be nga bo.

¹⁰ Avale te fe mfaʼa Yakob a Yôanes, bone be Zébédé, bemvôé be Simon. Yésus nye Simon na: Te ko woñ; ataté éyoñe ji, wo zu bo nyô a yobe bôt.

¹¹ Ane be nga zuu bilelé e kindik, ve liʼi biôme bise a tôñe nye.

Nzezam ve saéban

¹² Yésus a mbe e jia ya bitison: e nde môt éziñ, zame nyôl ne nyaññ, a nga yene nye, ve ku asu e butu si a yeʼelane nye na: A Nti, nge wo kañese nalé, ô ne nguleya bo ma mfuban .

¹³ Yésus ve same wo a nnambe nye a jô na: Ma kañese nalé, boʼo mfuban . Eté été, zam é nga kôlô be nye.

¹⁴ Wôna a nga bendé nye na a bo te kobô de môt éziñ. Ve a nga jô nye na: Kele liti womien e be Ntuni, a ve mvean asu Ntunane wôé avale Môze a nga bendé, nalé jame te da ye bo be ngaa.

¹⁵ Duma dé e nga dañe mialan a ézuʼu minsamba mi bôt e nga sulan asu ya vôʼôlô nye a saéban mfaʼa ya akone dap.

¹⁶ Ve nye a mbe a wondéʼé e mevôm me ne tee bôt a yeʼelane Zambe.

Mbôbôk wo saéban

¹⁷ Yésus a mbe a yeʼeleʼe môs éziñ. Befarizieñ a beyeʼele metiñ be mbe be too si; be nga so minlam mise ya Galilé, Yudé a Yérusalém, a e ngule Nti é nga litiban e ñyetan akon.

¹⁸ Bôte bʼéziñ be beʼe môt a mbe mbôbôk énoñ, be mbe be jeñek na be nyiñeli nye a bôôé nye ôsu vié.

¹⁹ Mbôlô be mbe te yem e vôme be ne nyiine nye, amu bôt, e nde be nga bet andil a sili nye si a énoñe jé be lôtôk abé be nga tup a kui ézezañ ékôane bôt, ôsu be Yésus.

²⁰ Eyoñ a yeneya mbunane wop, Yésus a nga jô môt ate na: Mam abé môé me ntoo njaman .

²¹ Beyeme bekalate a Befarizieñ be nga taté na ba fas a jô na: Nyôna a ne za a kobô ébiasé? Za a ne jamé mam abé , ye sa Zambe étam?

²² Yésus a nga yem asimesane dap, ve nyoñe nkobô a jô be na: Amu jé mia bi aval asimesane te e minleme mienan été?

²³ Jé ja dañe tyiʼibi ya jô: Mam abé môé me ntoo njaman , ye jô na: Kôlôʼô si a wuluʼu?

²⁴ Vʼamu mi yeme na mona môt a bili ngul ya jamé mam abé e si nyô, e nde te ma bendé wo mbôbôʼô na: Kôlôʼô si, nyoñek énoñe jôé, a kelek e nda jôé.

²⁵ A été été, a nga kôlô si be too, ve toʼé énoñe jé a nga bôô yôp a ke e nda jé a kañeʼe Zambe.

²⁶ Bese be nga semé a be nga kañe Zambe. Njalan a woñ, be mbe be jôʼô na: Bi yeneya bitua bi mam e môse wu.

Lévi a loban - Nsili ajô ntyiane bidi

²⁷ Mvuse mam mete, Yésus a nga kui a tôban nyoñe toya, jôé na Lévi, a too wofis betoya. A nga jô nye na: Tôñe ma.

²⁸ Lévi a nga liʼi biôme bise, a kôlô si a tôñe nye.

²⁹ Lévi a nga bo nye beta dina e nda jé, beta nsamba benyoñe toya a bôte befe baa be be be nga too tawôlô.

³⁰ Befarizieñ a beyeme bekalate bap be nga nyiñ a jô beyéʼé béé na: Amu jé mia be benyoñe toya a bebo abé mia di?

³¹ Yésus a nga nyoñe nkobô a jô be na: Saa ke ba be ne mvoʼé ba yi dokita , ve minkôkon.

³² Me nji zu loone bezôsôô be bôt, ve bebo abé na be kôñelane minlem.

³³ Be nga jô nye na: Beyéʼé be Yôanes, ane ba Befarizieñ, ba tyi bidi mbane mban a bo meyeʼelan, ve émbôé ba di a nyu.

³⁴ Yésus a nga jô be na: Ye mi ne bo na bemvôé be nluʼu minga be tyi bidi e nté baa be nluʼu minga be né?

³⁵ Mimôs mia zu éyoñe ba ye vaa be nluʼu minga, éyoñe te ba ye tyi bidi mimôse mite.

³⁶ A nga kane fe be nkana na: Môt éziñ a voʼo nyabe éfuse ya mfefé éyé na a futi je e nnôm éyé; jam da ye kui e ne na a viane nyabe éyé é ne mfefé a éfus a nga futi été é boo teke luʼane nnôm éyé.

³⁷ Teke môt a futi mfefé woon e minnôme mendek bikôp; jame da ye kui e ne na mfefé woon wo ye bo na mendeʼe bikôp me tôtan, émien a nga sôôé, a mendeʼe bikôp me mane ndaman.

³⁸ Ve ba futi mfefé woon e mimfefé mendeʼe bikôp.

³⁹ A teke môt a ne bo na nge a mane nyu nnôme woon, a kômbô nyu mfefé, amu a jô na: E nnômô a ne mvaé.