LUKAS 3 - Bible en langue Bulu

Yôanes Babtist, nlôman wo ke Yésus ôsu

¹ E mbu awôm a tane, Kéza Tibér a too njôô, Pons Pilat a too ngovina ya Yudé, Hérôde a jôʼô e Galilé, Filip monyañ ke a jôʼô Ituré a Trakonitide, Lizanias a too njôô Abilén,

² Hanne a Kayif ke betuni, ajô Zambe e nga koban e be Yôanes e mone Zakari e nkôte si.

³ A nga zu afôla ese ya Yordan, a kele a yôtane nduan asu nkôñelane wo sôñe njamane mam abé

⁴ aval e ne ntilan e kalate nkulu mejô Ezayi na: Tyiñ ja yôtan e nkôte si: Kômane zene Nti sôʼan asozene dé zôsôô .

⁵ Ebé ése ja ye jineban beta nkôl ase a mone nkôl ase ba ye silibane si; mimfaka mi bili mekot ba ye sôane mie zôsôô nalé fe minjoñ mi ne bikpwekpwek ba ye tyee mie,

⁶ a e nsôn ôse wo ye yene nyiane Zambe.

⁷ Ajô te a mbe a jôʼô ba be mbe be zaʼa beta minsamba be nye na a duu be na: A mvoñe mekpwe, za a nga yeʼele mia na mi mate ayaa da zu?

⁸ Ajô te ñhe wumane bibuma bia yiane nkôñelane nlem a te jôan e miabebien été na: Abraham a ne ésaa wongan. Amu ma kate mia na: Zambe a ne ve Abraham bon be soʼo mekoʼo mana

⁹ éyoñ ébiene ji ôvôn ô bôô e tine bilé: élé ése ñhe ja bo te wum mbamba bibuma ja ye baʼéban a wuaban e nduan.

¹⁰ Jama bôt a nga sisili nye minsili na: Bia ye ñhe bo jé?

¹¹ Nye be na: E môt a bili melôʼô mebaé a kabaʼane me a nyô a nji bi, a nyô a bili jôme ya di a boʼo avale da.

¹² Benyoñe toya fe be nga zu na be duban, be nye na: A Nyeʼele, bia ye bo jé?

¹³ Nye be na: Te yetane jôm a dañ abim be nga bendé mia.

¹⁴ Bezimbi fe be nga sili nye na: Bia ke bia ye bo jé? Nye be na: Te nyoñane môte jôm a ngu, nge a bibôta mejô ve nyoñane tañ ba yaʼane mia na ja yian.

¹⁵ Amu bôt be mbe be yangeʼe, a bese be mbe be siliʼi bebiene minlem été nge Yôanes aa mbe ke Krist.

¹⁶ A nga yalane bese na: Ma, ma duu mia a Mendim, ve môt a zu a ne ngu a dañe ma, a me nji bo nyô a yiane kuli nye minkole bikôndé. Nye, a ye duu mia a Mfufube Nsisim a nduan.

¹⁷ A bili éfebaʼa e wo wé, wôna a ye vos e vôme wé ba fiale fes, a ye kôane nlisi angune dé, ve a ye diʼi bivua e nduan é ne teke dim.

¹⁸ Yôanes a mbe a kañeteʼe bôte mbamba foé a fulan abui melebe mefe.

¹⁹ Ve Hérôde, nyô be mbe be loʼone tétrark, e nye Yôanes a nga ve bijô ajô Hérôdiade nga monyañ a ajô mbia mimboone mise a mbe a boʼok,

²⁰ a nga beté mbia jam afe ya futi Yôanes e nda mimbôk e yôbe ya mbia be mam bevoʼo bese.

Yésus a duuban

²¹ Bôt be ngenan be zaʼa na be duuban, e nde Yésus fe a nga duuban; a boʼo meyeʼelan, e nde yôp da yombô,

²² a Mfufube Nsisim a nga sise be Nye a bili éyekaʼa nyôl, éfunan ane zum. Ane tyiñ é nga so yôbe na: Ô ne e Mone Wom ma dañe nyeʼe, ma yene wo mvaé.

Endane Yésus

²³ Yésus a nga bili mimbu bebé mewôm mela éyoñ a nga taté ésaé jé. Bôt be nga simesane na a mbe e mone Yôsep, Yôsep Héli,

²⁴ Héli Mattat, Mattat Lévi, Lévi Melki, Melki Yanayi, Yanayi Yôsep,

²⁵ Yôsep Mattati, Mattati Amôs, Amôs Nahum, Nahum Esli, Esli Nangayi,

²⁶ Nangayi Maat, Maat Matatias, Matatias Semeyin, Semeyin Yôsek, Yôsek Yôda,

²⁷ Yôda Yôanañ, Yôanañ Résa, Résa Zôrôbabél. Zôrôbabél Salatiél, Salatiél Néri,

²⁸ Néri Melki, Melki Adi, Adi Kôsam, Kôsam Elmadañ, Elmadañ Er,

²⁹ Er Yésus, Yésus Eliézer, Eliézer Yôrim, Yôrim Mattat, Mattat Lévi,

³⁰ Lévi Simeyôn, Simeyôn Yuda, Yuda Yôsep, Yôsep Yônam, Yônam Eliakim,

³¹ Eliakim Méléa, Méléa Ména, Ména Mattata, Mattata Natan, Natan David,

³² David Yessé, Yessé Yôbéd, Yôbéd Bôaz, Bôaz Salmon, Salmon Naasoñ,

³³ Naasoñ Aminadab, Aminadab Admin, Admin Arni, Arni Esrôm, Esrôm Farés, Farés Yuda,

³⁴ Yuda Yakob, Yakob Izak, Izak Abraham, Abraham Tara, Tara Nakor,

³⁵ Nakor Séruk, Séruk Ragayu, Ragayu Pélég, Pélég Eber, Eber Sila,

³⁶ Sila Kayinam, Kayinam Arfaksad, Arfaksad Sem, Sem Noé, Noé Lemék,

³⁷ Lemék Matusalém, Matusalém Enok, Enok Yeréd, Yeréd Malélél, Malélél Kenam,

³⁸ Kenam Enos, Enos Sét, Sét Adam, Adam e mone Zambe.