LUKAS 18 - Bible en langue Bulu

Nkana mbia ntyiʼi mejô

¹ Yésus a nga kane be nkana asu ya liti na: bia yiane yeʼelan éyoñ ése teke tek.

² Nye na: E ntyiʼi mejô éziñ a nga too e tison teke ko Zambe woñ, teke semé môt éziñ.

³ E nkuse minga éziñ ô mbe e tison éte ô boʼo ô zaʼa jô nye na: tyiʼi ma ajô e zañe bia e nsiñe wom.

⁴ Ayab éyoñ, a nji kañese. Ve a nga suʼulane jô émiene na: me kusa bo te ko Zambe woñ nge semé môt éziñ,

⁵ ve da na amu e nkuse minga wu wo ndeñele ma, ma ye tyiʼi nye ajô, a za suʼulane zu bôé ma nlô.

⁶ E Nti a nga beta jô na: Wôʼan ane mbia ntyiʼi mejô a jô.

⁷ Ye Zambe a ye bo te tyiʼi mejô mintobane mié, e mmie mia yône be nye alu baa môs , a ye yange ayap mfaʼa wop?

⁸ Ma jô mia de na: A ye jiʼa tyiʼi be mejô. Ve éyoñe Mona môt a ye so, ye a ye foʼo koone mbunan e si nyô?

Mone Farizieñ a e nyoñe toya

⁹ A nga beta kane nkana wu asu bôte bʼéziñ be mbe be buniʼi bebiene na be ne zôsôô , be biaséʼé bôte bevok;

¹⁰ nye na: bôte bebaé be nga bete nda Zambe na be yeʼelan: wua a mbe Farizieñ, nyô mboʼo nyoñe toya.

¹¹ Farizieñ, tetele, a nga yeʼelan avale di e nlem été: A Zambe, ma ve wo akéva amu me nji bo ane bôte bevoʼo bese e mbe ba wôlé éza biôm, ékotekot, mejian , nge ane nyoñe toya nyô;

¹² ma tyi bidi biyoñ bibaé sondô ase, ma ve ngab awômô ya biôme bise ma bi.

¹³ E nyoñe toya a nga tele ôyap, teke ayoʼo ebiene ya fombô yôp, ve a kutuk tôé a jôʼô na: A Zambe, koo ma éngôngo, ma mbo abé .

¹⁴ Ma jô mia de na: a nga siliki e nda jé a mbili mekabe, ve saa ñhe môte mbok. Amu nyô ase a bete émiene yôp, a ye silibane si, a nyô a sili émiene si, a ye betebane yôp.

Bone be bongô

¹⁵ Bôt be nga soo nye jaʼane bon be ndôme bialé na a nnambe be. Ve beyéʼé, éyoñe be yeneya jame te, be nga ve be bijô.

¹⁶ A Yésus a nga bo na be loone be a jô na: Jôkaʼan bone be bongô be zu be ma, a te kamane be jame te; amu éjôé Zambe é ne asu ba be ne ane be.

¹⁷ Ma jô mia de bebela na: Nyô ase a ye bo te nyoñ éjôé Zambe ane mone mongô a ye bo teke nyiin été.

Nkukum ésoé ndôman

¹⁸ Evet éziñ é nga sili Yésus nsili na: A mbamba nyeʼele, ma yiane bo jé na me nyoñ ényiñe ya nnôm éto ane ngap?

¹⁹ Yésus a nga jô nye na: Amu jé wo loone ma mbamba? Teke môt a ne mbamba, nga ve Zambe étam.

²⁰ Wo yeme mebendé na: te bo mejian; te wôé môt; te wup; te bôte môt ajô; seméʼé ésoo baa nyua.

²¹ Nye na me maneya baʼale mam mete mese aso mongô.

²² Yésus, éyoñ a maneya vôʼôlô nye, a nga jô nye na: Jame da e ngenane da jembane wo: Kuʼan e biôme bise ô bili, kabe bie bingôngole bi bôt, a wo ye bi mefok e yôp. Wôna zaʼak a tôñe ma.

²³ Eyoñ a nga wôʼô nalé, a nga dañe bo éyôé, amu a mbe étua kum.

²⁴ Eyoñ a nga yene nalé; Yésus a nga jô na: Abim ayaé e né e be ba be bili akume na be nyiin éjôé Zambe!

²⁵ Amu da dañe tyiʼibi na kamel a tulan abé ôndôndo, a dañe na nkukum ô nyiin éjôé Zambe.

²⁶ Ba be mbe be vôʼôlô nye be nga jô na: Ajô te za a ne nguleya nyiiban?

²⁷ Yésus a nga yalane na: Jam e se nguleya boban e be bôt, e ne boban mfaʼa Zambe.

²⁸ Pierre nye na: Tame yen: bi nga liʼi biôm bi mbe ébiangan a bi nga tôñe wo.

²⁹ Yésus a nga yalane be na: bebela, ma jô mia de na: teke môt, éyoñ a maneya liʼi nda , minga, bobenyañ, bebiaé nge bon amu éjôé Zambe,

³⁰ a bo te nyoñe biôm abui éyoñe ji, a ényiñe ya nnôm éto éyoñe ja zu.

Yésus a kate foé yʼawu a ñwômane soñe wé

³¹ Yésus a nga nyoñe beyéʼé awôm a bebaé e fefele jé a jô be na: Tama yenan, bia ke e Yérusalém; a e mam mese bekulu mejô be nga tili ajô Mona môt ma ye tôéban.

³² Amu a ye keeban e be bikuu; ba ye woé nye, a kpweʼele nye, ba ye tui nye menden

³³ a éyoñe be maneya bôme nye, ba ye wôé nye; a e môse lale a ye wômô.

³⁴ Ve be nji wôʼô jôm; mejô mete me mbe be nsolan; be mbe teke yem atinane yʼété.

E ndindime ya Yérikô

³⁵ Mbôlô Yésus a mbe bebé Yérikô, e ndindim éziñ ô mbe ô too e fefele zen ô jakéʼé biôm.

³⁶ A nga wôʼôtane ndulu bôt a lôtôk a sili jam e mbe.

³⁷ Be nga kate nye na: Yésus ya Nazarét a lôt.

³⁸ Ane a nga yôtane na: A Yésus, mone David, koo ma éngôngo!

³⁹ E ba be mbe be wuluʼu ôsu, be nga komekane nye na a tabe évô, ve a mbe a dañe bete tyiñe na: A mone David, koo ma éngôngo!

⁴⁰ Yésus a nga tebe a bendé na be zuu nye be nye, a éyoñ a nga kui nye bebé, Yésus a nga sili nye na:

⁴¹ Wo yi na me bo wo jé? Nye na: A Nti, naa me beta yen!

⁴² Yésus a nga jô nye na: betaʼa yen; e mbunane wôé ô nyiiya wo.

⁴³ Awolo te, a nga yen a tôñe Yésus, a vaʼa Zambe duma. Bôte bese, éyoñe be nga yene jame te, be nga kañe Zambe.